شهد الصعيد

الفصل الرابع

الفصل الرابع

الفصل الرابع

الفصل الرابع
شهد: أنى كفيت اهنيه رش وذهبت إلى أبيها ونادت عليه .... يا بوي فينك
يس: منك لله ي بعيده حيلى اتهد ورجلي معحسش بيها واصل
شهد: هات عنيك أنى عكملو الجهه دي بس بوي وينه .....
يس: وي وي عتكملي مكانى ليه صنعتك إيه ي بت عمى كانو بيرضعوكى حديد
شهد: الله أكبر عليا عتحسدنى إياك هات عشانى اكفي الجهه دى وبكده نعاودو جبل العتمه
يس: خدى وماله صحتك جميله ومتعافيه خدى وهملينى اهنه اريحو هبابه
شهد: ههههههههههههه يعينى على الشباب وياويلها الي عتتجوزك دى
يس: ليه بجى ي ويلها ليه دى يا سعدها كله الي عتتجوزنى
شهد: واااا كيف وأنت تعبان أكده يوم الفرح لما تجولك شيلنى عتجولها تعبان وتهملها
يس: اشيلها ليه اشلت إياك متطلعو لوحدها ده جلع بنته اشيلها يوم الفرح واشيلها العمر كلياته فين الصحه الي تساعكم جاتك الهم ي بعيده عولتينى هم المشال
شهد: ههههههههه هات خلينى اكفي الرش اهنه وأنت ريحو رجلك واوعاك تنعس
يس: الي يعرفك ينعس كيف ده انتى كيف البابور ي ويله الي عيتجوزك انتى .....
عيد: للغفير انى خلصت اهنه وإن شاءالله الزرعه تصح وتتعافي ربنا يسترها
الغفير: متجلجشي ي عم الحج إن شاء تصح وتتعافي وتسد م عليك أنت طيب جوي وكمانى شيلت  دين الفلاحين عشانى جاسر بيه الظالم ميخربشي بيوتهم ده راجل ظالم وليه يوم
عيدالزياد: بكفياك عاد وهم نخلصو رش ولا نسيبو شغلنا ونجعد كيف الحريم ونتسامرو
الغفير: لع ي عم الحج عخلصو أنى اهنه وزمنات بتك تعبت الحمل تجيل جوى روح عنديها ي عم الحج وطول عليها وكمانى يس بيه مالوش فى شغل الغيط واصل أنى عخلص اهنه ومش هعوج عليك واكمل رش مكان بتك
عيدالزياد: أنى رايح عنديهم وأنت متعوجشي وتعالي ورايا طوالي وذهب عيد الي ابنته ووقف ولم يصدق ما يراه فهى تحمل انبوب الرش على ظهرها مثل الرجال وتعمل بكل همه
عيد الزياد: بكل حب وفخر لابنته ربنا يحميكى ي بتى وتقدم نحو ابنته كيفك يا بتى
شهد: الحمد لله مليحه جوى أنى كفيت اهنه وخلصت رش
عيدالزياد: ولد عمك يس وينه عاود على البيت
شهد: لع جاعد اهااا تحت الشجرة رجله وجعته ما أنت خابره زين معيحبش شغل الغيط واصل وأنى كملت هو فى حاجه محتاجه رش تانى أنى اكملها
عيد: لع ي بتى وهمى خلينا نروحو عوجنا جوي على امك وكمانى انى جعان تعالي ناخدو يس ونعاودو
شهد: هم بينا يا بوى .....
عيد : يس ي ولدى يلا عنروحو وابجي ريحو فى البيت
يس: هو إلي يعرف بتك يرتاح دى رشت الجهه دى وكمانى كملت مكانى تجولشي كيف البهيمه الي رابطينها فى الساجيه (الساقيه)
شهد: أنى بهيمه شكرا بس افتكر إنك البادى واوعاك تزعلو من الي عسويه فيك
يس: لع أنى غلطان جولها ي عمى بس همى أنى جعان جوي عصافير بطنى زعلانه
شهد: أنت حداك حنش فى بطنك مش عصافير همو بينا ي بوي ليهبرنا وأنا وياك
عيد: ههههههه الله يحظك ي شهد
جاسر: اضحكو النهارده وكلها يومين وأنى إلي اتضحك عليكم بكرة تاجى حداي ي بت عيد وانتى بتبكى والله لازلك ......
وفيه: ياسمين هنيه فينكم ي بتى تعالو اهنه .
