Sinta C Koliput

Part 11

~ Sinta C Koliput ~

By : Tescy Descy

Cerita Rekaan

    ~ Part 11 ~

    “apa ayat power mau pakai ni ahh bikin ayat-ayat c mandak di bawa ni.” (mula sudah c koliput mau cari ayat sinta dia dapan cermin)

    “haii.. mandak, siapa gia nama kau tu?.” (c koliput cakap dapan cermin kama sambil buat kunun muka macoh)

    “ishh.. macam c taik saja tu gaya. Haii.. mandak, nama sia c koliput.. aaa.. silap. Mulau kau ni oliput. Okey 1, 2, 3.. haii mandak, nama sia edward, tapi panggil saja lah ed.” (koliput pigang kakah dagu dia sambil angkat-angkat kudou tingu cermin)

    “ishhh.. ni lah ni sitaring c mama ni. Macam mana lah mau ada sumandak ni ama, mau ayat sumandak pun buli lari juga anak karabau dingar.”

    Malas sudah c koliput mau minta puji dapan cermin, c koliput sonyum-sonyum saja jalan mau pigi buka almari baju dia mau cari baju yang samat-samat sikit bikin pakai lapas siap mandi kakah boh.

    Macam lagi c koliput shopping baju di kadai bogia, bah, semua pun c koliput pigi cuba baru dia tingu di cermin gia kalau samat tu baju dia pakai karang. Sampai c zul siap mandi pun c koliput tidak sadar c zul bo'diri di pintu sambil tingu c koliput posing-posing masa c sot saja sana dapat cermin.

    “emm.. tu lawa sikit ed.” (koliput pusing tingu pigi pintu terus mira kama muka c koliput)

    “aikkk.. kau bila lagi bo'diri sana tu?.” (cover malu sudah c koliput)

    “dari yang kau pakai tu baju kuning tu lagi.”

    Koliput tingu tu baju-baju botimbun sudah di atas katil, baru c koliput parasan, habis sudah semua tu baju di almari dia pigi cuba bogia. Tu baju kuning maksud c zul, baju yang ke-5 c koliput pigi cuba, yang sekarang punya baju c koliput pigi cuba, yang last sudah tu baju c koliput ambil  di almari.

    “dah kanapa kau ni ed sampai malam-malam macam ni mau cuba baju, mandi pun belum.”

    C koliput senyum-senyum saja sambil buka balik baju yang dia pakai baru c koliput tarik tuala mau pigi mandi. Koliput tidak layan c zul, cover malu kunun c koliput tu.

    Sekali c koliput masuk saja dalam kamar mandi, barabis lagi c koliput tarik napas mau buang semua malu dia sana lubang jamban. Barabis juga c koliput maki-maki dapan lubang jamban pasal ka'dapatan.

    Siap saja c koliput mandi, c koliput pikir c zul sudah turun. C zul duduk-duduk di katil c koliput sambil main gitar c koliput kama. Koliput kasi biar saja c zul be'jiwang sambil main gitar sambil manyanyi kunun dia.

    Siap c koliput pakai baju, palan-palan c koliput simpan balik baju dia dalam almari, c zul tulak pinggang sudah tingu c koliput. C koliput manghayal sambil kamas baju-baju dia balik.

    “ed, jum lah turun.” (koliput pusing tingu c zul)

    “aikk.. kau masi cni lagi kah pula tu zul?.” (punya lah soalan bonus c koliput tanya)

    “kau ni dah kanapa? Jum lah turun.”

    “turun lah kau bah.”

    “malu aku. Mari lah.”

    “apa mau malu? Bukan kau tu kaki mau kasi kana sumandak kah tu?.”

    “ni hari aku tobat dulu. Jum lah.”

    “aduiii.. ya lah.”

    Last-last c koliput kasi tinggal saja baju-baju dia. Koliput ikut juga c zul turun. Durang c koliput sampai di bawa, c joe ngam-ngam baru sampai, punya panjang senyuman c koliput sama c zul.