انتقام

1

كعدت من نومي مثل كل يوم وبدون صوت المنبه
وليش احتاج منه واني افز من نومي كل ساعة
مو من سنة وسنتين هاي الحالة
صارلها 6 سنين
6 سنين مرت وإني ماكدر انام مثل الأشخاص الطبيعين ياترى اني شخص طبيعي حتى انام مثلهم ؟

بعد ماكملت تبديل باوعت بنفسي بالمراية كل شخص يشوفني مصار يعرفني تغيرت الناس عبالهم تغيرت بس كشكل وتصرفات ميدرون حتى قلبي تغير
قلبي الي مجان يعرف الكره بيوم صار يكره ويحقد صار ميعرف يحب

نزلت جوة كالعادة متريكت
فتحت سيارتي وركبت
اخذتني الأفكار بس قاطعني صوت التلفون عرفت المتصل من غير مااباوع
من يتصل علية مثلا غير صديقتي الوحيدة الي أعرفها الوحيدة الي صادقتها من بعد الصار ومصادقت غيرها
ماعرف اصلا ليش صادقتها يمكن لأن هي الوحيدة الي متسألني ليش ولا فد يوم سألتني وين تردين توصلين تمشي وياية للنهاية جنت اني الي احجيله وهذا الي جنت محتاجتة حياة بدون أسئلة
شلت التلفون وأجاني صوتها
ريما: ها وين صرتي
جمانة : طلعت من البيت وانتي ؟
ريما : ها اني هم حطلع من البيت
جمانة : تطلعين من البيت لو هسة كعدتي من النوم
ريما : لا مو هسة هسة يعني قبل شوية
جمانة: وشكو مخابرتني روحي كملي اني قربت اوصل
ريما : ماشي عندي هواية أخبار الج
جمانة : ياساتر من اخبارج
ريما : مو صوجج صوجي جايبتلج أخبار تفتح النفس
جمانة : نشوف اذا تفتح لو تسد النفس يلا روحي كملي خلصيني
ريما : ماشي ماشي افتهمنا باي
جمانة : باي

بعد 30 دقيقة
وصلت المطعم الي متفقين اني وريما نتريك بي
ركنت السيارة ونزلت

باوعت داخل المطعم أغلبه عوائل أو لمة أصدقاء أو صديقات
اختاريت طاولة لنفرين وكعدت عليها
انتظرت ريما تقريبا 25 دقيقة هاي عود بيتها قريب كلش من المطعم هاي الفترة ضليت اباوع بيها للموجودين
العائلة والجو الحلو الي بينهم
الام وهي تمسح فم ابنها الي تلطخ بالأكل
الصديقات وهمة ياخذون سيلفي سوة

قاطعني صوت
ريما: اني جيت
جمانة: تاخرتي
ريما : لا وين هي كلها خمس دقايق
جمانة : يي صح خمس دقايق
ريما : كومي نجيب أكل ترى ميتة جوع
كمت وياها وبدينا نملي الصحن
خلصنا ورجعنا للطاولة
بدينا نأكل
ريما : شوكت حتبدين
جمانة : قريبا لأن عرفت كل المعلومات الي احتاجها عنه
ريما : خايفة عليج خاف يعرفوج
جمانة : لتخافين مستحيل يعرفوني شكلي تغير عن قبل 6 سنين انتي ملحكة على 5 سنوات شكلي بالأول كلية مثل شكلي هسة
ريما : لا مو نفسه سنة عن سنة احس ملامحج تصير حادة أكثر مدري ليش اما من تلبسين العدسات الزرك فشكلج يتغير 180 درجة
جمانة : لعد شكو خايفة
ريما : مادري خايفة عليج منهم
جمانة : لتخافين اني اليوم اكدر اواجهم لو تسأليني عن نفسي قبل سنة أكلج لا بعدني بس هسة مستعدة الهم
ريما : الله يستر
جمانة : متفقة وياها نلتقي اليوم مو
ريما : يي طبعا متفقة خابرتني الصبح كالت انتظركم

كمنا اني وريما ركبنا سياراتنا ورحنا لبيت ريما ننتظر الوقت يصير

اول مدخلنا الكراج شفنا حسام ديطلع سيارته
اول مشافني كال
حسام : ها من صباحية الله يمنا
الله يستر شتخططون من الصبح ولا ارتاحلكم انتو الاثنين
جمانة : توكل وروح لشغلك لدوخنا من الصبح
حسام : اني الي ادوخج لو انتي الي من الصبح شوفتيني خلقتج بلا بربج الي يصبح بهاي الخلقة الي تقطع الرزق شيتأمل من يومه
جمانة : شيتأمل غير كل خير
حسام : لا واضح كل الخير
ريما : ها حتتكافشون كالعادة
جمانة : لا امشي ندخل ماجاوب هيج ناس اني
حسام : شبيهم هذولة الناس انجلينا
طبيت للبيت وعفته
حسام يصير أخو ريما الكبير
يمكن هو الولد الوحيد الشاب الي اتعامل ويا نوعا ما عادي صح اغلب شي نتعارك

صعدنا لغرفة ريما
جمانة: ساعة بيش نروحلها
ريما : ب 1
جمانة : يعني بعد ساعة
ريما : حنام بين ميصير الوقت
جمانة : اني معاجبني انام
ريما : وإني شعلية بيج
جمانة: احجيلي شخبارج وية اياد
ريما : كالعادة لا جديد عساس متعرفينا لو مو كبالج 5 سنين
جمانة : يي حافظتكم بس يعني شصار وية امه بعدها مصرة
ريما : بعدها بس هو ديحاول يقنعها بس مادري خايفة خاف تبقى معندة
جمانة : لتخافين مادام هو ميتخلى عنج
ضلينا نسولف لحد ماقرب الوقت
نزلنا جوة شفنا ام ريما
ام ريما : ها بنات وين رايحين دا اطبخ متتغدون
ريما : لا رايحين يم صديقتنا
أم ريما : صديقتكم؟ معقولة منكم من الشيطان عدكم صديقة
ريما : ليش متدرين مو قررنا نصير ناس اجتماعيين
ام ريما : الله يستر منكم
جمانة : ها خالة حتصيرين مثل ابنج
ام ريما : لا ماصير بس مدري شغلة الصديقة الجديدة مخوفتني
جمانة : لا خالة لتخافين ماكو شي
طلعنا اني وريما متوجهين لبيتها
سألت ريما
جمانة : متأكدة هو مو يمها ماريد يشوفني
ريما : طبعا متأكدة لتخافين ميجي البارحة الليل كلة يمها
جمانة : الليل كله كتيلي ماشي بيها الخير

كانت ريما الي تسوق بسيارتها واني عفت سيارتي ببيتهم لأن هي تندل البيت
ورا شوية وصلنا لبيت فخم وضخم
نزلنا دكينا الجرس......