هنيه: أنى جيت اهاا يا مراه عمي عاوزة حاجه نعملوها معاكى
ياسمين: نعم أنى جيت كنت بذاكر واوعاكى تجولى جطعى بصل أنى عينى باشت منيه
وفيه: وااااا مالك كيف البابور اسكتى عاد معرافشى انطج وياكى ..
ياسمين: جولي يا امى زعجتيلنا أنى وهنيه وأنى واجفه اهاا جولي .....
وفيه: والله مخبراشي نستينى ي بت عيد كنت عاوزه منيكى إيه خربطيلي عجلي
هنيه: بتك واعره جوى عملت أكده عشانى تنسي بس أنى خابرة زين يلا ي همى ي بت عمى وجطعي البصل ده زمنات عمى معاود
ياسمين: وااااا امى نست عاد اطلعي منيها وبكفيانى جطع البصل ده ولا اجولك جطعيه ي هنيه عشانى عينك تحلو وانتى عينك نعسانه اهو تصحصي ويانا. همى حبيبتى الله يعينك
وفيه: لع متجطعوش البصل أنى عوزاكى تطلعي للطير وتوكليه وتكنسى تحتيه ...
ياسمين: اماااا أنتى بتحدتينى أنى ولا هنيه
وفيه: بحدتك انتى ي بتى همى وبطلي كتر حديت
ياسمين: أنى اطلع اكنس للفروجه ( الفرخه) ده أنى معكنسى اوضتى والله اهشهم وارتاح منيهم ياكلو ويهرو ميعرفوش يظبطو حالهم وهما مبرطعين أكده اجولكيش ي أمى تاجي نلبسهم كيس عشانى ترتاحى
وفيه: واااا كيف ده تلبسي للفروجه كيس والله ي بت عيد طيرتيلى نافوخي ومخبراش اتحدتو وياكى أنى عارفه عتفتحى بيت كيف ونهملك لحالك
ياسمين: معفتحش أنى بيت أنى ي دوب افتح باب العشه واطيرلك الفروج ده وأنتى ترتاحى وانى كمانى عرتاح
هنيه: تعالي أنى عطلع وياكى وبطلي رطت فاضي
ياسمين: حبيبه جلبي بت عمى اطلعي وأنى كمان ساعه اجى  اطول واكنس للفروج
وفيه: واااا وامسكت العصي وخبطت ياسمين وجعتى راسي ي بعيده ومفهماشي منيكى ايتها حديت جومى يلا اكنسي للفروج وبعدها تدخلي السعي ( الماعز والخرفان) فى الكارا ( الزريبه) وسكى عليهم واوعاكى تنسي تحطى حشيش همى لسه جاعده
ياسمين: واااا اعتبرينى من السعي ده وطلعينى اوضتى واحبسينى ومعنزلش غير على الوكل ولا اجولك طلعو الوكل حدايا جلعينى كيف الفروج ولا كمانى السعي ده
هنيه: ههههههه كان زمناتك خلصتي وأنتى عماله ترطى بحديت ممنوش عاذا اطلعي للفروج وأنى عندخلو السعي
وفيه: ربنا يحرسك يا بتى انتى عتتبي أكده وأنى عوزاكى تجعدى ترتاحي
ياسمين: امااااا هو أنى بتك ولا لجيتينى عند الجامع ...
وفيه: لع لجيتك عند الترعه (المصرف) وحنيت وجبتك تكنسي للفروج وتجطعي البصل وخبطتها بالعصي
ياسمين: بكفياكى ضرب أنى حساسة جوى راعى أنى آنسه وجميله
شهد: السلام عليكم ورحمه الله وبركاته
وفيه والبنات: وعليكم السلام ورحمه الله
شهد: مال حسك عالي ي أمى ....
وفيه: خيتك دى مخبراشي عاذتها إيه معتعملشي ايتها حاجه إلا وخربطتلى نفوخي وتوجعلي جلبي .
شهد: ياسمين مكدرة امك أكده ليه ....؟
ياسمين: أنى معملتش أيتها حاجه أنى عطلع ألبس الفروجه اكياس عشانى متبرطعش بعد ما اكنس وانزل احبس السعى واحطله محشي ومخلل عشانى نفسه تتفتح ...
شهد وهنيه: ههههههههههههه واااه محشي ومخلل الله يحظك وعاوزة تاكليه محشي كيف
ياسمين: عشانى أمك تسمنهم والمحشي بيسمن ....
