#ملتزم_وعشقته❤️
روااااايات ايوتة 😍😍😍
الحلقة التاسعة
مشي سامر الخدمة طق الباب فتحت ولقيت بشري
تاج.. صباح الخير بشري
بشري.. صباح النور سامحيني جاياتك الصبح
تاج.. لا عادي خشي تعالي
دخلتها مستغربة من جيتها بس قلت مرات جاية تتعرف وتهدرز بس
تاج.. نجيبو شاهي ولاقهوة
بشرى.. عادي اللي يعجبك
خشيت المطبخ ودرت قهوة اسهل شي حطيتها وقعمزت تشرب عادي هدرزت شويا وروحت مفيش اي شي مريب
حنين.. وينك اليوم انتي وتهاني
تاج.. كانت عندي بشري
هدي.. ب استفهام... وشن ادير عندك
تاج.. حتا اني استغربت جيتها
حنين.. ردي بالك علي روحك
تاج.. خيرها هيا
حنين.. هي.......
هدي.. مخيرها شي بس ردي بالك منها
تاج.. تمام😔بدي عندي فضول كبير نعرف شن اللي صاير بس مسألتش
روح سامر زي اي يوم من الخدمة وخش رقد غسلت الحوايج ورتبت الحوش عادي
تاج.. وينك الصبح
تهاني.. رقدت منضتش حتا لفطور ساهر
تاج .. هذا اللي فالحة فيه
تهاني.. شن الجديد بينك وبين سامر
تاج.. مفيش جديد والصبح جت بشري بنت عمهم شربت معاي قهوة ومشت ولما قلتلهم قالولي ردي بالك منها
تهاني.. هالبنت وراها قصة
تاج.. حتا حنين لما حاولت تقول سكتتها امها وقتلي مفي شي
تهاني.. معاش توسوسي خلاص
تاج.. استغفر الله وخلاص
حنان.. تعالو قعمزو خيركم قاعدات ف المطبخ
تهاني.. اي جايين
مشينا قعمزنا كانو الكل قاعدين يهدرزو واني عقلي مش معاهم ونفكر
سامر.. بصوت واطي... فيك حاجة
تاج.. لالا يمكن سرحت شويا
كمال.. مشفتوش عمامكم ليكم فترة
ساهر.. بوي والله معندي جهد نساير حد
سليم.. اني مش فاضي حتا لروحي
سامر.. واني عندي عندي درس ف الجامع توا شويا وطالع
كمال.. الاعذار اللي تحطو فيها هادي
هدي.. خليهم ف حالهم ياكمال كل حد وشغله والدنيا تلاهي
كمال.. غدوا الجمعة اعزمي الكل ع الغدي
هدي.. شنو؟ خيرك ياراجل من يومين بس عزمناهم حتا الجمعة شن تحسابنا
كمال.. عادي شن الصعب ف القصة
هدي.. ظهري ينقسم اني وبناتك واخر الحلقة يجو نساوين خوتك يعلقو، لا ياكمال فكنا منهم عشية يجو يهدرزو عادي
كمال.. باهي حتا عشية، وانتو مفي حد منكم يطلع
ساهر.. يستر الله
سامر.. اني طالع متبو شي من برا
هدي.. سلامتك ولدي
سامر.. تعالي شويا تاج
تاج.. حاضر، طلعت معاه
سامر.. تبي حاجة نجيبهالك معاي
تاج.. لالا سلامتك منبي شي
سامر.. متتأخريش مرات واحد من ولاد عمي يجي
تاج.. توا شويا ونروح حاضر
سامر.. السلام عليكم
تاج.. وعليكم السلام في حفظ الله
مرت الايام وتهاني حملت قداش كانت فرحانة وساهر نفس الشي
يوم خش سامر ووجهه ميتفسرش
تاج.. خيرك
سامر.. شن هوا اللي درتهولك
تاج.. كيف مفهمتش
سامر.. شن اللي درته باش نتحاسب هكي باش يطلع نصيبي هكي
تاج.. فهمني شن تقصد
طلع تلفونه يوريلي فيه كانت محادثة واتس بس اللي يصدم ان فيها صوري
تاج.. كيف وصلو هادم اهني
سامر.. اني اللي مفروض نسألك مش انتي تسألي
تاج.. واني وين نعرف سامر
سامر.. تعرفيه الرقم هذا
تاج.. لا ولاعمره مر عليا
خش الدار بدون حتا ميشرحلي او يتكلم، صوري كانو ف المحادثة اي صوري رقم غريب بدون صورة بدون أي إثبات قلبي قريب يوقف من اللي صار
خشيت الدار لقيت سامر بدل حوايجه ورقد
مخاليش فرصة حتا ان نحكو او يفهمني
طلعت الصالة مغمضتش عيوني من التفكير لين اذن الفجر، توضيت وخش سامر توضي بعدي وطلع الجامع بدون حتا ميشوفلي وهذا اللي زاد حرقني اكتر
بديت نصلي كملت وندعي ربي يسترني اني مدرت شي ولاعمري فكرت نضر حد بس اكيد امتحان من ربي
قعدت نستنا فيه لين نعست ومحسيتش ب شي
ف مكان تاني..
