Sinta C Koliput

Part 7

~ Sinta C Koliput ~
By : Tescy Descy
Cerita Rekaan

    ~ Part 7 ~

    “aikkk.. macam suara c bulat saja.” (koliput cakap dalam hati saja sambil mau dingar apa durang c ugou buat dalam tu sulap)

    “siou bah, sayang takut-takut juga urang bah tadi. Nanti kana nampak habis lah.” (c ugou lagi cakap dari dalam tu sulap)

    “ada urang nampak sayang kah?.” (suara c bulat sudah)

    “tiada.”

    “bah, capat lah.”

    “aikkk.. capat? Capat apa kunun tu?.” (c koliput cakap dalam hati bila dingar c bulat cakap capat)

    “jap bah. Urang baru sampai pun tidak lah bah pandai mau sabar bah.” (c ugou marah kunun c bulat)

    “rindu bah. Cakap lah.” (atuiii.. masam lain-lain tu ayat c koliput dingar)

    “aikkk.. rindu?? bukan laki urang sudah kah kau tu oii ulat.” (c koliput cakap-cakap di bawa kulung tu sulap. Sana sudah bawa kulung c koliput pigi masuk)

    “jap bah. Baru pun sa'malam tu sayang kasi puas.”

    “puas?? aikk.. apa bah durang buat di atas ni.” (koliput macam dapat tangkap saja maksud durang c ugou)

    “capat lah..” (ma'maksa lah bah c bulat sampai tidak pandai sabar)

    “ishhh.. jap bah.” (c ugou marah c bulat)

    “capat lah, ni yang tidak pandai sabar ni. Bodiri sudah ni.”

    “doiii.. sabar bah. Urang bulum lagi siap mau buka apa yang mau di buka.”

    “apa bah kamu buat sana atas tu ugou?.”

    C koliput cakap-cakap dalam hati sambil tingu tu lantai sulap dari bawa kulung saja. Macam mau nangis pun ada muka c koliput sebab macam dia tau saja apa durang c ugou buat di atas.

    Krattttttt... Nagkkkkkkk.. Krattt...

    To'lumpat saja c koliput bila tu sulap bo'guyang sama pandai bo'bunyi tiba-tiba. Tidak lama, c koliput dingar suara urang toriak-toriak sana atas. Jatuh bah air mata c koliput.

    Punya main sakit hati c koliput, hancur bah lop-lop c koliput bila dia tau sudah apa tujuan c ugou pigi kabun malam-malam. Dari pada c koliput kana kotut, dalam hati yang kociawa, c koliput jalan lah balik pigi kampung.

    “tidak apa lah ugou, kau tatap juga mau c bulat biar pun dia sudah kahwin kan. Bah, tidak apa lah. Dari sia jadi buduh mau kajar-kajar kau, biar lah sia kasi lupa kau sudah mulai dari sakarang.” (atuii..kociawa bah c koliput. Last-last c koliput akun kala di)

    “semoga kau bahagia lah ugou.”

    Akhirnya c koliput undur diri juga biar pun barat butul hati c koliput. Jatuh bah air mata jantan c koliput bila c ugou sanggup buat apa saja untuk c bulat biar pun c bulat tu laki urang sudah.

    Koliput sampai saja sana rumah urang kahwin, koliput pigi singga sikjap saja mau jumpa kawan-kawan baik dia baru c koliput pulang. Tidak sudah sanggup c koliput mau stay tampat urang kahwin, bikin tambah sakit hati lagi kakah.

    Koliput sampai saja di rumah, c koliput pigi mandi, baru c koliput pigi tidur. Nangis-nangis bogia c koliput mau terima kanyataan mau kasi lapas c ugou sudah.

    Ke-esokkan hari nya, koliput bangun saja dari tidur, punya lah bah main bangkak mata c koliput. Macam kici sudah dunia c koliput buli nampak pasal bangkak sudah bah mata c koliput dua-dua pasal ta'lampau manangis gia sa'malam.