وفيه: همى ي بت خلصي على ما اسخن الوكل وأنتى ي شهد ي بتى بوكى فينه معودتشى  وياكى
شهد: لع هو ويس فى المجعد البرانى ومشيعنى علشان نحطو الوكل وأنى عتحمم وانزل طوالي ......
هنيه: وأنى جايا معاكى ي مراه عمي ......
عيد: يس ي ولدى جوم غسل يدك ولا اجولك اجيبلك غيار وتتحمم عشانى تفوج وتعرف تاكل
يس: والله بتك دى كيف الصخر لع وكمانى عاوزة تكمل رش صنعتها إيه دى
عيد: ههههه بكفياك ي ولدى مجدرش اضحك منيك طول الطريج وأنى بتضحك والعالم بيطول عليا وتلاجيهم يجولو عليا جنيت
يس: معاذا الله ي عمي أنى إلي جنيت أنى اطاوع بتك ولا أروح وياها ايتها موطرح وأمسك يس رجله وظل يدلكها 
عيد: هم اتغسل بجى واااا وأنى كمانى عروح اتحمم واجيلك طوالى
يس: روح ي عمى وأنى جاعد اهااا وشويه أكده واتغسل أنى كمان....
وفيه: هنيه ي بتى طولي عليهم أكده خلصو واتحممو ولا لع عشانى الوكل ميبردش
شهد: أنى جيت جولي اعملو وياكى إيه ي أمى
وفيه: ولا حاجه أنى خلصت بوكى فينه فى المندرة ويا يس
شهد: لع بوى بيتحمم إحنا رشينا الغيط كلياتها وإن شاءالله الزرعه تتعافي وبوي يسد م عليه
وفيه وهنيه: اللهم امين
يس: بينادى يا مراه عمي ..مراه عمي
وفيه: تعالى ي ولدى واااااا مالك عاد مجدرشي تمشو أكده وبتعرج ليه
يس: بتك المؤذيه دي أنى اشيل انبوب وارش أرض تعرفي عنى أنى أكده
وفيه: لع أنت مالكش صالح لا بالغيط ولا برويتها وطول عمرك بعيد جوي
يس: بتك بجى جربت البعيد اجول فيها إيه بتك عاد يلا كله بثوابه بس عاوز اكل جعان جوي
شهد: واااا اتحمم الأول جسمك كله ويدك عليها مبيدات سامه أنى عجبلك لبس من حدا أحمد خوي أنتم زى بعض هبابه واعاود
عيد: يلا ي أم أحمد حطى الوكل وشهد فينها
هنيه: شهد اهى اجت
شهد: أمسك الغيار اهاا وادخل اتحمم عجبال ما نرصو الوكل
يس: نظر حوله واااا امالي فينها ياسمين مجعداش امعاكم ليه .....
شهد: هى بتكنس للفروج زمناتها نازله ولا تلاجيها بتحبسو السعي
ياسمين: أنى جيت حممتلك الفروج كانت ريحته عفشه ....
يس والجميع: ههههههههههههه .ههههههههههه
وفيه: الله يحظك ي بعيده اجعدي علي ما نرص الوكل
يس: وأنى عتحمم واجى طوالي ونظر لياسمين عامله إيه فى المذاكرة مليحه
ياسمين: مليحه الحمدلله
***********************
جاسر: للغفر خد الفرسه ودخلها الاسطبل وحممها زين عشانى عطلع بالليل اشج على البلد واتمشي ....
الغفير: حاضر جنابك ........
جاسر: الوووو ي دكتور عيد الزياد رش باجى الدواء أكده المحصول خلاصي ولا إيه أنى معيزشي يسد ما عليه من دين سامع اعمل ايتها حاجه عشانى تتأكدو إن الزرعه  معتصحش
الدكتور: لع اطمن الدوا ده عيخلى الزرعه متديش وهو معيخدش باله شكل الزرع كأنه متاعفي متجلجشي واصل
سامر: نادى على أخيه أنى عاوز اتحدتو وياك
جاسر: أنى عطول على امى وبعديها نتحدتو وصعد الي أمه ونظر إليها فإذا هى جالسه على السرير
فاطمه: تعالى ي ولدى عوجت جوى ليه ....
جاسر: لع معوجتش أنى معاود متاخر ربع ساعة بس المهم اخدتى العلاج ولا هملتيه
فاطمه: خدته ي ولدى وأنت اتغديت ولا لساتك على لحم بطنك
جاسر: أنى عتحمم وانزل اكل ويا خواتى تحبي اشيعلك أيتها حاجه من تحت ...
فاطمه: لع بس عوزاك اتحدتو معاك ....
