Sinta C Koliput

Part 10

~ Sinta C Koliput ~

By : Tescy Descy

Cerita Rekaan

    ~ Part 10 ~

    “apa kau pigi tingu sana?.” (c zul tanya c koliput)

    “sia pigi tingu tu numbur rumah di pagar.”

    “jadi?.”

    “ngam juga tu numbur rumah kita. Jadi bini siapa tu di dalam?.”

    “aikkk.. mari kita masuk lah.” (c zul pun bingung-bingung juga macam c koliput)

    “bah, kau buka lah tu pintu tapi jangan ada bunyi.”

    Punya lah cadangan c koliput bah. Bah, c zul pun ikut lah bah ni tidak mau kasi bunyi-bunyi kunci dia mau cucuk tu lubang. Palan-palan c zul mau kasi pusing tu kunci mau buka lock tu grill.

    Takk..

    “palan-palan kau bah zul.” (aikkk.. c koliput marah c zul sambil guna suara be'bisik saja kunun)

    “ya bah.. ya bah.”

    Sudah kana buka lock tu grill, c zul mau kasi masuk lagi kunci pigi tombol pintu. Baru c zul mau cucuk tu lubang, sekali tu pintu kana buka saja dari dalam, terus ta'karas saja c koliput sama c zul tingu tu pintu kana buka.

    “aikkk.. ma aiii.. anak siapa juga ni cantik butul.” (c koliput cakap dalam hati bila nampak sumandak pula pigi buka tu pintu)

    “aikk.. siou.” (tu sumandak cakap sama durang c koliput)

    “kami salah rumah kah ni?.” (c zul tanya tu sumandak)

    “kamu dua 1 rumah sama abang sia kah?.” (tu sumandak tanya durang c koliput)

    “abang?.” (serentak c koliput sama c zul tanya)

    “hehehe.. c joe bah abang sia.”

    “ohhh...” (serentak juga c koliput sama c zul jawab)

    “siou, sia singga sikijap saja bah ni.”

    “ohhh.. mana c joe? Tiada kereta c joe pun.” (c zul tanya adik c joe)

    “dia keluar kijap tu pigi tingu kereta sia rusak. Dia hantar saja sia pigi cni tadi.”

    “ohh.. patut lah c joe tidak pandai sampai-sampai di pasar malam tadi.” (c koliput lagi be'suara)

    “hehehe.. siou. Ada bah tu dia cakap tadi mau pigi makan di pasar malam tapi kereta sia buat hal.” (c koliput sama c zul anguk-anguk kapala saja)

    “bah, masuk lah.” (adik c joe suruh durang c koliput masuk. C zul pusing tingu c koliput sambil garu kapala)

    “mau masuk kah?.” (c zul tanya c koliput pakai suara kici saja. C koliput angkat-angkat bahu saja)

    “ahhh.. kau 1 urang saja kah ni mandak?.” (c koliput tanya adik c joe)

    “ya. Masuk saja bah.”

    “tidak apa lah. Kami cni luar rumah saja lah.” (bilang gia c zul)

    “duii.. masuk saja kamu.”

    “tidak apa-apa kah juga ni mandak. Karang kana tangkap kami ni.” (c koliput tanya adik c joe)

    “hahahahaha... siapa mau tangkap? Kamu pulis juga bah.”

    “bukan bah. Nanti urang pikir lain-lain saja bah.”

    “tiada juga tu. Masuk saja. Ni pintu biar saja bo'buka kalau kamu takut.”