#ملتزم_وعشقته ❤️
روااااايات ايوتة 😍😍😍
الحلقة الخامسة عشر والأخيرة
طلعو رفيق وعامر من المركز ب كفالة!
يوم عن يوم بديت نتحسن والكابوس نوعا ما يخف عليا بس نفسيا قاعدة تاعبة 💔
طبعا يوم جت بشري وامها واتصلت حنين ع اساس ان نمشو نهدرزو لبست ومشيت
هدي.. حالك باهي توا
تاج.. كويسة احسن ب هلبا
سالمة.. ف اما شهر انتي
تاج.. توا ف السادس
سالمة.. باهي كويس
هدي.. تهاني شوفي سليم شكله هوا اللي فتح الباب
سالمة.. العفو خلي يخش نشوفوه
طبعا سليم مكانش يعرف انها اهني بس حصلت عليه 😅
سالمة.. متقولش عندي مرت عم نسأل عليها
سليم.. تشوفي فيا حاصل حتا الحوش منروحش، نتلاقا مع الولاد يقولولي حالها باهي
سالمة.. 5دقايق شن بديرلك
سليم.. ان شاء الله مرت عمي المرة الجاية، خواتي وين امي
هدي.. مطلعهم ساهر يشرو ف حاجات، شن تبي انت
سليم.. شي تو ندبر اموري، نستأذن
سالمة.. غير تعالي هدرز عليا
سليم.. وين يامرت عمي كيف مروح من الصبح واني برا بندوش ونرقد
سالمة.. باهي ربي يعاونك
ف الاثناء هادي خشو ساهر وسامر والبنات
هدي.. كملتو كل شي
حنين.. اي كملنا مزال حاجات بسيطة تو يطلع ياخدها ساهر
سامر.. بوي وين
هدي.. مع عمامك ولدي ف المربوعة
سالمة.. غير تعالي ورينا وجهك
سامر.. مستعجل مرت عمي بنكلم بوي وطالع
سالمة.. بالله ماك طالع شن كل منجيكم تختفو كلكم
سامر.. مشاغل ومرتبط بالجامع ضروري نمشي
سالمة.. شن بيطير اليوم كان ممشيتش
هدي.. قعمز قعمز مرت عمك كان عششت معاش تسكت
ساهر.. متبي شي امي
سالمة.. والله مفيكم واحد طالع لين تهدرزو عليا
سليم.. شن متعاقدة مع الحلف اليوم ولاكيف
سالمة.. هذا جزائي ان نبي نهدرز عليكم😥
سليم.. دموع فكينا منهم اهو بنقعمزو ونرتاحو
قعمزو الكل وبشري مكانش ليها حس
تاج.. بصوت واطي... خيرك
سامر.. النفخ اللي داراته هذا
تاج.. خليك شويا واطلع بأي حجة
سامر.. ع اساس بتخليني ف حالي
تاج.. ع خاطري تحمل اليوم
سالمة.. عصافير الحب يوشوشو
سليم.. نبي نفهم بس انتي تهدرزي معانا ولاتراقبي فيهم
سالمة.. الزوز الزوز✌️
سليم.. ربك يخفف عليك
هدي.. باهي باهي
تاج.. هيا عمتي احني بنمشو
هدي.. قعمزو خيركم
سالمة.. اليوم جيت اني بتمشو
تاج.. خلاص واني تاعبة مضطرة نروح
تهاني.. حتا اني مروحة
ساهر.. يوم تاني نقعمزو
هدي.. متنسوش غدوا توتو كل شي بكري باش نلحقو
سالمة.. شن عندكم
هدي.. غدوا خطوبة سليم ان شاء الله
سالمة.. من منو العفو
هدي.. بنت صاحبتي قنينة وصغيرة وفالحة اقلها نعرفها من لما كانت صغيرة
سالمة.. باهي باهي، وسكتت
مشينا روحنا الكل وخشينا رقدنا
ثاني يومركانت خطبة سليم اللي كانت تجنن وكانت تلبيسة ف نفس الوقت، خطيبته حتا هي تجنن وكيوت
هدي.. توا نبدو نوتو للعرس مش حنأخروه هلبا مدام حوشه واتي
تهاني.. اي قبل منجيبو اني وتاج
هدي.. هذا هوا حتا اني فكرت هكي
حنين.. يما تعالي نقولك شن شفت برا
هدي.. مش حتهدي تقصقيص ع الناس
حنين.. شفت بشري ادور جهة حياش خوتي
هدي.. اللطف شن ادير غادي
حنين.. وين نعرف اني
هدي.. سترك يارب خلي انوض نشوفها ل ادير مصيبة
طلعت وطلعنا وراها مش فاهمين شي وهي تقول يارب استرنا وصلت فيها وبشري وجها تغير
هدي.. شن اديري اهني انتي
بشري.. ءء شي مرت عمي جيت نبي تاج ملقيتهاش
هدي.. وشن هوا اللي ورا ظهرك
بشرى.. شي اني ماشية
هدي.. تعالي وين ماشية شن هذا
خداته من ايدها وفتحت تعرفو شن فيه كان البوم عرسي اي اي البومي اللي فيه كل صور عرسي من الالف الي الياء
هدي.. شن بديري بيه هذا
بشرى.. ءء كنت ء
هدي.. تعالي جاي اليوم بوك يتفاهم معاك سكتلك هلباااااا
شدتها من ايدها واني ف حالة صدمة اصلا شن كانت تبي ف البوم عرسي شن فيه
رفعتها الحوش وحبستها ف الدار وقعدت تستنا ف كمال باش تحكيله اللي صار
مع الظهر جو كلهم من الخدمة لانه وقت غدي وقعمزت هدي حكت كل شي
كمال.. اليوم جنازتها الفرخة معيتش
هدي.. اهو كان مشافتهاش حنين راهو مشينا كلنا البوم البنت نلقوه ف الجرايد
كمال.. حنكلم بوها توااا يجي يدير حل
دقيقة ورن تلفونها اللي خداته هدي قبل متحبسها ف الدار كان الاسم رفيق....
