خيالي

البارت 6

بارت مفاجأة ..

صباح الامل ..
خيالي ..
البارت 6 

أسمي آسر .. مواليد 1990 .. عندي اثنين اخوان اكبر مني .. الوالد اصله سيد موسوي اهله معقدين بموضوع الزواج و مياخذون الا كرايب لان ساده ..

جان والدي عايش ببغداد يدرس طب عام بجامعته شاف امي و حبها و تزوجها رغم اهله رفضوا و حذروه يتبرون منه بس تمسك بامي و صدوك نفووه من العشيره ..

كون نفسه وحده .. كبرت و اني اشوفه شلون يحبها .. مفديوم أذاها عيونه جانت فاضحته و امي تبادله نفس الشعور ..

بيوم جانو اخواني بايتين ببيت جدي بس اني ويا اهلي .. دخلوا على البيت ملثمين و كتلوهم كدام عيني واحد بيهم كال مراح اكتلك بس هاي اللحظه مراح تروح من بالك ..

و صدك هذا الي صار .. ميروح من بالي منظرهم .. نظرات والدي و عيونه على امي و نظرات امي الاخيره جانت عليه ..

هذا اليوم حولني من طفل مدلل الى طفل كاره الكل غضب على كره .. فقدت النطق فتره .. رجعنه للبصره ..

جنت بعيد عن الكل وحدي عايش حابس نفسي بغرفه ظلمه مااحب ضوه الشمس يدخللها .. اخواني حاولوا ويايه خصوصا اخويه الكبير ثائر بدون فايده ..

بعد ممر ستة اشهر على وفاتهم بيوم نفسي ضاق بعد مكدرت اتنفس رحت لثائر ابجي ماكدر اتنفس جانت اخر مره تنزل بيها دموعي ..

بيومها صار عندي ربو مزمن رجعت لغرفتي و للظلام صارت السنه مال اهلي ورحنه للنجف نشوفهم كلها تبجي الا اني مكدرت حاولت ابجي حتى ارتاح بس مكدرت مرت سنتين و اني نفس حالتي ثائر نفذ صبره مني و جبرني اداوم ..

بس خلي اوضح شغله على السنتين الي تركتهم السنه الاولى راحت عليه و الثانيه جانت واحد من كرايبهم مدير المدرسه و بس بالامتحانات الفاينل اروح امتحن و نجحت عبروني سنه ..

رجعت اداوم سنه جديدة .. مسيره دراسيه  فاشله .. صرت انسان فاشل .. كل شي   مؤذي سويته .. كلشي يأذي اخواني سويته ..

كبرت و الكوابيس متركتني كلام الرجال الملثم ميروح من بالي ماكو شي يريحني غير الادويه الي جنت اخذها تخليني انام براحه..

صرت اعداديه و اني نفس أذيتي و زياده اخواني كلهم وصلوا .. حتى اتزوجوا و صار عدهم اطفال .. و اني بعدني نفس مكاني متغير شي بيه بس زياده فشل  و أذيه ..

همه هم بدوا يملون مني و كلمن حار بحياته و مشاكله .. بيوم شافني ثائر بالشقه ويا اصدقائي شارب و حتى ماخذ مخدرات جنت بغير عالم ..

لزمني ضربني ضرب بيومها بالكوه كدروا يفكوا عني اكتشف اني مدمن على ادويه .. كدروا ينظفون جسمي منها بعد معانات ..

رجعت ادرس بس هل مره متركوني جانو دائما ويايه طلعت معدل يقبلني صيدله ببغداد و ردت اروح اخواني رفضوا خافوا ارجع لسوالفي .. بس اني جنت مقررو مصر و رحت لبغداد ..