دوبامين ❤️✨

16

❤️✨دوبامين 16

بقلمي: تسنيم النور

مرت الاسبوعين سريع ما كان في شي جديد لحدما جا يوم التقديم لبسه عبايه سوداء وطرحه سوداء وشبط فضي ومشت بيت ناس غياث عشان امشو سوا فعلا مشو قدمو وجو راجعين وبقو مستنين نتيجه التقديم بعد اقل من شهر النتيجه طلعت وشالوها.......طب جامعه الخرطوم زيما كان  نفسها، الفرحه ماكانت يايعاها وهي ماسكه تلفون غياث وبتقرا في اسمها "غزل عبد الرحمن محمد أحمد، كليه الطب، جامعه الخرطوم" سجدت سجدت شكر طوييله لي ربها، الوقت كان قريب العصر أبوها خلص شغل عند عادل وخلاص طالع وكئيب كالعاده من الشغل الكتير والمصاريف البسيطه اليدووب بس بتكفي حق أكل وشراب وغزل خلاص حتنزل الجامعه بقي يفكر حيعمل شنو وأتصرف كيف ما كان عايز بتو تحس إنها اقل من الباقين وهو ماشي كدا وبفكر قاطع تفكيرو  زول بينده عليهو.. ظهر الذهول في عيونو وهو بقول بي صوت أقرب للهمس فضل.. وطوالي مشا عليهو واخدو بعض بالأحضان  "فضل دا صاحب عبد الرحمن من لما كانو مروقين والقروش ماشه في يدهم زول هو زاتو برجوازي ويدو طايله" طوالي عزمو علي اقرب مطعم، عبد الرحمن حاول اتملص بس فضل ما خلي ليهو مجال، دخلو وفضل بقا بدردش معاهو ويسأل عن احوالو وكدا لحدما في النهايه عبد الرحمن استسلم وحكي ليهو كل شي من لما خسر بيتو وقروشو وخلاص بقا علي الحديده، فضل كان ساكت وزي الصابه فيهو مطره وبعاين ليهو كدا 😳 لا حولا ولا قوه الا بالله كل دا يحصل علي يا عبد الرحمن وما تفكر توريني ولاحتي مكالمه ساي ما تتصل علي انا فضل يا عبدو فضل 🙂 واسي انت شغال شنو وبتصرف علي بيتك من وين؟ عبد الرحمن قال ليهو شغال مع واحد اسمو عادل في..... بطلع روحنا بالشغل واخر اليوم ادي اي زول ميه جنيه ابتسم ابتسامه زول منكسر وواصل كلامو انا خلاص تعبت يا فضل والفيني كملت البت خلاص داخله الجامعه والاولاد مصاريفهم زايده الحمدلله علي كل حال.. فضل قال ليهو أبشر، عبد الرحمن قال ليهو انا ما بحكي ليك عشان تشفق علي انا بس فضفضت ليك وأبدا ما حأقبل ماديات من زول طالما قادر اشتغل، فضل إبتسم وقال ليهو ما أتغيرت يا عبدوو وعشان أنا عارف إنك ما حتقبل ماديات من زول أنا بس حأتوصت ليك لي شغل في مكان أحسن وبي مرتب مناسب، عبد الرحمن قال ليهو مابتقصر يا فضل بس فضل قاطعو وقال ليهو ولا بس ولا حاجه خلاص الموضوع دا منتهي وما تشيل هم أخر شي مرق ورقه من جيبو فيها أرقامو كلها واداها لي عبد الرحمن العاين فيها بي إنتباه كأنو بحفظ فيها ودخلها جيبو وقامو علي كدا بعد ما فضل قال ليهو حأرتب ليك الشغل واتصل عليك 💛"جيبو لي صاحب زي فضل🐸💔" عبد الرحمن رجع بيتو وهو مبسوط وما كلم زول سر السعاده الهو فيها دي شنو فضل يخليها مفاجأه...