    “aiii.. silaka butul ni mata. Napa di ni sampai macam ni.” (koliput cakap-cakap dapan cermin sambil gusuk-gusuk mata dia mau kasi hilang kunun tu bangkak)

    “aduiii.. macam mana lah ni kalau c mama nampak.” (garu-garu kapala sudah c koliput mau pikir kalau mama dia nampak mata dia, kompom kana kasi katawa gia)

    “aduiii... hilang sudah somboy sia ni.” (atuiii.. parasan lah bah c koliput ni mau akun-akun somboy bah)

    Tokk.. Tokkk...

    “aiii.. nasabalik ee tanak manuk.” (ta'malata bogia c koliput bila kana katuk tiba-tiba bilik dia)

    “aiikk.. silaka ni mulut.” (koliput tampar-tampar mulut dia sambil pigi buka pintu)

    “emmm.. napa tu ma?.” (koliput tanya mama dia sambil kunun kasi tunduk kapala)

    “aikkk.. mama ingat mati sudah kau tu.” (terus laju bah c koliput tingu mama dia)

    “atukkk kiooo.. kanapa di mama cakap macam tu?.”

    “tadi lagi mama katuk-katuk bilik kau. 1 biji suara pun mama tidak dingar apa lagi goruk kau. Tu cicak yang jawab mama.”

    “atukk.. atukk.. atukkk... amaaaa.. mama mau-mau lagi kah anak mama mati? Masi teruna lagi sia ni ma.” (sonyum-sonyum kunun mama c koliput tingu c koliput)

    “emm.. ya lah. Mama sakap saja bah tu. Napa di mata kau tu macam kana gigit panyagat?.”

    “ahhh.. anu ma. Kana kansing posisang kali ni.” (mama c koliput kasi be'kerut dahi dia)

    “kau pigi mana juga sampai kana kansing posisang?.”

    “duiii.. urang tidur lah bah di bilik bah.”

    “pigi dulu kau burus tu gigi bah. Aduiii.. karabau pun buli mati kana tu bau gigi kau.” (koliput kasi kici mata dia tingu mama dia)

    Koliput pigi tarik tuala mau pigi mandi. Sonyum-sonyum saja mama c koliput tingu c koliput. Koliput masuk saja dalam tampat mandi, koliput tingu lagi mata dia sana cermin.

    “jangan-jangan kana kotut bah ni mata ni.” (koliput cakap dalam hati saja sambil tingu cermin)

    “tapi, mana ada juga sia nampak apa-apa bah sa'malam. Galap juga pun tu di bawa kulung. Ahhh.. bagus sia mandi.”

    C koliput bosiram-siram lagi mau mandi, malas sudah c koliput mau pikir pasal hal sa'malam sama mau pikir pasal c ugou. Siap c koliput mandi, koliput keluar dari tampat mandi, sampat lagi c koliput pigi singga minum kupi mama dia sebelum mau pigi pakai baju.

    “hiti tanak tii!!.” (mama c koliput marah c koliput)

    “tudu poh bah ma.. jangan luki. Nanti kasadu sia pigi bilik.” (alasan c koliput)

    “kalau mau ambil sondiri bah!.”

    “ishh.. luki lah bah c ama. Sikit saja bah.”

    “banyak lagi pun tu dalam kili. Mama sudah mahh ludah-ludah tu tadi.” (terus c koliput tingu mama dia sambil kasi keluar balik tu kupi dari mulut dia)

    Pokkk...

    “mulau noh tii tanak!!.”

    “amaaaa... adauiiii.. amaaa... ba-balah sudah di kapala sia amaaa..” (c koliput pigang kunun kapala dia sambil duduk mancangkung lapas kana katuk pakai sudu sayur)

    “omm.. kotoh!! siapa di suruh mau buat macam tu gaya! Eee.. bobulu sudah kama kau tu oliput, tapi tu gaya macam yang bulum bobulu.”

    Koliput bodiri di mau jalan pigi bilik. Malu terus c koliput bila mama dia kasi ingat dia tu bobulu sudah, bukan lagi budak-budak guntilon.

    Siap c koliput pakai baju, koliput pigi masuk balik di dapur mau sarapan. Sikit mau ba-sambung kudou bapa c koliput nampak mata c koliput kama.

    “aikk.. aikk.. aikkk.. kanapa di mata kau tu oii oliput? Kau pigi subuk sumandak kansing kah ni?.”

    Paranggggg..

~ Bersambung ~