اسعد.. درتها يارفيق
رفيق.. درتها ومزال مشافت مني شي
اسعد.. خلي البنت ف حالها حرام عليك
رفيق.. من قلها تسيبني؟ مزال تستنا عليا بس
اسعد.. ربي يصلحك يارفيق حرام راهو
رفيق.. كان مش صاحبي راهو وريتك الحرام شن هوا، انت متفهمش فيهم البنات نعرف دواهم
اسعد.. استغفر الله العظيم
قام رفيق التلفون واتصل
رفيق.. ايوا ياحلوة
تاج.. منو
رفيق.. نسيتي صوت حبيبك بسرعة
تاج.. ر ر رفيق
رفيق.. خيره لسانك اكيد نصدمتي صح
تاج.. صكر اني متزوجة توا ياسر من الهبال
رفيق.. هوا انتي شفتي هبال، بس حلوات الصور صح
تاج.. ب صدمة... انت يارفيق
رفيق.. هوا فيه غيري نقدر ندير هذا كله
تاج.. حرام عليك شن درتلك ادير فيا هك كنت مرتاحة تجي تخرب عليا
رفيق.. مزاااال مشفتي شي مني والله نخليك تتمني الموت ومتلقيها
تاج.. الله لاتربحك
رفيق.. هههههههه سلام ياحلو
صكر الخط واني ف عالم تاني نعيط شادة راسي بس شن اللي صار شن اللي خلاه يدير فيا هكي مش عارفة
تأخر الوقت وجت العشية وسامر مروحش لبست المصلية ومشيت لحوش اهله
هدي.. خيره وجهك اصفر
تاج.. شي شكلي تاعبة شويا بس بنسألك سامر مجاش اليوم
هدي.. جي امبكري خدي غداه وقال تاج مريضة مطيبتش بعدها طلع، شن فيه
تاج.. حتا تلفونه مصكر
هدي.. متراعشينيش شن اللي صاير
تاج.. مش عارفة شن بنقولك
سليم.. يماا
هدي.. اسكت انت مش وقتك، احكي شن
بديت نحكيلها ف القصة ونبكي بشهقة مش قادرة نوقف
هدي.. حسبي الله فيه هالوقح
تاج.. عمتي هوا مسمعنيش ولاتكلم
هدي.. سليم خوك وين
سليم.. منعرفش حاولت نتصل بيه بس مصكر
تاج.. اني انتهيت خلاص
سليم.. اهدي واستغفري ربك
تاج.. دوره بالله عليك
سليم.. باهي اهو طالع تو نشوفه
هدي.. برا وطمني متتأخرش
طلع سليم معاش عندي دموع بس ساكتة ونستنا فيه امتا يجي باش نفهمه وميجيش يوم ويشك فيا
هدي.. نوضي كولي حاجة ياتاج
تاج.. مخاطريش
هدي.. حرام عليك انتي بريئة وعارفة روحك
تاج.. بس سامر مسمعنيش ولاصدقني
هدي.. تو يجي ونحكوله كلنا معاك
فاتو ساعات خش سليم
هدي.. وينه
سليم.. دورت ف الشوارع المكانات اللي متعود يمشيلهم المستشفيات المراكز كل شي دورت فيه مليشي اثر
تاج.. اني انتهيت انتهييييت
سليم.. مرات هوا محتاج يقعد بروحه بس
تاج.. بس اني محتاجة اكتر نبي نفهمه كيف يشك فيا كيييف
سليم.. خلي يجي وتحكي معاه
تاج.. يارب ساعدني
هدي.. تعالي سليم شويا
سليم.. نعم امي
هدي.. كيف ملقيتاش كيف
سليم.. دورت مخليت مكان يما شن ندير
هدي.. البنت حالها يقطع القلب ضروري نلقو حل ل هذا
سليم.. توا ليل الصبح نشوف بوي وساهر
هدي.. يستر ربي
تاج.. اني مروحة متبو شي
هدي.. وين تروحي العفو اقعدي اهني
تاج.. لالا نبي نروح
هدي.. حنين ياحنييين
حنين.. نعم
هدي.. بري باتي مع تاج الليلة مبين شفنا حل
حنين.. حاضر هيا تاج
مشيت معاها خشيت الحمام تحت الميا ونبكي مش عارفة حل للمشكلة هادي
طلعت لبست وخشيت فراشي ومشيت ف نوم عميق
يتبع....
تفاااعلو ❤️❤️❤️❤️❤️