عدا اسبوع وفعلا فضل اتصل لي عبد الرحمن ووراهو انو زبط ليهو شغل في شركه...... الهندسيه كانت شركه كبيره ومعروفه وما اي زول بشتغل فيها "فيتمين واو شغااال لكين 😹" الللللمهم تاني يوم اتلاقو في بحري ركب مع فضل عربيتو نزلو   جم شركه كبيييره ومبانيها أقل مايقال عنها فخمه فضل دخل  للمدير ومعاهو عبد الرحمن وسلم عليهو بي عرفه كدا ضيفهم عضير وبعدها دخلو في مواضوع الشغل المدير طوالي ساق عبد الرحمن علي الورش البره الكانت مبنيه بي طريقه خرافيه تحسسك أنك بره السودان من النظافه والنظام أدي عبد الرحمن عربيه أصلحها كأختبار وطلب منو يصلحها بعد ساعتين بالزبط عبد الرحمن انتهي وكانت بالنسبة ليهو زي التسليه اصلا كان بحب شغلو شديد.. وطوالي تم تعيينو بي مرتب عمرو ما كان احلم بيهو وطلعو علي كدا ، قال لي فضل انا ما عارف اشكرك كيف وجميلك دا انا عمري ما حأنساهو 😔💙 فضل قال ليهو يا زول احنا اخوان وعشره سنين وانا ما حصل احتجتك الا ولقيتك في ظهري خليك من الكلام دا كدي ووصف لي ساكن وين عشان امشي اسلم علي الاولاد، عبد الرحمن ابتسم ووصف ليهو وطول الطريق يتونسو ويضحكو لحدما وصلو البيت  عبد الرحمن نزل قدامو عشان ينبه ناس البيت انو معاهو زول أختفي شويه وجاء راجل وقال ليهو اتفضل، نزل طوالي وكان شايل ليهو كيس كبييير وشكلو وزنو ثقيل شويه، سلم عليهم وغزل واخوانها جوهو جاريين عمو فضل عمو فضل.. سلم عليهم وبارك لي غزل ومدا ليها الكيس وقال ليها هديه النجاح.. أخد قعدتو اتغدا معاهم وشرب الشاي ولمن جاء مارق عصر لي أنس ودانا قروش ودعهم وطلع..

ميمي وحبوبه أمنه بي صوت واحد قالو ليهو يا عبدو لميت فيهو وين الليله الزول دا ؟ حكا ليهم القصه كلها وقصه الشغل الجديد وانو خلاص ربنا فرجها وهو هيخلي الشغل مع عادل  مريم قالت ليهو صبرت ونلت يا عبد الرحمن، امو قالت ليهو عافيه منك يا ولدي ربنا يفتحها عليك دنيا واخره 💛" دعوه الأم دي سمحه شديد 😔💙 اللهم أغفر لمن توفين منهن" دانا وانس مشغولين بي القروش الاداها ليهم فضل وغزل مشغوله بي الكيس الأنبهرت جدا وهي بتشوف في محتوياتو.. كان تقريبا فيهو كل مستلزمات الجامعه.. شنطه ظهر جلديه من معاها طقم اسبورت وجايب ليها اسكيرت اسود وواحد بيجي وكمييه من التشيرتات الراقيه وثلاثه طرح فتحت الشنطه لقت جواها دفتر واقلام وهايلايت لحد الشرابات دي جابها، إبتسمت بي فرح وطلعت بره عشان توري ناس أمها الحاجات..

في جانب غياث: كان نزل الجامعه ليهو اسبوعين وكل شويه مواعيد سفرو بتقرب متحمس وفي نفس الوقت زعلان عشان حيفارق غزل شويه ونغمت تلفونو علت كانت تذكير بي نوت هو كاتبها في مزكره التلفون بي المواعيد الحاتنزل فيها غزل الجامعه.. كان بهتم بي ادق تفاصيلها "هل لكم ان تتخيلو اعزائي السناقل 🙂" كان باقي ليهو يومين يعني واقع بعد بكره.. فكر أنو لازم أجيب ليها هديه مميزه 💙 قام علي طول بعدما اتذكر حاجه...

💜إقتباس
إنت حتشتغل بالوقت الصح ، وحترتبط بالوقت الصح ، وحيكون عندك أولاد بالوقت الصح ، واللي فات منك ما كان بينفع يبقى ليك ، واللي اخترتو ما كان بينفع تتركو ،ولو رجع فيك الزمن حتختار نفس اختياراتك ، وإنت بالمكان والهيئة اللي المفروض تكون فيها بالضبط ،والندم على اللي فات ..‏ما ليهو فايدة ، وكتر التفكير فيه حماقة وتضييع وقت ، وتخيُّل سيناريوهات بديلة والحكم عليها بأنها كانت حتحسِّن أحوالك عن اسي هو غباء فارتاحوا ، "لكي لا تأسوا على ما فاتكم، ولا تفرحوا بما آتاكم".. فما أصابك لم يكُن ليُخطئك ، وما أخطأك لم يكُن ليُصيبك♥️.

يتبع...