Sinta C Koliput

Part 9

~ Sinta C Koliput ~

By : Tescy Descy

Cerita Rekaan

    ~ Part 9 ~

    “haii.. ada urang kah duduk cni?.” (aikkk.. laju kama c koliput pusing tingu balakang dia. Tu sumandak kiut bogia pigi tanya)

    “tiada dik. Duduk lah.”

    “makasi.”

    “sama-sama bah. Duduk lah.”

    Senyum-senyum tu sumandak pigi duduk dakat c koliput, ada kawan-kawan juga tu sumandak, durang pigi saja campur duduk tampat durang c koliput gia, pasal 2 urang saja gia c koliput sama kawan dia duduk sana, kawan-kawan c koliput yang lain bulum sampai lagi.

    “c zul ni kan bikin malu butul oh.” (koliput cakap dalam hati sambil pura-pura kunun tingu hp)

    Malu kakah c koliput, maka mau-mau juga dah kana dakat tu sumandak. Senyum-senyum c zul tingu c koliput sambil tandang-tandang kaki c koliput di bawa mija. Kontrol macoh kama c koliput tingu c zul.

    “jangan kasi lama lagi ed.” (c zul pigi bisik c koliput)

    “ishhh... kau ni zul.” (malu bah c koliput mau mongurat tu sumandak)

    “bila lagi.” (c zul bisik lagi c koliput)

    “tidak ngam lah bah ni masa.” (c koliput cakap balik sama c zul sambil tingu tampat lain sambil juga garu-garu kapala kunun)

    “dik, kamu kerja kah?.” (atuiii.. c zul pula yang buka sorita kama. C koliput terus pigi sipak kaki c zul. Senyum-senyum c zul, c zul tidak layan c koliput)

    “ya kerja.” (tu sumandak kiut yang jawab c zul. Sumandak yang duduk dakat c koliput juga bah)

    “ohhh.. kerja mana?.”

    “sia kerja di hospital. Ni dua kazen sia cigu.” (sambil tu sumandak tunjuk tu dua sumandak yang duduk di dapan dia)

    “ohhh.. nurse lah ni?.”

    “ya.” (malu-malu tu sumandak mau jawab sambil garu-garu dahi dia)

    “ohh.. orang mana?.”

    “eemmm.. mula sudah c zul ni.” (c koliput cakap dalam hati saja)

    “kami urang ranau. Kita?.” (sambil tu sumandak tunjuk c zul sama c koliput)

    “wowww.. juah datang kerja. Aku orang sipitang. Ni orang tambunan.” (sambil c zul kasi tau dia urang mana baru c zul tunjuk c koliput)

    “ohh.. kamu pun jauh bah.”

    “hahahaha.. sama-sama kita urang jauh.”

    “kamu karaja apa cni?.”

    “hehehe.. kami kerja tukang sukat saja ni.” (sikit mau malatup katawa c koliput bila keluar sudah jajal c zul)

    “ohh.. sukat apa?.” (pacaya juga kama ni sumandak)

    “sukat tu laut.” (punya lah main sorius c zul manjawab sambil tujuk ara laut)

    “aduiii.. zul.. datang sudah panyakit ni urang ni tau.” (c koliput cakap dalam hati saja sambil giling-giling kapala tingu c zul kasi main-main tu sumandak)

    “ohhh.. baru sia tau pula tu laut mau kana sukat juga. Untuk apa lah tu mau di sukat.” (terus c koliput tingu saja tu sumandak di sa'balah dia kama)

    “jangan kau pacaya dia ni mandak. Datang sudah panyakit dia ni mau tombirang urang.” (last-last c koliput be'suara juga. Risau butul c koliput kalau makin taruk panyakit c zul mau kasi tombirang tu sumandak)

    “hahaha.. yang butul apa gia?.” (tu sumandak tanya c koliput sambil katawa)

    “tidak bah, kami kerja potong rumput saja bah ni.” (butul-butul lah c zul. Lain lagi c zul kasi tau karaja dia)

    “jangan kamu layan dia ni.” (c koliput cakap lagi sama tu sumandak. C zul senyum-senyum saja)

