خيالي

البارت 7

مساء الگاردينيا

البارت 7
خيالي ..

اتصل على فوني  رقم غريب ..

-الو ..

سمعت صوته .. صوت اسر رأساً كال ..

-انخطبتي ؟ ..

انصدمت ..  صارلي تقريباً سنه مسامعه صوته .. بصوت عالي كلش صاح ..

-احجيي ..

فززني ونزلت دموعي لااراديا مثل واحد مختنگ وشهگ النفس هيج اني من سمعت صوته  مجاوبته سكتت بس اجر النفس واذبه وهو يسمع .. اعرف هو يسمع واني هم جنت استمع لانفاسه .. بعدهي ثگيله .. بعدة بصعوبه يجر النفس ظلينه ساكتين بس عبالي راح يعاتبني عبالي يرزلني بس هو ..  .. حرفياً هيج نطقها ..

- (يمكن متصدكين بس اني بحياتي مطالب من رب العالمين شي بس هسه من كل گلبي اتمنى ربي  يحركج بنار تشبه ناري و حركة گلبي ) ..

من سمعت دعائه قشعر جسمي و رجفت خوف منه  و من دعائه يحجي بحرگة قلب .. رجعت ابجي بهستيريا  و مثل الي رجعت لنقطة الصفر حسيت وكأنه اول يوم تركته لآسر انعادت .. انعادت نفس المعاناة .. نفس الذكريات ووحشه الليل بغياب صوته عني .. روحي الخاويه .. عيوني العطشانه شوفة ضحكته ..
كولشي انعاد وبأسوأ من قبل .. شعور يقتلني واني بعدني اتنفس ..

ظليت افكر آسر منين حصل رقمي .. محد عنده رقمي بالدوام غير حنين .. ليش سألني مخطوبه .. خابرت ؏ على  حنين ..

-دتتواصلين ويا آسر ؟ ..

بين عليها الارتباك من كلامها ..

جاوبتني ..
- لا ..

-شَــلون لا .. خابرني اليوم منين جاب رقمي غير منج ..

ظلت ساكته..

- انتي كايلتله  مخطوبه ؟ ..

متجاوبني .. صحت بيها ..

واخيرا نطقت ..

- اي  اني .. الفتره القبلها من جنتي تحجيلي عنه وشيسويلج وشلون يحبج كولش حبيته و كتله نماء انخطبت .. انتي مو متريدي خلصتج مَــنة عوفيني اني  اكسبه الي و اخليه يحبني ..

ظليت ساكته مصدومه صديقتي المقربه هَــيچ سوت .. سديته منها بدون و لا حرف نطقت .. اللّٰـه نزل عليه  هدوء مو طبيعي .. ظليت اذكر كل الحجي الي حجيته الها  ..

اللّٰـه اعلم شملفقه عليه بعد .. شكايلتله وشمكذبه عليه .. ظليت بالفراش مختنكه .. نمت ..

فزيت  ..  شي بارد على راسي .. فتحت عيني .. جان  تقريبا ليل و امي و فهد فوك راسي ..

جنت ارجف حرفيا من البرد  فهد يكول لامي خلي اخذها للمستشفى ينزلون حرارتها .. امي كالت لا هَــسة تفك ظليت اغفى و افز ..