شهد الصعيد

الفصل التاسع

الفصل التاسع

الفصل التاسع
شهد : امسكى ي خالتى اكده الانبوبه دي أنى عرش الجهه دى وبعدها عرش اليمه التانيه وبكده إن شاء الله تتعافي بس اوعاكى تجولي لايتها حدا فهمانا عشان الزرعه تصح ي خالتى
أم رجب: لع مش عجول لايتها حدا أنى فهماكي ي بتى ربنا يخليكى ويستر ايامك وبدأت شهد فى رش الأرض بكل همه ونشاط ..........
أم رجب: ناولينى ي بتي أنى عرش وياكي وعنادي لباجي الحريمات عشانى منخدوشي ايتها وجت
شهد: فابتسمت وتحدثت شيعي ليهم ي خالتي وأنى عضيف الدوا اها على ما ياجو
أم رجب: هبابا وعكون. اهنه وياهم مش هعوج عليكي ....
شهد: ي رب اعطينى الجوة عشاني أجدر اجف وياهم ولو إن الواحده منينا وجت الشده بتبجي اشد من أيتها راجل وبدأت تكمل عملها إلي أن جاءو باقي النساء للعمل معاها
عيد: وااااا يعنى يس معودتشي ولا بتك كماني فينهم 
سامر: أنى عجوم اطول عليهم واشيعهوملك ومتشكر جوي على الوكل ده وتسلم يدك ي خالتي
وفيه: ألف هنا موطرح ما يسري يمري ابجي كررها تاني أنت دلجيت بجيت كيف ولدي
سامر: يكون ليا الشرف ي خالتي وأنى عاجي واشتغل اهنه وهتعلمو أمور الغيط واسمحلي ي عم عيد أنى أساعد وياك وزي ما جالت خالتي إنى كيف ولدها
عيد: ربنا يكرمك يا ولدي ويجعلك فى كل خطوة سلامه واستاذن سامر واتجه الي مكان يس وشهد
ياسمين: أمي أنى جعانه عاوزة أكل
وفيه: اباااي ما الوكل جدامك اها عتاكلي مرتين كيف المفاجيع ده إحنا لساتنا عينين الوكل ...
ياسمين: لا أني ولا هنيه عرفنا ناكل واصل من الجدع ده ...عياكل كيف المحرومين
عيد: ونظر لابنته وبصوت عالي عيب الحديت ده كيف تتحدتي أكده على ضيف احدانا أني علمتك أكده والله عيب
ياسمين: بحزن على زعل أبوها أنى مجصدتشي أنى عهزر والله اوعاك تزعل مني ي بوي والله اتكدر
عيد: وقد هدئ من روعه خلاصي ي بتى بس اوعاكي تجلي من مجام الضيف ولازمن تكرميه وتحسني معاملته فهمانا ي بتي انتى كنتى خجلانه وعتتكسفي تاكلي أنتى وبت عمك .....ويلا همي وروحي خلصي واكلك على ما ياجي يس وخيتك عشان نلملمو حالنا ونعاودو على البيت
وفيه: أنى عروح اطول علي شهد وكماني عطول علي الحريمات واوعالهم  عيروحو ولا عيعملو حاجه عشاني أكمل وياهم
عيد: متعوجيش عستني ويا البنته اهنه وأنى مجدرشي اجف علي رجلي واصل
وفيه : حاضر لو عوجت يبجيى حداي شغل ومش عتاخر وذهبت هى الأخري لابنتها والنساء فى الغيط ....
عاصم: السلام عليكم ورحمه الله وبركاته كيفك ي أم جاسر عامله ايه دلجيت
فاطمه : أنى مليحه الحمدلله دليت( رحت ) عند الولد فى الغيط
عاصم: لساتنى معاود جاسر ممشي الغيط والفلاحين مليح بس أنى خايف عليه من جسوته دي الناس اهنه معتحبوشي واصل حتى الغفرا الي عيشتغلو حدانا. عيخافو منيه جوي غير سامر ولدك عيتحدتو وياهم وعيتكلم وياهم مليح
فاطمه: أنى خايفه عليه  جوي شيطانه غالبه وأنت هملته لحاله اهنه وسيبته على الخلج عيتحكم فيهم ويظلمهم ..كتر الظلم عيخلي الجلب كيف العتمه وخايفه عليه حدا يتصدرله من  الخلج وياذيه
عاصم: ربك يسترها وأني عرد للبلد وعباشر الأرض وياه اطمني
فاطمه: والشركه عتهملها لحالها إياك ...؟
عاصم: لع سامر ولدك عيديرها مع شريكي وهو جالي أنه رايد يشتغل وأنى خابرة مالوش فى الغيط والفلاحه عشان أكده هو عيشتغل فى الشركه ....
