جوهرة الموصل

ضحيه

كمت طلعت لغرفتي وصرت ابجي بحركه عليها مدري على روحي وحظي المصخم الي مخلاني اتهنى بالعشك
ميسم ' بداخلي نظرة تشفي بجاسم ع الي دا يصير بي
وانتصار على جوهره
اكليها ست جوهره هذا مصير اليلعب وي ميسم

جوهره ' مر ثلاث ايام ع المشكلة واني حالي ميسر عدو ولا حبيب وام جاسم وبيت طه تغير تعاملهم وياي ١٨٠ درجه
توقعت هالشي بعد الي شافو والسمعو طبيعي يتغيرون اي واحد بمكانهم راح يصدك اني بت شارع وحراميه وووو
بس مريم ماتغيرت اتجاهي وهي الوحيده الصدكتني وبقت
بجانبي خطيه اداريني واجيبلي الاكل
كمت توضيت وصليت ركعتين
يارب حتى الموت هواي علي لو ميته ومرتاحه ورايحه لاهلي ولا هاي العيشه المره الكلها قهر ومذله

جاسم ' جنت اسمعها واني مقهور من كلامها وهي تدعي على نفسها بالموت بس رجعت حقدت عليها اكثر من تذكرت كل افعالها
طبيت عليها وحذرتها

اسمعي يبت الناس باوعتلها بنظرة استحقار من فوك لجوه اقصد يبنت الشارع انزعي هذا اللابسته ميلوكلج دور الشرف
تبقين محبوسه هنا لاطلعه لاطبه لاكلام الج وي اي كان حتى حسوني الصغير ديربالج توصليله لحد مانشوفلج حل ونخلص من عارج
جوهره ' هو يحجي واني عيوني بعيونه والدموع تصب معقوله هذا الكلتله احبك هذا الامنته على گلبي ومشاعري واعتبرته سندي

جاسم ' اباوع بعيونها نظرة عتب وكلام مايخلص رجف كلبي واني اشوف عيونها ذبلانات من البجي ووجها اصفر
كلشي بيها تعبان درت وجهي عنها حتى لا اضعف وطلعت

ميسم ' اووووف ربي بس لا كل هذا التعب ويروح ع الفارغ لازم اطلعها من البيت وبأقصى سرعه كعدت افكر بطريقه لحد مالكيتها
رحت فتت على جوهره للغرفه وسويت نفسي خايفه وكلتلها

وج جوهره الحكي جاسم حالف الا يكتلج حلال بعد السويتي وشفته هسه جاي يطلع سلاحه
جوهره ' انكلبت صفره وجمدت من السمعته
ميسم ' ولج هي مال صفنه كومي اشردي ترى والله يذبحج حلال
جوهره ' ركضت من خوفتي لبست عباتي والنقاب ونزلت ركض واني حافيه احجي بداخلي واكول
لهنا وخلص اني عشت طول عمري معززة مكرمة يم اهلي ولا بيوم سمعت حجايه من احد ' الدواعش بكبرهم ماكدروني يجي جاسم من تالي وكت يذلني ويهيني وفوكاهه يريد يقتلني
مو اني التقبل بهذا الشي وانعل ابو الحب المصبرني علي

ميسم ' استغليت وقت ظهر وكلها نايمه ونفذت البراسي وخلصت منها روحه بلا رجعه

جوهره ' من خوفتي طلعت حافيه والدنيا حاره تموت حرت وين اروح ومنين اجي كلتله ربي ماعندي غيرك واني مضلومه وانت عادل وماترضى بالضلم انصفني يارب
مشيت تقريب ربع ساعه ولمحت كبالي سيارات الكاظم عليه السلام كلت اتوجهله ماعندي غير حل مشيت لان ماجان عندي فلوس اركب ' بقيت امشي لحد ماوصلت دخلت سلمت زرت وكابلت الشباك لزمته وبجيت بحركه