دوبامين ❤️✨

4

دوبامين 4 ♥✨

بقلمي: تسنيم النور

في يوم عصريات كدا أخواني بلعبو انا ماسكه كتابي بقرا، غياث جا ينادي امو ال كانت معانا وكان ماسك في ايدو شيت كدا كلو انجليزي ومجغمس كيف كيف 😹 وبقرا،" حرفيا بقينا زي العيله الوحده ودي ميزه حلوه شديد في سكن القرى💜" ناس خالتو سعديه وحبوبه امنه بشربو في شاي احمر  وامي بتغسل في العده، باب الشارع دقا مشيت فتحت لقيتو ابوي  جاء داخل البيت شايل ليهو كيس بسيط كدا حق خضار  وشكلو مبسوط...

من الفرح قال السلام عليكم ولا لحق زاتو يسمعنا واحنا بنرد السلام مشي علي المطبخ علي طول محل قاعده امي وبقي يقول ميمي يا ميمي باركي لي ياخ انا خلاص لقيت شغل خلاص حشتغل يا ميمي 😍❤️ امي من الفرحه لمن دموعها جرو وحبوبه مافضل ليها الا تزغرد 😹 وخالتو سعديه زاتا فرحت معانا وبقت تقول الحمدلله الحمدلله، بتذكر ابوي بعد طلع من امي جانا وكان شايل في يدو حلاوه مصاصه النوع الرخيص داك بس بالنسبه لينا كانت كافيه انتو تبهرنا " حرفيا كان بتنطبق عليهو مقوله الاب البقطع من لحمو عشان يأكل اولادو" المهم وزع لينا الحلاوه كلنا وادي التوم وحثي غياث 😹 غياث قال ليهو يا عمو عبد الرحمن انا ما كبرت علي حلاوه مصاصه دي لكين ؟ ابوي قعد اضحك قال ليهو ياولد ها انا زاتي اسي كان لقيت طريقه باكل معاكم 😹  كلنا بقينا نضحك علي كلام ابوي، غياث شال المصاصه واستأذن وطلع وكان تقريبا احسن يوم لينا في الشهر دا وبيتنا كلو مبسوط، شويه كدا المغرب اذن ابوي وغيث وياسين وانس مشو الصلاه، وخالتو سعديه قالت ماشه بيتهم الليله راجلها جاي من السفر، استأذنت ومشت، بعد صلينا حبوبه مسكت سبحتها وقالت لي امي يا ميمي يابتي رايك شنو الجمعه الجايه نوزع بليله وشربات كركدي في الجامع الحصل لينا دا ما شويه والله التقول عين وصابت عبد الرحمن 💔 امي قالت ليها ابشري نوزع طوالي وربنا يرفع عننا البلاء، شويه كدا ابوي وانس جو داخلين ليلتنا ديك كلها قضيناها ونسه وضحك وانا وانس شبه اتأقلمنا علي الوضع بي مساعده التوم وغيث، دانا ما فارق معاها كتير و السنه دي اخر سنه ليها في  الروضه 😹💔 فصيحه فصاحه وكل مره جالده ليها بت  😹، نمنا واي زول شايل في قلبو احلام وامال....
الصباح بدري اذان الصبح ابوي صحي مشي المسجد ومعاهو انس كان متحمس شديد للشغل الجديد،  بعد جا اتجمعنا كلنا حولو  حولو  في شاي بالزلابيه، سرح كداا وقال لينا في شرط عشان انا اشيلوني في الشغل دا عادل "دا الراجل الهيشتغل مهاهو ابوي" قال لي لازم نعمل ليك اختبار اول عشان تستلم الشغل حبوبه قالت ليهو انت ماشاءالله يولدي يدينك تتلف بي حرير المنطقه الصناعيه حقت مدني دي كلها تشهد ليك،  امي قالت ليهو ما تتوتر وان شاء الله تقدر تجتاز الاختبار،  انس قال ليهو يا ابوي هو الاختبار عباره عن شنو بجيبو ليك ورقه يعني واقولو ليك اكتب اسامي العربات؟ 