دوبامين ❤️✨

19

❤️✨دوبامين19

بقلمي:تسنيم النور

ماكان عندها نفس تعمل اي شي قعدت وسرحانه كالعاده وجمبها كوومه من الشيتات بتحاول تقرا عسي ولعلى تقدر تستوعب شي،جاء ابوها خاشي وشايل في يدو كرتونه صغيره مغلفه.. ختاها ليها قدامها قال ليها افتحيها، فتحتها وانبسطت شديد لمن لقتها تلفون قامت تنطط براها اخيرا بقي عندها تلفون 😹 انس طبعا معترض بس قالو ليهو لما يخلص من سنه ثامن، شالت التلفون وركبت الشريحه الجايبها ليها أبوها معاهو وطوالي أتصلت علي ريم.. أتونسو كتييير وبعد ما قفلت ريم ماخلت قروب طاير ماضافتها فيهو شي فيسبوك وشي واتساب
"الجديد شديد يخواني🐸💔" 
التلفون صح قدر أخفف عن غزل شويه بس لسه بالها مع غيااث،في يوم جمعه كدا من الصباح لقت مكالمه فايته من نِعم عرفت أنو في مووصيبه رجعت ليها طوالي نعم هجمت عليها وقالت ليها اسمعيني قالو النتيجه بكره 🐸 غزل قالت ليها أصلك فقر وما بتجيبي خبر زي الناس وطواالي عملو مكالمه جماعيه ودخلو باقي البلابل😹، أحمد يدووب كان صاحي من النوم وبعد سمع الخبر قال هو بطنو واجعاهو 😹 أتونسو تمااام وكاوو بعض وقفلو..
تاني يوم الصباح غزل اتسوكت وشربت شاييها ولبست ليها تيشيرت بيجي رااقي فيهو بالطوبي اكمامو تلات اربع ومعاهو اسكيرت اسود وجزمه سوداء شالت شنطتها ومرقت اتصلت لي ريم قالت ليها اغشيني ماف مواصلات غشتها ومشو الجامعه سوا لاقو بقيه الشله ودخلو علي محاضرتهم وهم طالعين من المحاضره شافو الناس مكومين جمب البورد عرفو انو دي النهايه 🐸😹😹💔 مشو احمد ومصطفي غطسو في نص الناس وبقو يشوفو فيهم كلهم كانت نتايجهم حلوه والحمدلله مافي زول شايل ماده هبه طوالي نطت قالت ليهم مانفسكم نحوم بي عربيه ريم بمناسبه النتيجه الزابطه دي ، ريم عاينت ليها كدا 😒 غنت ليها أعطف علي ياريم وكلهم قعدو يضحكو عليها مصطفي قال ليهم اررح انا عازمكم بيتزا في my place أحمد نط قال ليهو انا علي البارد خلاص 🐸
ركبو مع ريم وبقو مارقين قضو يوم زاابط جداا..