إيناس: السلام عليكم إزيك ي امي كيفك دلجيت
فاطمه: أنى مليحه ي بتي مالك عتاخدي نفسك أكده وكان حدا عيجري وراكي
إيناس: أنى طالعه السلم جري عشان اجولك مراه عمي عزت اتصلت وعياجو فى العشا وهى عتشيع بناتها كمانى ساعه أكده
فاطمه : وماله ي بتي خليتى حدا عينضف المجعد الي عينامو فيه بنات عمك التنين ....
إيناس: أيوة من الصبح والبيت كلياته بجي تمام بس أني عاوزة انعس هبابا أنى من النجمه واجفه على رجلي
فاطمه: روحي ي بتي انعسي وريحي جسمك
عاصم: لابنته تعالي اهنه  مش عتاكلي أيتها لجمه...
إيناس: لع أني شبعانه ومعوذاش أكل دلجيت لما اريحو ابجي اتغدي ...
فاطمه: روحي ي بتي أنى خبراكي طول ما انتي تعبانه مش عتفكري فى الوكل روحي انعسي
عاصم: والله وكبرت وبجت تعرفو تتصرف لحالها فى البيت عجبال ما اشوفها عروسه وافرح بيها هى وخواتها
فاطمه: اللهم امين  بس كنت عاوزة اجولك على حاجه أكده
عاصم: جولي ي أم الولد أنتى تأمري
فاطمه: لا سمح الله ما يأمر عليك عدو أنى بس كنت عاوزة اجيب هديه زينه لبت خوك مني ليها هى عتتجوز وعرفت إن ناجص عنديها حجات كتير وأنت خابر خوك زين ماسك على الجرش
عاصم: اعملي الي انتى ريداه ومن ميتا وأنتى عتستاذنى مني فى حجات زى أكده كل حاجه بيدك اهنه  سوي المليح للبت وكملي الناجص ليها أنتى خابرة معزة مني عندي .....
فاطمه: ربنا يخليك ي أبو جاسر أول ما تاجي اهنه عاخدها واتدلي بيها اجبلها الناجص كلياته
تعريف اخو  عاصم الاخ الاصغر لعاصم الشهاوي( عزت )
متزوج من بنت عمه افكار فهى طيبه القلب ولكنها تلبي كل ما يأمرها به زوجها لهم ابنتان
الابنه الكبري (مني ) فهي طيبه  القلب وخجوله لم تكمل تعليمها  فهى ارادت ذالك فاكتفت بالابتدائيه
الاخت الصغري(  ناهد ) حاصله على معهد فني تجاري فهي تحب جاسر جدا وتريد الزواج منه وتظفر بما لديه من مال فهي قاسيه القلب وتعامل الجميع بتكبر شديد .......
سامر: ظل واقفا أمام شهد والنساء ومتعجب وسأل حاله هى عتعمل إيه دي وعترش الأرض ولا كأنها أرضها ولا الحريم عيشتغلو وياها كيف الرجال واااااا صنعتها إيه دي شهد والله بينها زي ما جولت عليها المراءه الحديديه
يس: من خلفه عتعمل ايه اهنه وواجف أكده ليه ....