تهاني.. هذا نفسه رفيق تاج ولا
سامر.. من هوا
تهاني.. هذا اللي حاول....
تاج.. تهاني خلاص
سامر.. تعالي حنين ردي وع اساس انك الوسخة اللي داخل
حنين.. الو
رفيق.. خيرك عطلتي هذا ع اساس تبعتيلي الصور باش نكملو
حنين.. اي صح كيف حصلتهم
رفيق.. تأكدتي انه البوم العرس نفسه اللي فيه كل شي
حنين.. اي هوا
رفيق.. خيره صوتك متغير
حنين.. لالا عادي
رفيق.. وين نتلاقو
حنين.. قبل كل شي شن حدير بيهم الصور
رفيق.. حنبتزها بيهم واضح من اللي يرضا ع روحه الفضيحة وهكي حديرلي اللي نبيه
حنين.. به دير مكان نتلاقو فيه
وصكر الخط وسجلو المكالمة كلها
حنين.. ووه قريب متت
تاج.. استغفر الله علاش ادير فيا هك شن درتلها اني
هدي.. متزعليش روحك اهو ربي كشفها قبل مدير عملتها
كمال.. اهو توا ماشي ل بوها يشوف حل ل مصيبته
طلع كمال ل خوه وصغار خوه وحكالهم كل شي وبالدليل
عيونهم تعبو شر لانهم تعبو منها ومن عمايلها، مش اول مرة اديرلهم حاجة هكي وتنزل روسهم ف الارض، جو خوتها الزوز فتحو عليها وبدو ضرب وهما متحشمين من حوش عمهم لين اغمي عليها
كمال.. خلاص راك تقتلها
خوها.. هادي القتل شويا فيها نزلت روسنا ف الأرض معاش قادرين نقابلو الناس منها اخر شي تطلع تبي تفضح البنت
خوها التاني.. حقك علينا واني اللي بنربيها المرا هادي والله جنخليها تجي تبوس رجليك
كمال.. حافظو عليها راهي مهيش صغيرة
خوها.. ان شاء الله ياعمي بالله سامحنا وحتا مرت سامر تسامحنا ع اللي داراته هادي
سامر.. مسامحين بس اخر مرة حنغفرولها
بشري من قبل مدايرة الف حاجة ل اهلها وطبعا قبل كان سامر نوعا ما مايللها يبيها بس شافها طالعة مع ولد هذا قبل حتا متتزوج ونحاها من راسه، تزوجت واطلقت وحطت ف راسها تجذب انتباه سامر بس مقدرتش
روحو بيها ودمها سايل حتا مستشفى مرفعوهاش الا لما قعدت يومين دايخة قررو يرفعوها
اما رفيق اتصل ب بشري اكتر من 50مرة بس بدون رد لين ردت حنين واتفقو علي مكان باش تسلمه الصور
كلمو مركز الشرطة وحكولهم وحيقبضو علي رفيق ف الوقت اللي حيجي، وفعلا كان غبي ومشي من دون حتا ميقعد يستناها ف سيارته او شي نزل وقعمز ودقايق بس قبضو عليه...