:بعد ثلاثه سنوات
أنس يااا أنس اطلع بعد دا عشان الحصص الصباحيه ما تفوتك، أأي يا حبوبه طالع أمي وغزل وين؟ أمك طلعت  مشت علي شغلها وغزل نايمه قاله محاضرتها  الساعه 11 بتجي ريم تسوقها ، سوق دانا معاك في طريقك وصلها ياولدي.، ساق أختو وطلع..
غزل صحت بي صوت هزاز تلفونها لقتو أحمد..
غزل: مالك يافقري ضارب لي من الصباح يخ
أحمد:حأكون اشتقت ليك يعني 🐸 شايفك ما متصله واتساب و دكتور امير دا قال هيكون عندنا لاب اناتومي الساعه تسعه قبل المحاضره
غزل لمن نطت في نص السرير وبقت تقول ليهو لا كيفن يعني  أحمد قال ليها دا ما وقت تطلعي لي فضيل الجواك تعالي سريع واتصلي لي ريم عشان قريبه ليك تجو سوا وانا بتصل للباقين، قفلت منو واتصلت لي ريم سريع سريع ودخلت اتدوشت ولبست ليها قميص كوووحلي غاامق فيهو ورود صغار بي وردي ورمادي واسكيرت كوووحلي اسبورت وردي وطرحه وردي وقفت قدام المرايه وهي بتعمل في الميكب وقفت فجأه وبينها وبين نفسها ثلاثه سنه! تمت ثلاثه سنه ياغيث وانا ماعارفه عنك حاجه ثلاثه سنه انا متعذبه لا أنت قريب القرب البخليني أكون معاك ولا بعيد البعد البخليني أقطع الأمل منك! ثلاثه سنه وانا مافي سجده سجدتها إلا كان أسمك فيها قبل اسمي بس انت💔 ونزلت دمعه متمرده علي خدها قاطع تفكيرها حبوبتها وهي بتنده عليها وبتقول ليها انو ريم جات ،مسحت دموعها سريع سريع ختت غلوس بس وكحل، زبطت ليها أيلاينر اتناولت اللابكوت وبقت مارقه...
اووووو ريم ست الحريم 🌚💛 ريم حمرت ليها وقالت ليها لا عليك الله بدري ارجعي تاني لسه شويه😒 قالت ليها هوي خلاص ما تصري لي خلقتك دي ارح حبوبتها قالت ليها هي يابتي الشاي قالت ليها حبوبه عايني وش ريم عامل كيف وحتعرفي انا لي ماحأقعد اشرب الشاي 😹، حبوبتها ضحكت وقالت ليها سمح في عصير منقه جاهز شيلي معاك كبت ليها في بوتل شالتو وبقو مارقين وريم الشارع كلو تنقنق بعد ما شربت مع غزل نص العصير، وصلو الجامعه لقو البلاابل قااعدييين في الكفتريا بشربو في شاي شكلو كلهم نومتهم اتقطعت مشو قعدو معاهم، ريم قالت ليهم اسي الراجل الفقري دا مالقي غير يوم الليله دا عشان اعمل فيهو اللاب 🙂 يخ انا مساهره نمت الساعه اتنين، مصطفي غمز ليها وقال ليها بتخلطي في منو لي الساعه اتنين قالت ليهو انت اتلهي 😒أيه وهي بتعاين للساعه : يخوانا تمو عولاقكم دا بعدين اللاب باقي ليهو خمسه دقائق والراجل دا فقري كان بقيت ابوهو وجيت بعد قروبك دخل ما بدخلك 🐸💔 قامو سريع واي واحد مسك لابكوتو في يدو وبقو مهرولين عشان أحصلو ، غزل وقفت حبه كدا، ريم قبلت عليها وقالت ليها الصداع تاني صح؟ هزت راسها بمعني ايوه جرتها من يدها ومشو سريع سريع وريم بتردح ليها ياهو ياغزل من التلفون أربعة وعشرين ساعه ماسكاهو انتي يخ ما بتزهجي؟ غزل قالت ليها حركات امي دي خليها عليك الله 🙂 قالت ليها والله اراهن انتي عندك مشكله في عيونك وياستي بعدين نمشي مستشفي مكه نشوف الحاصل شنو، غزل قالت ليها يخ ها ولامكه ولا المدينه ما تكبري الموضوع، ريم قالت ليها لكن انا ما بستشير فيك أنا بوريك بس عشان ما تربطي نفسك مع زول، دخلو اللاب خلصو و اخدو ليهم بريك زي عشره دقايق وبعدها دخلو محاضرة الساعه 11 كانت طويييله والدكتور نقناق وكلامه كتير طلعو وحده ونص ريم عاينت للساعه وقبلت علي غزل قالت ليها بعد دا المستشفي ماحتكون شغاله حأجيك بكره الصباح بدري نمشي  الساعه سبعه القاك جاهزه 😒 لملمو حاجاتهم صلو الظهر وقعدو عطلو حبه بعدها اي واحد مشا علي بيتو..
غزل اخدت ليها نومه وصحت لقت امها بترص في الغداء ساعدتها ورصو الغداء وقعدو ياكلو سالت انس أها المدرسه ماشه كيف والامتحانات قال ليها زابط كلو لحدي اسي ابوهو قبل عليهو وقال ليهو عايزك زي اختك ترفع راسي 💜أنس قال ليهو ياحاج عايز هندسه معمار انا أبوهو قعد يضحك قال لي انا اسي قت ليك خش طب، حبوبتو قالت ليهو ربنا يوفقك ياولدي دانا نطت قالت ليهم انا دايره ابقي بسوق طياره كلهم ضحكو عليها مريم قالت ليها إسمها كابتن طيران ياماما 😹 وبعدين انتي لسه قدامك كتيير
خلصو غداء غزل غسلت العده وعملت ليهم الشاي شربو وشالت شيتاتها ومشت تقرا شويه كدا تلفونها رن لقتها ريم قالت ليها يازفته بكره اجي القاك جاهزه ماشي؟ غزل ضحكت وقالت ليها طيب اصلك لوما عملتي الفي راسك ما بترتاحي،اتونسو شويه وقفلت
الصباااح🐓✨ غزل صحت بي صوت المنبه حقها عارفه لو ريم جات لقتها ما جاهزه حتطربق الدنيا فوق راسها 😹 لبست ليها تيشيرت ابيض مرسوم فيهو غارفيلد " الكديسه النوامه الكانو بجيبوها في اسبيستون ديك 🐸" واسكيرت اسود طرحه مسترضي وجزمه بيضاء.. وبقت واقفه مستنيه ريم جمب الباب " هراشه يا ريم" شويات كدا وريم جاتها واتجهو علي المستشفي سجلو ودخلو وغزل فعلا طلع عندها ارتخاء في عضلات العين وكتبو ليها نظاره، ريم بقت تعاين ليها كدا 😏" أحساس أنو تخمينها طلع صح" قالت ليها خلاص ما تشغليها لي أرح نمشي محل بصريات عشان اشوف نظاره وهي ماشه كدا وبتقابض مع ريم اتصادمت مع واحد، لمن تلفونها وقع دنقر رفعو ليها عاينت في عيونو مسافه وقلبها ضرب شديييد وقالت ليهو.........

💛أقتباس
نتعافى بالأصدقاء، وإن كانوا حُطامًا، وإن هزمهم الاكتئاب، نتعافى بمجرد وجودهم، بصُحبتهم وإن جلسنا صامتين، نتعافى بمحبتهم ولو في البُعد، بإحساس أن هناك مَن يتقبلنا على حقيقتنا، ويحبنا كما نحن.💙🌸

يتبع