🙄 ابوي ضحك لمن شرق 😹😹💔 قال ليهو لا يا بابا هيجيبو لي مثلا عربيه هيكون فيها عطل وانا احاول اصلحها ولو صلحتها كدا يبقي انقبلت في الشغل، انا قت ليهو يابابا انت اصلا مهندس شاطر انا واثقه فيك 😘💙، ابوي عاين للساعه وقال لينا يلا اتأخرتو   بعد كدا المدارس يا اولاد، واحنا طالعين صادفنا غيث والتوم قدام بيتهم صبحنا عليهم ومشينا كلنا لحدما وصلنا حتات بنركب المواصلات غيث كان قاعد جمبي وبقي اسال فيني المدرسه و...... و.... ،قت ليهو الحمد لله بس الرياضيات دي كريهه خلاص قعد اضحك قال لي يا ستي ليك علي اي حاجه غالباك هاشرحها ليك كدا مرضيه يا غزالتي؟ 😹❤️ حمرت ليهو قت ليهو يزول ما تقول لي غزاله اسمي غزل غزززززززل ، قال لي انتي اسي خليتي الرياضيات الانا هشرحها ليك وعلقتي في غزاله دي 😹 المهم انا زاتو بعد كدا محطتي قربت، وزي ما قت ليك ما هأخليك وهاشرح ليك كل شي غالبك حلو؟ قت ليهو حاضر ، مد لي شكلاته كدا قال لي يلا  هاك جبتها ليك من امس ونسيت اديك ليها، طقطق للكمساري عشان ننزل محطتنا ودعتا بابا  و نزلنا انا وانس والتوم  وبقيت ماسكه شكلاتتي و  اتبسم براي، مشينا علي المدرسه علي طول، كان عندنا ٨ حصص اخر اليوم طلعت لقيت انس مستنيني قت ليهو التوم وين قال لي فكوهم بدري ومشو، قت ليهو انس ما نفسك نمشي كداري ونخلي حق المواصلات نجيب بيهم حاجه حلوه قال لي ابيت يا زوله الواطه حاره يخ ، بقيت احنس فيهم قال لي سمح 😹 رجعنا البيت، لسا امي ما فتحت لينا الباب كويس قلعت طرحتي وبقيت اقول ليها انا جعاانه دايره اكل لمن ضحكت فيني، حبوبه ماسكه سبحتها قالت لي انتي غايتو اصلو ما بتكبري 😹 بستها في راسا وقت ليها اسي يا حبوبه الكبرو عملو شنو 🐸 قالت لي طيب في باقي ملاح ام رقيقه بي كسره في البتجاز امشي اكلي قبلت علي انس قت ليهو تاكل معاي قال لي لي ما باكل ارح 😹 اصلو ما بقول لا، اكلنا تمااام دخلت استحميت ورقدت نمتا، صحيت بي صوت ابوي وهو بكورك ميمي، يا ميمي  أمي... انتو وين، جاتو امي جاريه من جوه ومعاهاحبوبه قال ليها صلحتهااااا يا ميمي صلحتها،  صلحتا العربيه الجابوها لي كإختبار، باس راس حبوبه وقال ليها دي دعواتك يا الغاليه 🙂💙 قالت ليهو تنفتح عليك محل ما تقبل يا ولدي، قال ليها عارفه يا امي والله عادل جايب لي عربيه تقرب تكون خرده انا زاتي لمن صلحتها لما انبهر، كأنو بعجز فيني، حبوبه قالت ليهو انت اسي محتاج اتمسك بيهو لحد ما تلقي شغل احسن يا ولدي، امي قالت ليهو كلامها صح يا عبدو، اسي كدي امشي استحم وغير هدومك مسافه ما اعمل الغدا..
غززل يا غززل تعالي قطعي السلطه..
حااضر يا امي جيت جييت

يتبع...