    “ahh.. kita cerita-cerita tapi lupa pula mau tanya nama. Sia fifi, ni kate, tu sasa.” (bilang gia c sumandak yang duduk dakat c koliput mau kasi kanal siapa durang)

    “woww.. fifi pula nama dia.” (koliput cakap dalam hati saja pasal teruja sudah gia tau nama tu sumandak yang buli buat mata dia keluar lop-lop sinta)

    “wahhh.. lawa nama kamu macam orang dia juga. Aku zul, ni ed.” (memuji sudah c zul, pancingan c zul saja tu)

    “makasi.” (serantak tu 3 sumandak cakap sama c zul)

    Tidak lama sampai makanan tu 3 sumandak, durang layan makanan durang sambil durang cerita-cerita. C zul sama c koliput tidak kacau tu sumandak 3 urang makan sambil durang 3 be'cerita.

    Buli tahan butul durang c koliput ni duduk sampai tu 3 urang sumandak siap makan sampai durang jalan mau pulang lagi kama. Durang c koliput siap sudah makan, durang tunggu kawan-kawan durang yang lain mau datang tapi tidak pandai sampai-sampai bogia.

    Jalan saja durang c fifi, terus sodih bah c koliput. C koliput bawa di c zul pulang. C koliput sama c zul ni 1 rumah, ada lagi 2 urang kawan c koliput yang sama-sama 1 rumah juga sama c koliput.

    “mari lah kita pulang zul. Lambat butul durang c joe sampai ni.” (maka alasan bogia c koliput mau bawa pulang pasal kosiwa gia kana tinggal c sumandak sumil)

    “bah mari lah, entah mana juga durang jalan sampai belum sampai-sampai lagi.” (c zul pun panat juga mau duduk lama-lama mau tunggu kawan-kawan dia tapi tidak pandai sampai-sampai)

    “durang buat jalan raya kali tu mau sampai cni.”

    Buat lawak lagi c koliput, c zul katawa saja. Bah, durang dua jalan lapas saja bayar makanan. C koliput ni tiada kurita tiada mutu, c koliput mau pigi mana-mana dia naik c zul saja atau sama kawan-kawan 1 rumah dia saja.

    C koliput ni tinggal di rumah sewa saja sama kawan-kawan dia ni yang sama-sama juga durang pigi ikut latihan pulis sana sarawak. Sengaja durang ni mau sewa rumah, ada bebas sikit gia kalau tinggal di luar dari di rumah pulis.

    Durang c koliput sampai saja rumah, heran durang tingu tu rumah tarang sudah. Koliput tingu c zul, c zul pun tingu c koliput sambil kasi be'kerut dahi. Bah, galap sudah gia kan.

    “aikk.. napa rumah kita ni terang sudah ni zul?.”

    “kau ni ed, kau tanya aku lagi pula. Mana lah bah aku tau.” (koliput senyum-senyum sambil garu-garu dahi tingu c zul)

    “ada juga kita tutup lampu tu kan.”

    “ya, tu lah. Tapi kalau ada orang, mana ada kereta c joe sama moto c jeff.”

    “ada parampuk kali ni zul.” (masam-masam sudah dalam pikiran c koliput)

    “mari kita masuk.”

    “diam-diam kita jalan zul. Tu kasut kau jangan kasi tinggal bukti ada bunyi.”

    C zul tahan-tahan saja mau katawa. C koliput buka kasut dia, c zul pun ikut. Durang jalan lah macam poncuri punya jalanan sambil tunduk-tunduk kunun.

    Durang c koliput dingar ada suara perempuan katawa-katawa dalam tu rumah, koliput tingu c zul, c zul pun tingu c koliput. Koliput jalan lagi balik mau pigi pagar. C koliput mau pigi tingu numbur rumah sana pagar.

    “aikkk.. butul pun ni numbur rumah. Jadi siapa punya bini pula di dalam.” (koliput cakap dalam hati saja)

    C koliput jalan lagi macam jalanan pencuri juga mau pigi dakat c zul. C zul angkat-angkat kening sambil tingu c koliput. Koliput pigi dakat c zul.

~ Bersambung ~