#ملتزم_وعشقته ❤️
روااااايات ايوتة 😍😍😍
الحلقة العاشرة
اليوم شهر فات شهر وحالي ميعلم بيه الا ربي لاناكل لانشرب ورافضة نهائيا ََان نكلم حد بس ف الوقت هذا عرفت اني حامل شي مفروض نفرحله ويكون اسعد اخبار حياتي بس مع هذا مفرحتش، تقدرو تقولو خشيت ف حالة نفسية
هدي.. شنو توا
كمال.. ولدك بيقتلني ع اخر الزمان ليه شهر توا مليشي إثر
هدي.. قريب نموت علي هالمسكينة الملوحة
كمال.. نصيبها شن بنديرو
هدي.. برو انتو ساهر وسليم زيدو دورو
سليم.. امي شن ندورو مستوعبة ان كل يوم نطلعو ونروحو ب ولا حاجة خلاص مهوش صغير تو يروح
هدي.. اهو شهر ولاروح
ساهر.. خلاص امي هوا اذا مسخفش عليك فوتيه يعرف طريق الحوش كان بيروح
كمال.. كلام ولادك صح بري جيبي البنت تقعد اهني خير مدير شي ف روحها
هدي.. مش راضية انها تطلع ولاتشوف حد
ساهر.. حتا تهاني مشت مخلتهاش تقعد حالها كل يوم للأسوء
كمال.. ربي يهديه ربي يهديه
ف مكان ثاني مختلف تماماً
رامي.. مش ناوي ادير حل
سامر.. حل شنو اللي بنديره
رامي.. تشوف ف حالتك تشوف ف روحك كيف مولي، شعرك لحيتك اللي تخوف شن جاك مش هذا سامر صاحبي اللي يهتم بكل تفاصيل اناقته
سامر.. شهر ياصاحبي شهر مشفتهاش
رامي.. ارجع باهي ارجع واكيد تلقاها تستنا فيك
سامر.. قلبي يقولي تاج مديرهاش وتخوني عقلي يقول اديرها علاش لاا
رامي.. تبع قلبك هوا الصح
سامر.. مش ديما القلب صادق، مرات من كثر الاغلاط ف الناس اللي تحبهم مش مستوعب فكرة انهم يخونوك
رامي.. بس انت ديما تقولي البنت مفيش منها البنت كويسة ومريحتني وصاينتني
سامر.. هذا اللي شفته والمفروض نكون متوقعه بس مصارش
رامي.. به نتجاوزو موضوعها البنت فكرت ف امك وخواتك وبوك وخوتك شن بيكون صاير فيهم
سامر.. عارف انهم خايفين وانهم ممكن حتا مش راضيين عليا بس معنديش حل تاني الا اني نبعد عن العالم كله
رامي.. الله يصلحك ياصاحبي
سامر.. قريب يأذن المغرب خلي انوضو نصلو
صلو الزوز وقعمز سامر ع البحر وشد مصحفه زي ماتعود ويقرا ف القرأن ويختم بأسمها
اما اني كنت نفس حالي قاعدة ف داري انوض نصلي ونقرا قرأن بعد كل صلاة زي ماعودني سامر وتعودنا بعد يروح من الجامع نقرو مع بعض
هدي وكمال شبه بدو يتناسو ف الموضوع وشافو ان كلام سليم وساهر صح ان هوا مش صغير ومسؤول على روحه وقراراته
معاش طلعت من الحوش ولافكرت ان نطلع وصكرت فوني معاش نبي ازعاج ابدا
ساهر طلع يومها مشي ل صحابه
اسعد.. وينك غايب حتا تلفوناتك مصكرات
ساهر.. الحوش متفركس ومش قادرين نديرو شي
اسعد.. شن فيه صاير حاجة
ساهر.. خوي مختفي معاش عارفينه حي ولاميت مواضيع صايرة
اسعد.. من خوك
ساهر.. خوي سامر
اهني اسعد بدي يربط ف الأمور ببعضها وعرف اكيد ان من رفيق صار هكي، اما رفيق اللي مقعمز معاهم ومتكلمش وداخله قريب يطير من الفرحة ان خططه نجحو ويفكر شن هي الخطوة الجاية
اسعد.. ان شاء الله خير
ساهر.. هيا متبو شي
اسعد.. كيف وصلت خيرك
ساهر.. بنروح تعرف الجو ف الحوش غير جيت نشوف فيكم ليا فترة مجيتش
اسعد.. مقصرتش والله
ساهر..تم نتلاقو
طلع ساهر من جنبهم وركب سيارته ومشي
اسعد.. ياسر خاف ربي
رفيق.. قاعد مدرتلها شي
اسعد.. شن مزال بدير مسمعتش ساهر شن قال
رفيق.. سمعته وميهمنيش يعني
اسعد.. انت مزلت تحبها
رفيق.. اني منحبش وانت عارف
اسعد.. خليها ف حالها كيف كانت عايشة كويسة مع راجلها وجيت خربت والراجل هج
رفيق.. اني مزلت مدرت شي باش تقولي الكلام هذا
يأس اسعد من رفيق وهوا مش عارف من وين يجيبها، يخون رفيق ولايخون ساهر!
