جوهرة الموصل

حياة جديدة

ام طه ' يمه ميسون حضريلنا لكمه ناكلها بين ما اصلي
ميسون ' صار عمه

جاسم بعد ما وصلت الجماعه رحت سبحت وبدلت وصليت تمددت بغرفتي حتى ارتاح  اجت ابالي البنيه وعيونها الذبلانات وبجيها اكيد عدها سر هجي مخليها محروگة گلب
غفيت واني افكر بيها  فزيت على صوت اختي ام محمد تكعدني ع العشا نزلت شفت البنيه كاعده وشايله النقاب من وجها

بقيت صافن لا اخذ ولا انطي من الشفته سبحان الخالقها على هالجمال بيضه بعيون زرگ والشفايف مرسومه وتدويرة الوجه وحمار الخد سبحان من صور ايه من الجمال رغم كل التعب المبين على وجها بس حلوه
انتبهت على محمد ابن اختي يصيح بيه خالو خالو العشااا
جاسم ' اي اي

ميسون ' حبيبتي خل اعرفج على عائلتنه هاي والدتي ام جاسم  واني ميسون ام محمد
وهذا اخوي جاسم الزغير والدي متوفي
وهذولي اولادي
محمد ' مرحله اولى كلية الزراعة جامعة بغداد
مريم ' صف سادس علمي
مها ' صف رابع عام
و حسوني بزر الكعده صف ثاني ابتدائي

وانتي منو ومنين ماعرفتينه بنفسج
جاسم ' باوعت لاختي ميسون بنظرة استغراب شلون هجي تحرج البنيه بهالسؤال يجوز متريد تحجي
ميسون ' لاتباوعلي هجي البنيه منعرف عنها شي ومن حقنا نفتهم صح لو اني غلطانه يوم
ام جاسم ' صح يمه البنيه مهمى الكان تبقى غريبه ولازم نعرف سالفتها
ام طه ' هذا شلون حجي البنيه اني اعرفها واضمنها الكم ماله داعي كل هالهوسه

جوهره ' لاخاله خليهم يسألون هذا اقل شي اكدر اسوي بعد كل هالكرم والمعاملة الطيبه الشفتها  منهم

اني جوهره من بغداد وتحديدا من منطقة البنوك  جنت عايشه اني واهلي بسلام الى ان انقل بابا للموصل بحكم شغله
رحنا وانقلت هناك وكملت دراستي لصف خامس إعدادي وبأثناء العطله الصيفيه دخلو داعش علينا '
بابا انقتل اثناء مقاومته الهم وماما تصوبت والله اعلم اذا كانت عايشه او ميته اما اني انسبيت وذقت اقسى انواع الذل والعذاب الى ان يوم اجا الامير مالهم واخذني غصبا عني قاومته بكل مااملك من قوه
لحد ما قتلته وشردت والله من فوك نصرني وخله بيت ام طه كدامي
اعتنو بيه وأووني عدهم
وابو محمد الله يجزي الخير جازف بحياته حتى يطلعني من الموصل والحمد لله كدرت اطلع بدون خساير

كملت كلامي واني احس عيوني نشفت من كد مابجيت

رفعت راسي واني اشوف ميسون  حاضنتني وتبجي وياي وهي تسب وتلعن بالدواعش ياحبيبتي الله يساعدج شكد شفتي ضيم بحياتج

جاسم ' بقيت صافن عليها وهي تحجي واني وي كل كلمه تكولها كلبي ينعصر الف عصره واحس النار تطلع من راسي
لتخافين انتي هنا بأمان ومحد يكدر يوصلج او يمس شعره من راسج وبغداد امان مو مثل الموصل يعني نامي رغد
شوي ودك تلفوني يبلغوني طه متصوب
اني ماحسست احد لان ادري بيهم اذا يعرفون يتخبلون استاذنت غسلت وطلعت عود لصاحبي