Sinta C Koliput

Part 18

~ Sinta C Koliput ~

By : Tescy Descy

Cerita Rekaan

    ~ Part 18 ~

*******************************

*** 2 Tahun Kemudian ***

    C koliput terus kan kehidupan bujang dia macam biasa. Sajak c koliput putus tunang, c koliput kasi sibuk sudah diri dia sama karaja. Tidak sudah c koliput mau pikir pasal sinta-sinta, mau ikut jajal kawan-kawan dia mau susi mata tingu mandak-mandak pun c koliput tidak mau sudah.

    Masa kerja, c koliput fokus saja buat karaja dia tanpa pikir pasal masa dapan kakah boh. C koliput be'sara saja juduh datang dari tuhan, malas sudah c koliput mau angan-angan cari sumandak.

    Sajak c koliput putus tunang, c koliput tidak sudah perna balik kampung lapas 2 tahun. C ugou pun sudah c koliput kasi lupa, ada 3 anak sudah c ugou, kahwin juga gia c ugou sama c bulat.

    Tapi tu saja lah, di kampung saja lah c ugou, c bulat masam tu juga, logop, karaja pun malas, c ugou saja lah yang tulung-tulung mau cari duit dari hasil tanam sayur sama jual kuie di kampung.

    Masa durang c ugou mau bayar c koliput balik sama mau bayar sogit kampung baru mati-mati c bulat pigi putung gata, sudah c bulat bayar semua dia balik lagi gaya logop dia, tapi makan balanja bulum lagi c bulat kasi keluar, kahwin koboy saja durang.

    Paling c koliput kesian, bila c koliput tau pasal anak kambar c ugou, dua-dua lumpuh sama cacat. Anak c ugou yang kici yang kira ke-3 tu ada sakit. Semua sebab kodou tulu c ugou juga gia tidak mau dingar cakap yang dia sama c bulat tu panas, tidak buli kahwin.

    C koliput move on sudah butul lapas dia sudah putus tunang. Tidak sudah perna bayangan c ugou datang-datang kacau c koliput. Sumandak yang pigi kuntik-kuntik c koliput, tapi c koliput tutup sudah kakah hati dia mau bo'sinta.

    “bah ed, kau sudah siap kah?.” (tiba-tiba c zul masuk bilik c koliput)

    “siap sudah ni.”

    “bah, jangan kau lupa bawa kan aku ikan sungai yang kana jerut tu k.” (tu bosou maksud c zul)

    “buli bah. Kau jaga ni rumah bagus-bagus.” (pasanan c koliput kama)

    “aikk.. mesti lah bah. Kau balik cni, harap-harap kau dapat lah sumandak baru ya.” (koliput kasi miring mulut dia sambil tingu c zul. C zul senyum-senyum saja)

    “tiada lah ni zul. Malas mau pikir dulu.” (c zul pigi kambai bahu c koliput)

    “jangan macam tu bah ed. Yang sudah lalu, kasi lupa saja. Jangan sebab itu kau terus tidak mau bagi peluang sama yang mau kau. Ramai juga tu aku nampak yang mau kau, tapi kau tu saja tidak mau. Orang tu sudah ada hidup sendiri ed, kau bila lagi, takan kau mau dia tau kau terus tutup hati kau sebab dia.” (pak nasihat ni c zul. C koliput senym saja tingu c zul)

    “tingu lah zul. Kalau ada, ada lah ni. Kalau tiada, biar lah sia pikir cari duit dulu. Sia mau kasi sinang dulu mama bapa sia ni.”

    “kau tu ed. Kau tidak jeles kah tingu kami ni semua pun ada pasangan.” (koliput senyum sambil giling kapala saja tingu c zul)

    “buat apa mau jeles ohh.. masing-masing ada pilihan bah.”

    Senyum-senyum saja c zul, c zul pun tidak tau sudah macam mana lagi dia mau pujuk c koliput supaya mau bo'sinta balik. C zul pula yang susah hati tingu c koliput tutup hati mau tingu perempuan. Banyak sumandak yang c zul mau kasi kanal c koliput, tapi tiada sudah lop-lop di mata c koliput.