مع الوقت نوعا ما بديت نتأقلم يعني اني بريئة وعارفة وواثقة من نفسي قررت ان خلاص هوا مرضاش يسمعني تم ينتهي من حياتي شخص شك فيا ولو شويا
نضت لميت حوايجي كلهم حطيتهم ف السيارة وطلعت بدون منقول ل حد
عارفة لو قلت مش حيخلوني بس هكي ينحطو قدام الأمر الواقع
وصلت حوش بوي اللي نكره نمشيله بديت نكرهه ومعاش نطيقه بس ركبت طول ل دنيا عارفة ان احمد ميروحش توا
دنيا.. شن الشنطة هادي
تاج.. خلي ناخد نفس ونقولك
دنيا.. متقوليش تعاركتو نهارك
تاج.. تو نحكيلك، حكيتلها القصة كلها
دنيا.. وشن حديري
تاج.. اللي ميصدقنيش ميلزمنيش وعارفة روحي مدرت شي وتوا يبان الحق
دنيا.. متنسيش انتي مش بروحك
تاج.. وكان يعني اني منرضاهاش لروحي ان يشك فيا هكي
دنيا.. ارتاحي وساهل
تاج.. حنزل معاي كم حاجة فكيني من امي واسألتها
دنيا.. تمام ومش حنقول شي قدامها
تاج.. هيا ننزلو
نزلت اني ودنيا وطبعا تعرفو استقبال امي مش جديد
سماح.. شنو زوجتكم مش باش كل دقيقة جايتني وحدة
تاج.. اعتقد انه حوش بوي وقت نحب نجيله لاانتي ولاغيرك اديري شي
عامر.. لسانك طول شن قصدك
تاج.. قصدي اللي هوا وافهمو زي متبو ميهمنيش
سماح.. هذا هوا لاتربيتي لاشي
تاج.. بنخش داري مش ناقصة ازعاج
خشيت وراسي بيتفجر نفكر كيف حنكمل الايام معاهم وهما كل مايزيدو ف التلقيح
ساهر.. قالت تهاني انها مشت حوش بوها
هدي.. يانهاري الاحرف من وين بنجيبها توا
سليم.. خليها مرات تبي ترتاح
هدي.. نعرفها مدام مشت معاش حتولي
سليم.. علاش هذا كله تو ترجع اكيدا تبي شوية وقت بعد اللي داره ولدك فيها
هدي.. يارب صبرني عليهم معاش قادرة
ساهر.. اهدي ياامي تو نلقو حل
هدي.. كان فيه حل راهو مش واصلين للمرحلة هادي
سليم.. تو يحلها ربي من عنده
فات يوم واتنين وثلاتة وليا شهرين عند امي متحملة الإهانات والكلام اللي يغم القلب اخر شي ركبت حوش احمد وقررت ان نقعد فيه احسن من هذا كله
سماح.. افتحي البااب
دنيا.. خيرك تخبطي شن فيه
سماح.. هديكا وين
دنيا.. هيي انتي متحسابينيش بناتك اللي ساكتيلك لالا راهو ساكتة ب مزاجي احترمي
سماح.. لا والله مناقص غير تضربيني
دنيا.. غير عيب بس، شن تبي اختصري
سماح.. حوش ولدي نجيه وقت منبي
دنيا.. هه لالا هذا مش عليا حوش ولدك اي لكن تجيه هكي وتبي ادفي الباب برجلك لالا مش دنيا اللي تلعبي معاها
سماح.. متخلينيش نوريك وجهي الثاني
دنيا.. شن بديري مثلا ََ، خلاص متحملاتك بالسيف بنتك لما كانت عندك مدرتي فيها خير توا جاية ع اساس تبيها