سامر: طول على بت عمك أكده  والله أنى متعجب لحالها 
يس: وايه العجيبه فى حالها ما هي زينه اها
سامر: هى فعلا زينه وست البنته كماني بس اوعالها وهي عتشتغل فى غيط غيرها وكمانى عتشتغل وكأنها طير في السما نادر لما توعي لايتها بت أكده
يس: بت عمي أني خابرها  زين عتحب الخير لحالها وللناس كلياتهم ومعتبخلشي عليهم بايتها حاجه ....عارف هى عترش أرض أبو رجب دى بالعلاج إلي فاضل لرش أرض بوها وكمانى مديونه بألف جنيه باجي حساب العلاج
سامر : وااااا كيف عتبدي أرض غيرها علي أرضها جنت إياك
يس: لع بس أنى خابرها زين أكيد فى راسها حاجه عشاني أرض بوها كماني تعالي هم بينا نروح حداها
سامر: هم بينا بس وجف اهنه أنت جاي من حدا المخزن هو خوك وعي وفاج ولا كنت عتطمن أنه مشي
يس: لع هو فاج ومشي مشفتوشي أنى اهناك
سامر: ربنا يهديه ويصلحله حاله ده الشيطان اتملكه ومبجاشي شايف واصل غير إلي عيجول عليه شيطانه
يس : سيبك من سيرته عاااد وهم نروحو لشهد  واتجهو ناحيتها ووقفو وسالوها انتى عتعملي إيه اهنه
شهد: أنى بإذن الله عرش الأرض لعمي ابو رجب هى كيف زرعتنا والعلاج ده انى كثفته وعرشه دلجيت وإن شاءالله عتكون الزرعه عافيه وعتطرح كتير
سامر: وااااا وأرض بوكي كنتى عتاجي وعترشيها عشيا عتجولي لابوكي إيه اني بديت زرعه غيرنا عن زرعتنا
يس: والله امعاك حج أنى مخبرشي عمي ممكن يجراله إيه بعد عملتك دي
شهد: ونظرت لهم هما الإثنان واااا يعني حديتكم ماسخ كيف تجولو الكلام ده أنى بوي رباني إني أساعد أيتها حدا يكون محتاج مساعدتى وكمانى أنى مجتشي على زرعه بوي اني كنت عرشها زياده توكيد لكن الزرعه اهنه محتاجه اكتر للعلاج وبعدين بدل حديتكم ورطكم إلي ممنوشي أيتها عازا همو رشو الغيط مش جولتم أنكم عتتعلمو  همو
سامر: لشهد  وجعه إيه الهباب دى ...ده أنى لسه عجول اتعلمو يعنى أحط رجلي فى الغيط وعتمشي وكل يوم أعمل أيتها حاجه لحدا ما أوصل للرش ده والوجفه إلي عتهد الحيل دي
شهد: أمسك ي سامر وأنت كمانى يا يس وروشو اليمه دي وبكده عنخلصو كمانى نص ساعه وبداء يس وسامر يحملون الانبوب للرش والنساء أيضا تعمل بكل همه ونشاط
وفيه: ابااااي عتسوي إيه بتي في أرض أبو رجب وذهبت إليها ونادت شهد يا بتي عتعملي إيه اهنه
شهد: الزرعه اهنه مررضانا وأني عرشها كيف أرضنا
وفيه: ي بتى أنتى واعيه لنفسيكي أنتي تعبانه جوي من أول النهار وأنتى واجفه على رجلك
شهد: أنى مليحه جوي والحمد لله ريحي ي امي وأنى هبابا وعخلص
وفيه: أنى عستناكي ده انتي مفوتيش ولد عمك ولا ولد الشهاوى عتشغليهم وياكي هههههههه والله ي بتي ما في زيك ربنا يجويكي
شهد: اللهم امين وبدأت العمل مرة أخرى
جاسر: أنت ي غفير الغبرة هم اهنه وجولي سامر بيه لساته جاعد حدا عيد الزياد لدلجيت
الغفير: بخوف مما سيقوله لهذا الجاسر ...لع جنابك هو ......
جاسر: واااااا البسه (القطه) كلت لسانك إياك انطج
الغفير: خوك واجف عيشتغل فى غيط أبو رجب ويا الست شهد وسي يس واها هو اهناك اها
جاسر: وكان جالسا على الأرض فهب واقفا ونظر باتجاه ارض أبو رجب بجوار أرضه وعينه جاحظه والغيظ تملكه مما يراه وحدث نفسه هى بت عيد دي عتسوي إيه فى أرض أبو رجب لع وكمانى عتشغل خوي أني والله بينك بت جويه وعتتعبيني  وياكي بس ي ترى انتي رايده إيه من خوي وعتخليه يدور وراكي أكده لع وكماني عترشي أرض أبو رجب وابتسم لحاله رشي ي بت عيد ما هو نفس مرض أرض بوكي ونفس العلاج اها خلي الخلج يجولو بت عيد المتعلمه ضيعت أرضنا كيف ما ضيعت أرض بوها
سامر: لشهد أني خلصت اليمه دي فى حاجه عرشها تاني ولا بيكفي أكده
شهد: لع وأني كماني خلصت واها الحريم كلياتهم خلصو ويس
سامر: أقترب من شهد إلا جوليلي هو الدوا ده مش كنتي عترشي بيه ارض بوكي معجول بديتى ألارض دي علي أرضكم
شهد: لع طبعاً أرضنا اتعافت جوي وأنى كنت عرش رش خفيف عشانى أنهي علي المرض من جدرة   بس لجيت الزرعه اهنه زى ما أنت واعيلها وأنى كثفت العلاج بكل الدوا الي فاضل وعتصل بالدكتور وعجيب منييه علاج تاني ولما اعاودو مصر اشيعله فلوسه
سامر: بإعجاب كبير لقلب شهد وحبها للخير للآخرين فتحدث لها أني رايد أساعد وياكي واجيب باجي العلاج ...
