Sinta C Koliput

Part 2

~ Sinta C Koliput ~

By : Tescy Descy

Cerita Rekaan

    ~ Part 2 ~

    “mama tidak sudah kah sayang sia ni. Hari-hari kana rutan. Hari-hari kana marah.”

    “atukkk.... atukkk.. atukkkk... kau mau mandi kah kau mau buat drama air mata sana tu oliput!!! mama rutan lagi kau sana karang ni.”

    Ta'kajut kama c koliput bila tiba-tiba mama c koliput toriak lagi sana luar tampat mandi sampai to'buang bah gayung yang c koliput pigang. Capat-capat sudah di c koliput mandi, takut juga c koliput ni kana rutan. Garang bah mama c koliput ni dari bapa dia. Sudah lah bunting lagi kama mama c koliput ni anak ke 10 kama.

    C koliput ni anak ke-3. Koliput ada 1 abang, tingkatan 3 sudah sama c koliput ada kakak, tingkatan 1. Jadi kan c koliput ni ada adik lagi macam tangga, 6 urang lagi bah tu di bawa c koliput, kuat bah bapa c koliput ni buat anak tapi kuat juga lah buat karaja kampung bah.

    Adik-adik c koliput semua sumandak ta'masuk dalam perut mama c koliput, 2 urang saja c koliput sama abang dia lelaki kama. Pasal tu lah bapa c koliput kuat butul mau buat anak pasal mau cari tanak wagu lagi bah tapi tidak sudah di dapat-dapat.

*** 1 Minggu Kemudian ***

    “oliputtt!!.”

    “ishhhh.. c mama ni kan. Cni bah sia ma. Napa juga mama mau panggil sia macam sia sana utan ni. Cni pun sia ampai-ampai tidur tingu tb (tv) ni.”

    “ohhhh... kau dingar juga kah pula tu oliput?.”

    “dingar lah bah ma. Napa juga mau toriak urang macam urang ni bosukon (tuli).”

    “dahhh... ohhhh.. kau tingu tu jam. Jam barapa sudah tu oliput?.” (mama c koliput tahan-tahan saja mau maradang sama c koliput)

    “jam 10. Napa ma?.”

    “napa ma??.”

    Pett.. Pettt.. Pettt.. Pettt...

    “aduiii.. aduiii.. aduiii.. ama bah!! aduiii... ma bah!! sakit bah ma!! huhuhuuhuuhuu.. apa lagi salah sia ni ma?.” (nangis-nangis c koliput sambil dia tanya mama dia yang tiba-tiba mau mo'rutan)

    “kau lupa kah apa mama sudah kau tadi lagi jam 7 lagi?!! kau lupa kah tu oliput!!!.”

    “apa ma? Tiada pun mama suruh apa-apa tadi.” (manjawab juga kama c koliput sambil dia toriak mama dia)

    “mati lah semua tu ayam sana kabun tu!!! kalau mati lagi tu anak ayam sarama, mama kurung kau sana kandang ayam!! mama kasi jadi kau ayam sana!! kau mau kah oliput!!!.” (atukk..atuk...atuk... 1 kampung pun buli dingar suara mama c koliput kalau mau tariak c koliput)

    “tidak mau.. huhuhuhuuhuhuu.. tidak mau bah ma.. tidak mau.”

    “jadi?! Kau mau kasi mati lagi tu ayam semua sana?!! hari-hari ada saja mati anak ayam sana kabun karaja kau!!.”

    “maap bah ma.. sia pigi lah kasi makan sakarang.”

    “mati sudah tu!!.”

    “ishhh... bulum bah tu ma. Sia jalan dulu lah.”

    “kalau mama kira kurang jaga kau. Mama sudah kira tu. Anak ayam ada 50 ikur. Tu mama ayam ada 20 ikur. Tu bapa ayam ada 10 ikur. Itu aki ayam ada 5 ikur. Tu odu ayam ada 3 ikut. Tu talur ayam ada 50 biji.”

    Tidak bo'kolip kama mata c koliput tingu mama dia sampai mulut c koliput pun basar to'buka pasal dia ta'kajut gia dingar tu ayam macam tu banyak. Maka kan, mama c koliput main-main saja mah tu, mana lah bah banyak macam tu bah ayam durang c koliput. Banyak lagi yang mati karaja c koliput dari yang masi hidup.