اما سماح دفتها وخشت دنيا جت ع الطاولة حست انها داخت جي راسها ع طاولة المرش اللي ف الممر وبدت كلها دم
الاء كانت نازلة وشافت هذا كله وبدت تعيط
تاج.. شنو الاء خيرك تعيطي
الاء.. دنيا دنيا
تاج.. هييييي دنيا دنيا كلميني تسمعي فيا
دنيا كانت شبه فاقدة الوعي خشيت لبست بسرعة وطلعت رفعتها المستشفى اما امي مدارتش اي ردة فعل نزلت ولاكأن صار شي
وصلت المستشفى دخلوها اسعاف كانت فاقدة دم هلبا
خشت العمليات واحني علي اعصابنا بعد شويا اتصل احمد وكان سامع من امي وجي المستشفى
أحمد.. من اللي وصلها للحااة هادي
تاج.. هادي امك اللي دفتها
احمد.. متأكدة امي
تاج.. اهي الاء جنبك امي هي اللي خلتها هكي يعلم ربي تعيش ولا
احمد.. معاش عرفت من وين نجيبها معاش عرفت
الاء.. اهدا شويا تو تنوض مفيها شي
احمد.. معاش متحمل امي بكل
تاج.. هوا فيه حد متحملها
الاء.. خلاص اهدو توا ان شاء الله تنوض مش صايرلها شي
بعد تقريب ساعة طلع الدكتور
احمد.. شن فيها يادكتور
الدكتور.. فقدت دم هلبا نتيجة الضربة اللي علي راسها قدرنا نخيطو الجرح تبي راحة تامة، وللأسف مقدرناش ننقذو الجنين
احمد.. كانت حامل!
الدكتور.. اي من شهرين بس من قوة الضربة وانها طاحت مقدرنا نديرو شي ربي يعوضكم
مشي واحني ف صدمة من اللي سمعناه وهك زاد كرهنا لأمي اكتر واكتر احمد بالذات اللي ف عيونه حزن وشر ف نفس الوقت
تاج.. مزلتو صغار تو ربي يعوضكم بدل الولد عشرة
احمد.. اني اللي كنت نتمنا يجيني ولد ولابنت يملو عليا فراغي ولما صار امي ادير هكي
الاء.. امكم تمادت هلباا ضروري حد يوقفها
تاج.. من اللي حيوقفها اذا خوالي قاطعينها من لسانها
الاء.. اي حد كبير يكون هوا صاحب الامر
تاج.. مفيش من يقدر عليها امي هكي
احمد.. حنديرلها حد المهزلة هادي
تاج.. خلي توا تنوض دنيا بخير معاش نبو شي
احمد.. يستر الله وخلاص
واضح ع احمد اليأس والملل من امي وتصرفاتها كل شي كان يتوقعه الا انها ادير هك حتا لو مكانتش قاصدة، ثاني يوم مشي أحمد ل خوالي يمكن يلقي عندهم حل بس للأسف كان جوابهم ان احني متبريين منها من لما خدت عامر وطلعت عن شورنا
وقتها بدل مسؤولية احمد ومحمود انهم يوقفو امي عند حدها ومعاش تتمادا مع حد
يتبع....
سامحوني ع التأخير امس منزلتش❤️❤️🥰
تعديل :التأخير مش مني من امس العصر حطيت الحلقة وتوا بس وافقو عليها❤️
وحنزل حلقة ثانية ان شاء الله 😍