شهد: فابتسمت له متشكرة جوي بس أنت واعيلي زين أني رايده أعمل كل حاجه لحالي ولما أحتاج لايتها حاجه عاجى واجولك طوالي
جاسر: وااااااا دولي هيتضحكو جدام الخلج والبت ولا كأنها من بنات البندر واجفه من غير خشي ولا حيا لع أنى متوكد أنها عتلعب على خوي عشانى أهمل أرض بوها بس والله ماعسكتلك واصل فأسرع وذهب إليهم
يس: اني خلصت كماني ورجلي خلصت الشغل اهنه واعر جوي
سامر: ههههههههههههه لع أنى مليح جوي وبيكفينى إن الناس اهنه مبسوطه وشايف علي وشهم السعاده ي رب يصلح من حال زرعتهم ويسدو ما عليهم
جاسر: بصوت جهوري عتعمل ايه اهنه وجاعد تتسامر ويا الخلج وفايتنى لحالي عستناك ...لع وكماني عتشتغل فى أرض الفلاحين ......ما أنت حداك أرضك هم أشتغل فيها عتشتغل كيف العمال ي خوي ونظر لشهد  وبت عيد دي رايده منيك إيه وعتخليك داير اوراها كيف خيالها
شهد: بصوت عالي اجطع الحديت الماسخ دى عمال ترط وعتتكلم وأني مش عسكت واصل
جاسر: فاقترب خطوة منها اتحدتي ي بت عيد بينه جعدتك فى البندر علمتك جله الحيا وأنك تجفي جصاد الرجال من غير خشي لع وعينك جويه
شهد:فاقتربت منه خطوة هى الأخري  أني جاعده فى البندر اتعلمو بس أني من البلد اهنه وعارفه حدودي وينها ومتعداشي حدي واصل وخابره الأصول عاااد  إلا مع الرجال إلي بيدعي أنه رجال زييك أكده الإسم راجل والفعل كيف ......؟
جاسر: بصوت عالي ورفع أيده عشان يضربها علي وجهها اخرسي ي بت عيد فأمسك يده يس ووقف أمامه اوعاك يدك تلمس خيتى والله. اغفلجها عليك ....
جاسر: بصوت عالي جنيييييت إياك عتمسك يدي وعتتصدرلي
يس: واجطع يدك كماني  الي عتتمد علي حريمنا وبينه أكده إنك نسيت حالك بعد عنينا وعن بت عمي وإلا ....؟
سامر: لأخيه بكفياك عاد ي جاسر هملهم لحالهم ويلا نعاودو علي البيت.
جاسر: لأخيه أنت عتسكت ولا أنى عسكتك إنت إبن عاصم بيه الشهاوي واجف ويا دولي وخليت الي يسوي وميسواشي عيتبجح ويجف جصادنا ...
سامر: عيب ي جاسر ي خوي عتشتم الخلج من غير أيتها سبب كيف ده هما عملو إيه وياك عشانو تاجي وتجول حديتك ده
يس: بكل الغضب إلي جواه ونظر لسامر وتحدث خد خوك وبعدو من اهنه واعاد نظرة لجاسر وأنت اوعاك تفكر تجف وتتصدر لأيتها حدا من عيلتي عتلاجينى أنى جبالك ومعسكتشي واصل والله اعغفلجها علي راسك
شهد: لجاسر  الكبير كبير فعل وجول وأنت لا لا جول ولا فعل بينك أكده متعرفش تجف إلا جصد الحريم ...