    C koliput jalan gia di mau pigi sana kabun, sana sa'barang sungai saja bah kabun durang c koliput ni. Kalau mau pigi kabun durang c koliput ni, mau kana limpas lagi rumah ketua kampung. Sama rumah-rumah urang kampung yang tinggal dakat-dakat tu sungai sana.

    Ni ketua kampung ni ada cucu perempuan, suka butul mau main masak-masak sana dapan rumah di bawa puku mangga sama suka lagi tu main kahwin-kahwin. Tapi tu cucu ketua kampung tidak suka c koliput, musuh butul durang dua, nama dia c ugou. C koliput yang suka barabis kama sama c ugou.

    Koliput mau dakat sudah sama rumah tu ketua kampung, dari jauh lagi c koliput nampak sudah c ugou duduk-duduk di bawa puku mangga sambil main masak-masak.

    Atukkkkk.... punya laju kama kaki c koliput mau pigi tampat c ugou. C koliput sampai saja tampat c ugou, sonyum-sonyum kunun c koliput sambil tarik-tarik hingus dia tingu c ugou.

    C ugou tingu c koliput dari atas sampai bawa, baru dari bawa sampai atas lagi c ugou tingu c koliput, baru c ugou tingu lagi muka c koliput. C ugou tingu saja hingus c koliput turun naik turun naik pasal c koliput tarik-tarik gia hingus dia kalau mau jatuh sudah sampai mulut. Kolipus kasi tuis-tuis lah kakah kaki dia sambil malu-malu kana tingu c ugou.

    “apa kau mau?!.” (atukkk.. kada kama. Garang kama c ugou ni, maka baru tahun 3)

    “ugou... apa kau buat.” (atukk.. atukkk... c koliput mau buka sorita kakah tu)

    “apa kau mau sibuk! Kau buat apa cni!.”

    “jangan bah kau garang-garang ugou. Kau ni garang butul macam mama sia.”

   

    “eee.. pigi kau sana! Jangan kau kacau sia!.”

    “ugou, kau tidak mau main kahwin-kahwin ni hari?.”

    “tidak mau!.”

   

    “napa?.”

    “pasal c bulat tiada!.”

    “sia kan ada. Mari bah kita main kahwin-kahwin. Sia jadi laki kau.”

    Atukkk... atukk... atukkk... pandai sudah c koliput mau jadi laki urang kama. Lupa sudah c koliput mau pigi kasi makan ayam. Ni kali lah ni tubal ni, kana rutan lagi lah ni kali c koliput ni.

    Urang tidak mau main sama dia kan, ma'maksa butul kama c koliput ni. C koliput mau main sama c ugou sambil c koliput mau kuntik c ugou bah kunun tu.

    “sia tidak mau main sama kau bah oliput!.”

    “kanapa kah? Tidak hensom kah sia ni ugou?.”

    “ya!! kau tidak hensom macam c bulat.”

    “eee.. kau ni ugou, hensom lagi kama sia ni dari c bulat. Apa yang kurang nya sia ni ugou? Hensom butul sia ni pun kau tidak mau tingu.”

    C koliput ludah kunun tapak tangan dia, baru dia kasi jadi minyak rambut, koliput lap lah tu ludah sana rambut dia baru c koliput tarik sisir yang dia selalu bawa-bawa pigi mana-mana saja, c koliput simpan sana poket balakang seluar kama tu sisir baru c koliput sisir lah rambut dia pigi siring-siring kama.

    C ugou tingu c koliput kan, tambah banci lagi c ugou tingu c koliput kama. Pongutur bah c koliput, macam mana lah c ugou mau suka c koliput kalau macam tu gaya. Sudah c koliput sisir rambut dia lawa-lawa kan, c koliput kasi masuk lagi baju dia dalam seluar baru c koliput tarik kasi naik seluar dia sampai atas dada, atukkkkk... macam c asuk-asuk bili surat kabar lama kama sitail c koliput.

    “apa macam ugou? Hensom sudah sia kan? Kala sudah hensom c bulat kan.”

    Sambil kunun c koliput kasi masuk kunun tangan dia dalam poket, sambil juga tu kodou (kening) c koliput angkat-angkat mau kasi tambah lagi kali macoh dia dapan c ugou. Mau nangis sudah c ugou tingu c koliput macam urang kurang siuman ni, last-last c ugou lari gia di naik pigi masuk dalam rumah.

~ Bersambung ~