سماح اللي مش ام اصلا عامر معاش رجعلها وهيا حاسباته قاعد محبوس لين جي ف اليوم هداكا وكانت رجله مقطوعة
بعد طلع مشي ل حوش صاحبه وقعد فيه ونحرقت رجله ممشاش المستشفى وغفل علاها بعدها باسابيع مشي وكان الدكتور معنداش حل تاني الا انه يبترها
دنيا والاء معاش ينزلو ابدا ل سماح ولاحتا ولادها يكلمو فيها قعدت بروحها ومع هذا ضميرها مكانش يأنب فيها ابدا
جاها عامر ورمي عليها الطلاق بالثلاتة وطلع يعكس ع رجل وحدة....
بعد بأيام كنت بنمشي ل حوش بوي بنهدرز ع نساوين خوتي ركبت طول وهدرزنا وجونا حلو وروحت من دون حتا منشوفها
بدي بعدها عرس سليم واني وتهاني ف الشهر الثامن الكل فرحان الكل سعيد والكل ناسي همه بس بيفرح ل سليم لان محبوب ف العيلة كلها
تم العرس اللي كان روعة والعروس اللي طلعت اروع نصيبه كان حلو يجنن ❤️
يوم طبعا كنت ف نهاية الثامن ومنقدرش نركب دروج باش نتلاقو مع نساوين خوتي قلنا نقعمزو ف حوش بوي فتحنا الباب هبت علينا ريحة مقرفة دنيا تقول اكيد مش منظفة الحوش وتهاني تقول مرات فيه شي غلط بس تعرفو خشينا الدار لقيناها ميتة💔اكبر صدمات حياتي مع ان منحبهاش ولاعمري حسيت انها امي بس ف الاخير عمره ما الدم يولي اميا، ربي يسامحها بس تعرفو اللي يسخف انها ماتت ومحد جنبها ماتت ومحد قاللها انطقي الشهادتين ماتت ومفيش حد من ولادها مسامحها ماتت بروحها
جت الاسعاف والحوش تعبا بالناس وع قد ماحاولو انهم يقيموها مقدروش علاش؟ لان لحمها كان شبه متفتفت مقدروش حتا انهم يغسلوها زي ميغسلو الميتين العاديين
ماتت امي ورفعت معاها كل شي الكل يقول الام جنة الام ف الحوش نعمة هذا كله محسيتش بيه ولاعمري حنحس بيه
ايوتة:هلبا تعليقات شفتهم والرسائل ع الخاص يقولو ان القصة مش حقيقية وخيال وووو
تعالو نقوللكم حاجة، سماح كانت مثل بس احني خديناه ع الام اللي مفيش ف قلبها رحمة لو انكم تسمعو اللي اني نسمع فيه كل يوم من قصص يمكن تتمنو ترقدو معاش تنوضو من الصدمات
فيه امهات قسوتهم وقلبهم الأسود ع صغارهم يخلوهم حتا يقتلوهم مش ادير اللي داراته سماح بس.....
اما اني وسامر حياتنا مشت زي منبو وجبت ولد يجنن نسخة من بوه قداش فرحت بيه هلباااا، جبنا اني وتهاني ف نفس اليوم بينا 5دقايق بس اني جبت ولد وهيا جابت بنت
حياتي اكتملت ب سامر وولدي وعيلتي الثانية اللي عطاهالي ربي بس فيه غصة في القلب محد حيحسها لما نشوف ف هدي كيف تعامل ف بناتها ونذكر معاملة امي لينا بس ربي عوضنا ب هدي وكمال احلي ام واب ❤️
حنين وحنان تعرفو انهم تزوجو صغار عمهم خوت بشري محد شاف للعداوة او اللي داراته بشري وقريب فرقت العيلتين بس جو من الباب وخدوهم والزوز حوامل❤️
سليم حتا هوا فرحان بيطير ب مرته اللي كانت طيبة لدرجة لاتوصف وتوا حامل❤️
بشري طبعا زوجوها خوتها ل واحد متزوج وسكنها مع مرته الاولي ومن كثر الهم والاهانات اللي تاخد فيهم انتحرت💔
سامر اللي ع قد منقول او نحاول نكتب عليه منوفيش حقه عرفني جهة ثانية من حياتي كانت غايبة عليا احلي شي صارلي ان حفظت القرأن وهذا كله يرجع ل ربي وبعدين هوا اللي ساعدني ومكانش زي الأشخاص الملتزمين اللي نسمعو بيهم كانت معاملته حلوا وعرف كيف يوصلي الدين صح وحببني ف كل شي اني درته ومزال حنديره
هادي نهاية قصتي اني تاج اللي من صغري مشفتش شي حلو ف حياتي وكنت نعيط ومش عاجبني ربي اعطاني راجل يخاف عليا من الهوا واعطاني ولد يجنن❤️
#النهاية
الحلقة اطول من يوم الجمعة ف الحظر😂
شن رايكم ف الرواية❤️حنقرا كل التعليقات 🥰