جاسر: اباااي ده أنتى معتحترميش راجلك الواجف جدامي ده ولا صوح أنتى تربيه البندر وعتتحدتي. كيف الرجال
شهد: امعاك حج أنى بتحدتو كيف الرجال فاقتربت منه الدور على الرجال لما يتحدتو كيف النسوان
جاسر: بعيون غاضبه أنى معردش عليكى ولا علي الي عيتصدرلك ده لأنه زي جلته أنى عخليكى تاجي حداي وتحبي علي مداسي وتترجينى عشان اعفي عنيكى ونظر لأخيه وأنت اخلع المرش ده وهم جبالي خلينا نعاودو علي البيت وازاح يس من أمامه وأخذ أخيه وابتعد
يس: وأنتى بكفياكي عاد تناطحي ولد الشهاوى ده وكمانى عتتحدتي واني واجف أنى معوذشي ازعلك مني بس اوعاكي تكرريها وهمي بينا زمنات عمي عيتجن من أننا عوجنا
شهد: عنادي على امي هم روح لأبوي وأنى جايا وراك
سامر:  بعد أن وصلو السرايا فتحدث لأخيه كيف تتصرف أكده مع الخلج وكيف تاجى وتهب علي الخلج  من  غير أيتها حج
جاسر: بصوت عالي  أنت جنيت إياااااك أني اهنه الكبير وكبير البلد دي والكل عيسمع كلمتي فهمان
سامر: أنت غلطان ي خوي أنت كبير بس ويا حالك مش كبير على الخلج بالعافيه الكبير لازمن يتحب عشاني الناس تسمع كلمته لكن انت عتفرض عليهم إنك كبير وعتظلم الخلج وبتاخد حجهم بالعافيه والحيله ويا الدكتور إلي ضميرة غاب عنيه كيف عتنام وأنت ظالم كيييييف ي خوي أنت اتظلمت جبل سابج بس ده مش عيديك الحج تظلم غيرك
عاصم وفاطمه : خرجو على صوت أبنائهم وسمعو ما دار بينهم .... فاطمه الحج الولد عيمسكو بعض
جاسر: بدون وعي منه أقترب من أخيه وصفعه على وجهه وكاد أن يضربه مرة أخري
عاصم: بصوت جهوري جااااااسر وجف امكانك واوعاك تكمل ضرب خوك
فاطمه: ي ويلي ي ويلي كيف تضرب خيك أكده كيييف ي جاسر ي ولدي
جاسر: ولدك عيرد عليا وكمانى عيناطحنى ويا بت عيد دي وداير وراها وعتشغله فى أرض الجيران كيف العمال وكمانى عيرد عليا ويجول عليا ظاااااالم  اني ظالم أنى عكبر أرضنا وعوسع منيها وولدك جاي بيتهمني كيف الغريب
فاطمه: اقتربت من أبنها جاسر نزل يدك ي ولدي اليد دى إلي عترفعها علي خوك المفروض تشيل بيها همه  وتحاجي عليه ي ولدي كيف طاوعك جلبك وتضرب خيك كيف
عاصم: بكفايه حديد وتعالو اهنه فهموني الي حوصل
سامر: أني بعد أذنك ي بوي عطلع اريحو ونظر لأخيه وهو يحكي إلي رايده أنى معوذشي اجعد وياه
عاصم: سااااااامر أنى جولت همو ورايا معوذشي أيتها حديد غير الي عسال عليه والغلطان عحاسبه أنى لساتنى فيا الروح بعد ما أموت ابجو ناطحو بعضكم كيف الغرب
فاطمه:لزوجها بخوف بعيد الشر عنيك العمر كله ليك
عاصم: الولد بينهم كبرو ونسو إن بوهم حي يرزق ولساته بعافيته
جاسر: طئ طئ رأسه أنى آسف ي بوي حجك عليا
سامر: أقترب من ابيه وقبل يده أنى آسف ي بوي وجلس امامه هو وجاسر وبدأ جاسر يحكى له ما حدث
عاصم: وأنت ي سامر حكي ي ولدي وجولي إيه حوصل فبدأ سامر يحكي ما حدث وبعد أن انتهي نظر لابيه هو ده الي حوصل
عاصم: وأنت ليه ي ولدي عتشتغل فى أرض الجيران كيف العمال ده مجامك برديك
سامر: ي بوي أنى عشتغل واساعد مش عشتغل عشان اخد أجرة وأنى اتعلمت منيك كيف اساعد الخلج من ما استني منيهم أيتها حاجه غير أني اشوف فرحتهم ي بوي الناس دى بسيطه جوي كل همهم أرضهم وبس ومش ريدين أيتها حاجه بس إبنك رايد ياخد منهم أرضهم بالخيانه ويا الدكتور ده
عاصم: بيكفي حديد لاهنه عااااد واطلع فوج لاوضتك  ونظر لجاسر وأنت تعالي ويايا على المكتب رايد اتحدت وياك ...