~ Sinta C Koliput ~
By : Tescy Descy
Cerita Rekaan
~ Part 16 ~
Ke-esokkan hari nya, awal lagi c ugou be'siap. Siap saja c ugou, c ugou pigi sarapan baru c ugou jalan mau pigi singga rumah durang c koliput. Ugou sampai saja dapat rumah durang c koliput, c ugou nampak mama c koliput jamur kain.
“pagi anty.”
“aa.. ugou. Kau mau pigi mana ni?.” (mama c koliput tanya c ugou)
“hehehe.. c koliput suruh singga cni bah tu. Kami mau jalan sama-sama pigi kk.”
“ohhh.. bah, naik dulu bah. Pigi dulu kau sarapan. Masi di atas lagi tu c koliput tu.”
“ohh.. tidak apa lah anty. Sudah juga sia sarapan di rumah tadi.”
“duii.. napa gia kau panggil mama ni anty. Panggil saja bah mama bah.” (c ugou garu-garu dahi dia sambil senyum)
“hehehehe.. biasa sudah bah.”
“bah, mari naik dulu. Minum kupi pun buli lah bah. Mari.”
Mama c koliput paksa juga c ugou naik pigi sarapan, c ugou ikut saja naik pigi atas. Masa c ugou baru sampai dapan pintu rumah durang c koliput, c koliput baru keluar dari bilik, sudah siap c koliput be'siap.
“aaa.. sampai sudah kau?.” (c koliput cakap sama c ugou)
“ahh.. ya lah. Siapa juga kau nampak sakarang ni kalau bukan sia sampai sudah?.” (koliput senyum-senyum sambil garu-garu balakang leher)
“bah, bawa c ugou pigi sarapan dulu tu oi oliput.” (mama c koliput cakap sama c koliput)
“bah. Mari lah pigi sarapan dulu.” (c koliput bawa c ugou)
“sudah juga bah sia sarapan dari rumah bah ni.”
“sana lain, cni lain. Mari lah.”
C ugou diam-diam saja ikut c koliput mau pigi dapur. Senyum-senyum bogia c koliput tingu c ugou. Banci butul c ugou mau tingu muka c koliput. C ugou balas juga senyuman c koliput, tapi senyuman paksa saja.
“ishhh.. tiada karaja kah ni urang ni mau senyum-senyum saja.” (c ugou cakap dalam hati saja)
“bah, makan lah ugou. Makan sikit pun buli lah bah.” (mama c koliput cakap sama c ugou sambil mama c koliput kasi hidang makanan untuk c ugou)
“bah, makasi.”
Senyum saja mama c koliput sambil anguk kapala. Siap saja durang c ugou sarapan, bapa c koliput offer lah bah ni mau hantar durang c ugou sampai pakan. Ada kurita bah bapa c koliput ni, tu lah bapa c koliput tulung juga pigi hantar sampai pakan, lagi pun bapa c koliput ada mau pigi urus juga di pakan gia.
Sampai pakan saja durang c ugou, sebelum durang c ugou pigi naik bas, c koliput bawa pigi bili-bili dulu makanan sama minuman bikin makan-makan dalam bas. C ugou ikut-ikut saja c koliput dari balakang, c ugou jalan jauh-jauh kunun. Ramai lagi tu sumandak senyum-senyum sama c koliput, c ugou buat tidak tau saja.
Lapas saja c koliput sudah bili apa yang dia mau bili, durang pigi lah naik bas. C koliput sama c ugou duduk sana bangku barisan ke-2, pasal sana untuk 2 urang saja duduk. C ugou duduk dakat cermin, c koliput bagi c ugou makanan, c ugou ambil juga tapi sana luar c ugou tingu. C ugou be'pikir macam mana dia mau kasi pancing c koliput.
YOU ARE READING
Sinta C Koliput
Cerita PendekCerita ni mengisa kan sorita sinta c koliput. Koliput seorang tanak wagu yang tidak pandai putus asa mau cuba nasib mongurat sama sumandak pujaan hati dia. Dari kici sampai lah c koliput tanak wagu, tidak pandai putus asa juga c koliput ni mau kajar...