جوهرة الموصل

سعاده ابديه

جوهره ، آني جنت اعرف بهالشي لأن صار كبالي بس أتأملت عيوني تچذبني والكا حي بس مو كل النتمناه يصير دمعت عيوني ومر عليه المشهد بكل تفاصيله
جاسم ، ماحبيت تسمع الخبر بنفسها ولا ردت اشوف دموعها لو حزنها بس هذا النصيب والكاتبه الله ،
شوي وحسيتها داخت من الصدمه انتجت عليه وكعدناهه ابيت هذا الرجال الطيب الي اصر نبقى على العشا يمه عرفنا بيها على عائلته

وجوهره راحت ترتاح شويه هي وزينب
بقى يحجيلنا على وضع الموصل والاحداث الصارت صدك وضع يشيب الطفل وقصص تقهر وره العشى أستأذنا وطلعنا للبيت على أمل باجر نكمل البحث لأن أبو إحسان انطانا رقم تلفون شريك والد جوهره ، جاي لهنا قبل فتره على امل يتواصل وي احد من اهلها وتارك رقمه

جوهره ، صار الصبح كعدنا تريكنا واني كوه ابلع اللكمه من قهرتي على أبويه بعدها بدلنا وطلعنا
جاسم ، حبيبتي الموت علينا حق وهذا قضاء الله وقدره لاتبقين هيج والله مااتحمل اشوفج بهالشكل
جوهره ، مااكدر  ابويه تعرف شنو ابويه ، اني خايفه لا امي لاقت نفس المصير ....
جاسم ، لا ان شاء الله طيبه وتشوفيها وتملين عيونج من شوفتها

وصلنا للمكان بعد ما اتصلت بالرجل واخذت العنوان التقينا بي ورأسا عرف جوهره سلم عليها واخذ من خاطرها على وفاة والدها

جوهره ، عمو انت اجيت خلال الاحداث لبيتنا وسألت عن اهلي
ابو عمر ، اي عمو اجيت وملكيت احد وعرفت من الجيران انه والدج استشهد بالاحداث رحمة الله على روحه وامج مختفيه ومارجعت للبيت بس عايشه
جوهره ، يعني امي عايشه ، سمعت جاسم امي عايشه
جاسم ، اي حبيبي سمعت بس انتظري نفهم الباقي ، يعني عمي انت هم شفت امها او صادفتك واتاكدت هي عايشه لو على كلام الناس مشيت
ابو عمر ، لا والله عمي على كلام الناس كالو شايفيها
جوهره ، بس هيج يعني انت ما شفتها ، الله يخليك عمو جاوبني فدوه جاوبني امي وين
جاسم ، جوهره فقدت وبقت تتوسل بالرجل على اي شي يدليها على امها حتى لو وهم
اخذتها لصدري وبقيت اطبطب عليها اشششششش ياروحي نلكاها وعيونج نلكاهه
ابو عمر ، والله ياعمي هذا كل الاعرفه ولو لكيت شي جديد انتي اول الناس ابلغهم ، اني ردت اشوفج لأن قررت اسافر اني وعائلتي برا البلد وبعت المعمل وكلشي بس جنت رايد انطيج نصيبج

جوهره ، شفت الرجال طلع اوراق تثبت ملكية بابا بالمعمل وهي النصف مع ابو عمر وكلشي موثق وبما يرضي الله بما أنه آني الوريثه الباقيه ووصل بي المبلغ الكامل
اتشكرت منه ورجعنا بعدها للمنطقه وللمكانات الاعرفهن نسأل وندور بس ماكو شي رجعنا خايبين الامل

جاسم ، الاحد الصبح جان وقت رجعتنا قفلنا البيت وتحظرنا وبطريقنا مرينا على السوك ناخذ اكل للطريق بس جوهره ولا يمنا فاصله بغير عالم واشوفها تباوع بالوجوه تستجدي وجه أمها بين الناس
اووووووووف شبيدي عليج يانظر عيوني