جاسر: امرينى ي اماااا  خير
فاطمه: متاخدشي على خاطرك من خيك هو ما يجصدش بالحديت إلي حوصل أيتها حاجه هو بيحكى ويايا وأنت خابر خيتك زين عتحبو البت دى وأنى كنت رايده متزعلش وغلاوتى عنديك
جاسر: أنى مزعلش من خواتى بس أنى بعلمهم كيف يبجو تجال وميتحدتوشي كتير
فاطمه: أنى معاك بس اتروى ي ولدى عليهم لساتهم اصغيرين حاوط عليهم بردك بوك غايب طوالي وأنت مكانه اخ وأب ربنا يعينك ي ولدى
جاسر: اللهم امين ..عاوزة مني حاجه هغيرو خلجاتى وانزل لخواتى تحت وبعديها عتمشو اشج على البلد
فاطمه: كنت عاوزة كمانى اجولك إن ولااد عمك جايين اهنه يجعدو ويانا كام يوم وكمانى عنعملو حنه بت عمك اهنه عشان المكان عنديهم ميسعشي واصل العالم ده كلياتها
جاسر: وااااا كيف ده أنى معطيجش الوش ده كنتى اتحججتى بايتها حاجه
فاطمه: عمك كلم بوك واخد الأذن منيه هما كام يوم وخلاصي ي ولدى جولت إيه
جاسر: هو فى بعد جولك ي أمى وجول بوي عن أذنك عاد.....
فاطمه: ربنا يهديك ي ولدى ويروج بالك وافرح بيك جريب اللهم امين....
إيناس: سامر اتحدت ويا خوك ولا لع
سامر: جالى عيطمن على امى ويغير خلجاته وينزل نتحدتو بس جلجان منيه عنيه عطج شرار
إيناس: بجولك إيه أنت هزر معاه واتاسف وخلاصي وبلاش تعكر مزاجه بجيه عمك منير لاهنه ولا بته ي بااااى عتموت وتتجوز جاسر
سامر: لع تلاجى امى خبرته ما هما عياجو بكرة اهنه من النجمه وكمانى بت عمك عتاجى لجاسر تشغله ما هي رايده تتجوزه اصل ناجصه العمليه
إيناس: إن شاء الله خوك معيكونشي رايدها وإلا جول علينا ي رحمن يا رحيم دى لا فعل ولا جول
جاسر: اتغديتو ولا عتغدى لحالي ....
سامر: لع أنى وخيتك مستنينك ناكلو سوا ونادى على الخدم يحضرو الوكل
جاسر: جلس على الكرسي .....جولي ي سامر كنت رايد تخبرنى بأيه خير
سامر: أنى رايد اعتزر منيك ومتاخدشي على خير خاطرك مني أنى والله......
جاسر: بيكفي عاد حديت أنى عاوزك تكون تجيل مش كل حاجه تتحدتو بيها خليت للحريم إيه
إيناس: ههههههههههههه .....
جاسر: واااااا سدى خاشمك عاد بتضحكى على إيه ....
سامر: بوعيد بتضحك عليا أنى خابرها زين معتصدج أنك تتحدتو معايا وتمسك أيتها كلمه وتضحك عليها
جاسر: بيكفي عاد منك ليها طبعا انتم الاتنين خابرين إن عمكم منير جاي من الصبح اهنه وعيعملو حنه مريم اهنه حدانا بس عاوزكم انتم التنين تخلو بالكم من مريم واى طلبات تشيعولي وأنى اجيبها انتم خابرين معزة مريم عندى
إيناس: وأنى كمان بحبها جوى هى خيتك فى الرضاعه وحنينه جوى غير حسناء ي بااااى محراك شر أنى معحبهاش واصل
جاسر: وبعدين وياكى دول ضيوف حدانا وفى ناس غريبه عتاجى لاهنه أنتى وسامر تكفو كل طلباتهم وعيين لحديتى
سامر: أنت تأمر ي خوي
إيناس: هو أنى ممكن ادعى صحباتى للحنه والفرح
جاسر: ادعي الي عوزاه ومعيزشي كتر حديد ويلا همو الوكل جه
عيد الزياد: الحمد لله أنى رايح المندرة شيعو الشاي هناك
وفيه: خليك جاعد وسطينا عتجعد لحالك ....
