Sinta C Koliput

Part 17

~ Sinta C Koliput ~

By : Tescy Descy

Cerita Rekaan

    ~ Part 17 ~

    Koliput baru mau pigang tu cup, sekali tu cup ta'lapas saja dari tangan c koliput. Te'bediri saja c koliput tingu tu minuman tumpah sudah di lantai. C ugou pun ta'karas saja tingu tu minuman jatuh pigi lantai. C ugou tingu c koliput dengan muka marah, koliput pun tingu c ugou dengan muka pucat.

    “siou.. sia tidak sengaja kasi lapas.” (c koliput cakap sama c ugou)

    “kau tau kah tu minuman mahal sia bili!!!.” (atukkk.. punya main marah c ugou)

    “siou.. sia tidak sengaja. Sia bayar balik lah.”

    “ishhh!!!! punya lah kau ni buduh!!! sia banci butul sama kau ni koliput!!!.”

    C ugou marah butul pasal gagal rancangan dia sama c bulat. C koliput balik-balik say sorry sama c ugou, tapi macam-macam caci maki c ugou kasi keluar dari mulut dia mau maki-maki c koliput. C koliput tunduk saja sambil duduk balik di siring katil.

    C ugou kamas barang-barang dia, c koliput tingu saja c ugou. Macam c ugou mau buang saja c koliput pigi luar jandila. Siap c ugou kamas barang-barang dia, c ugou masuk lagi pigi kamar mandi mau ambil pakaian kutur dia.

    “siallll... butul-butul sial lah ni lelaki ni!!.” (c ugou teriak-teriak dalam hati saja)

    “argghhhh...”

    Kotompisal (te'gelincir) bah c ugou dalam tu kamar mandi. Macam ada yang pigi tulak c ugou tapi tiada juga pigi tulak. C koliput dingar saja c ugou teriak, laju kaki c koliput mau pigi tingu c ugou. C ugou te'tidur sudah di lantai.

    “ugou.. kau kanapa ni.” (c koliput panik nampak c ugou)

    “ishhh.. siall!! sana kau!!.” (c ugou tapis tangan c koliput sambil juga c ugou mau bangun palan-palan)

    “ugou..” (c ugou pusing juga tingu c ugou)

    “apa?!!!.”

    “tu.. darah apa tu?.” (c koliput tunjuk tu lantai. C ugou tingu balakang dia)

    “arrggghhhhh.. arrggghhhh.. tidak.. tidak...”

    Macam urang kana rasuk saja c ugou bila nampak tu darah di lantai. C koliput pun jadi panik sama heran tingu c ugou macam tu. Tidak lama c ugou pingsan, koliput kasi bangun-bangun lagi c ugou tapi c ugou tidak sudah bangun.

********************************************

*** Koliput ***

    “aduiii.. ugou.. ugou.. bangun.. aduiii.. kanapa sudah dia ni. Darah apa juga ni.”

    C koliput kasi guyang-guyang lagi badan c ugou, tapi tiada respon sudah c ugou. Last-last c koliput tarik saja handbeg c ugou baru c koliput lari lagi keluar dari kamar mandi mau ambil dompet sama hp dia, baru c koliput angkat c ugou mau bawa pigi hospital.

    Sampai lobby hotel, heran semuah tu staff hotel yang jaga di lobby. Koliput teriak-teriak saja minta tulung cari taxi, be'kerjasama juga bah semua tu staff. Koliput masuk saja dalam taxi sama c ugou terus tu taxi pecut saja mau pigi hospital.

    Sampai hospital, c ugou terus kana tarik pigi ka'camasan. C koliput bingung sambil juga badan c koliput ba'gagar lagi takut c ugou ada apa-apa. Bila c koliput ingat pasal mama bapa c ugou, koliput terus saja call bapa c ugou. Bila ka'adaan c koliput ada okey-okey sudah, c koliput duduk saja di luar ka'camasan sambil be'pikir.