#حـيـاة_شـلـتـوت
الـحـلـقـة (1)
گـتـابـتـي #Koka_Saleh
:::::::::::::::::::::::::::::::::::::::::::::::::::::
ماتنسنش اللايك قبل القراية والتعليك برايكن وتوقعكن بعد القراية والكلام للكل بنات😍
:::::::::::::::::::::::::::::::::::::::::::::::::::::::
قصتنا بدت من حوشنا حوش الحاج موسى الراجل الطيب والاستاذ الفاضل اللي مطلع اجيال من تحت يده اللي دكتور واللي مهندس واللي محامي كان ونعم الاستاذ استاذ في اللغة العربية وتوا عدى للتوجيه وقعد موجه معروف
الحاج موسى عطاه ربي عيلين وبنتين وتوا اتعرفو عليهم بعد اشوي
اليوم في حوشنا الكل واعيين بدري من الساعة 5في الصبح اكيدة مستغربين عليش واعين بدري ماهو اليوم العيد الكبير عيد الاضحى والناس توعى قبل صلاة العيد اتعيد علي بعضها وايوتو ارواحهم للصلاة وبعد ايروحو مالصلاة جو الذبح والشواية
طبعا هلي كلهم واعيين ماعادا نا 😏
واشوي وتوا ايجو يسكنولي اوعى ياصدام اوعى ياصدام اتقول اكسجينهم ومايقدروش ايتفسو بلايا 🙄
امغير كان ايخلوني منخمد 😂
خطرها مالحاجات اللي حتعرفوهن عليا اني خميرة نوم غير اصبرو بس🤣
في الكوجينة وتحديدا عند عمتكم عالية مرات عمكم موسى
عالية:ملوكة سلم بنيتي عدي وعي خيك خليه يمشي مع باتك وياسين الصلاة العيد
ملاك:وحق ربي وعيته مابش يوعى وسيبت عنده رهام اتوعي فيه
مع خشت رهام تندب
رهام:وووووه وووووه عليا نا
عالية بخوف;بسم الله كنك
رهام:معقولة النوم اللي عند صدام كان انوعي في ميت راه وعى مني
ملاك:وحق ربي صدام كذاب ايدير في روحه مايسمعش فيك وانتي اتوعي وهو يسمع في كل حاجة
رهام:نومه ثقييييل بككككل لو انفجرو جنبه قنلة مايوعش
ملاك:وربي اطروح نا اكثر وحدة عارفته 🤦♀️
عالية:نا عارفته هذا مايوعش من حد الا مني توا نمشي انوعيه
رهام:كان ماهذا خلوه راقد فكونا من هرجته عالصبح
عالية:باتك قبل مايطلع للكوشة وصاني انوعيه عشان يمشو مع بعضهم الصلاة العيد
رهام:دبين الحكاية فيها بابا معناها وعيه خير
عالية:حتى نا ماشية بنوعيه توا وطلعت مالمطبخ
ومشت شور المربوعة اللي نا راقد فيها واول ماخشتلها انفجعت عاد نا امخليها الهم مربوعة اعديكن بنت الدخان والصالون الي حايس علي بعضه خاطي طفايات الدخان اللي كل وحدة في تركينه وزيدها اخرى شيش مية فاضيات وقشور زريعة عالية اقعدت قريب تندب في المربوعة 🤣
عالية بصوت عالي:صدام نوض صدااام
نا ولا كأني نسمع
قعدت أمي اتحل في رواشن المربوعة وساكنة اتوعي فيا ونا ولا نا هنا نووووووم 😴
بعد قريب 10 دقايق توعاي امي غمتلها مني بكككل
عالية بعصبية:صدااااام نوض وخلينا انضفو هالزريبة اللي قاعد فيها😡
أنت تقرأ
حياة شلتوت🤣
Humorقصتنا بالهجة الليبية وتحكي علي شاب عايش حياته بإستهتار كامل ولا نفع في قراية ولا نفع في عمل بالمختثر فااااشل امكمل حياته في تفاهة دائمة وامكملها ضحك ومش معدل علي شيئ ولاايفكر في حاظر ولا مستقبل بس حيصيرن امعاه بعض الاحداث اللي حيقلبن حياته رأس على...