عيدالزياد: لع الحج عطا جاي حدايا وأنى عستناه يلا عن اذنكم
يس: تسلم يدك ي مراه عمي الوكل حلو جوى
ياسمين: بألف هنا على جلبك بس أنت كيف المحروم أنى خايفه على الحله لتاكلها
يس: وااااا انتى طاله على أكلي إياك أنى راجل شجيان فى الغيط مش انتى حتى كنسه الفروجه عامله عليها فرح الله يعينه الي عيفكر يتجوزك عتمريه ...
ياسمين: مياجي على اسمى ياسمين كله روايح جميله وكمانى أنى معتجوزشي أنى اهنه بخرط بصل كل كام يوم وهناك كل يوم يبجي اهنه احسن
يس: ومين يحملك انتى تتجوزى ونرتاحو منيكى ونديله وسام أنه وافج ياخدك وشهاده تجدير (تقدير) لأنه اتطوع وخدك ي مخبله
شهد: ههههههههههههه بس بكفياكم عاد ياسمين الي عياخدها عيكون محظوظ بيها هو فى زى ياسمين بكفياك تشاكل فيها انتم كيف الجط والفار
هنيه: أنى عطلع فوج اريحو وانتى عتاجى ي شهد ولا عتجعدى....
شهد: لع طالعه  أنى عاوزة احكى وياكى زى زمانى همى بينا
ياسمين: وااااا ومين عيروج الوكل ده اوعاكم تجولو أنى والله اتجهر
شهد: معلش أنى تعبانه جوى روجى انتى ي النهارده وأنى معخليش حدا يجولك اعملي ايتها حاجه
ياسمين: يعينى عليكى ي ياسمين كلياتهم معرفينش جيمتك واصل بكرة أنى عنرفوهم
يس: أنى رايح لعمى فى المندرة وشيعو الشاي ...مراه عمي أنى عروح البيت مش عاوزة منى أيتها حاجه
وفيه: لع ي ولدى إن شاء الله مايعوزك لحدا واصل ويسعد أيامك
ياسمين: وأنى ادعيلي عشانى اروج الوكل ده ولسه مدخلتش السعي ادعى ي حجه ادعي
وفيه: ربنا يهديكى ي بتى ويصلح حالك ي رب
ياسمين: جنيت انى إياك ما أنى هاديه ونسمه اهااا بجولك ي امى اعتبرينى بت الجيران وادعي ليا
وفيه: خدى من يدى الشاي وبطلى رط فاضي
شهد: ابااااي أخيرا ريحت رجلي ضهرى محساشي بيه
هنيه: مجولتيش رحتى الغيط وعوجتى كيفها الزرعه ليها علاج
شهد: الحمدلله إن شاء الله تتعافي وتصح كلها سبوع وتبان النتيجه ....بس أنتى تعالى وحدتينى مالك حساكى مهمومه أكده .
هنيه: ببكاء حسان خوى عاوز يجوزنى ومعيزنيش اكمل علامى وأنى خايفه جوي
شهد: واااا كيف ده  سنك مينفعش تتجوزى أنتى قاصر وعمى خابر بعمله حسان دى
هنيه: هو بوي وحسان إيه هما التنين كيف الفوله الي انشجت نصين وانى خايفه جوي أنى عاوزة اكمل علامى مش رايده اتجوز دلجيت
شهد: كيف ده جن اياكى حسان عيجوزك ليه وااااا يس يعرفو ولا هو كمانى عيوافج على الكلام ده
هنيه: يس خابر وتعاركو هو وحسان وكمانى حسان طلع حداي وجالى عتتجوزى وأن كلمته واحده ومعيصغرش نفسيه جدام الرجاله وفضل يضرب فيا لما جطع جسمى كلياته
شهد: بوي عارف بعمله حسان دى ولا عمى مجالشي لبوي
هنيه: لع عمي عيد ميعرفش بايتها حاجه واوعاكى تحكى وياه والله حسان يجطعنى ويدفنى وأنى صاحيا هو فاتنى اجى اهنه وجالي اوعاكى تفتحي خاشمك
شهد: وااااا انتى عتسكتى إياك وتسيبي خوكي يعملو فيكى كيف ما هو عاوز انتى متعلمه وعارفه إن سنك اصغير اجعدى ويا حسان وحننى جلبه عليكى وأنى عكلمه كمانى عريحو هبابه واذا فوجت عروح حداكم واتحدت وياه بس انزلي وجولي لامى تخلي يس يعاود كمان ساعه ياخدنى اروح عنديكم
هنيه: حاضر بس يا رب  يسترها وحسان يجتلني
شهد: بطلي حديت ماسخ وانزلي وأنى عريح هبابا