دوبامين ❤️✨

5

دوبامين 5❤️✨

بقلمي: تسنيم النور

عارفه يا امي والله عادل جايب لي عربيه تقرب تكون خرد
انا زاتي لمن صلحتها لما انبهر، كأنو بعجز فيني، حبوبه قالت ليهو انت اسي محتاج اتمسك بيهو لحد ما تلقي شغل احسن يا ولدي، امي قالت ليهو كلامها صح يا عبدو، اسي كدي امشي استحم وغير هدومك مسافه ما اعمل الغدا..
غززل يا غززل تعالي قطعي السلطه..
حااضر يا امي جيت جييت

قطعت السلطه وختينا الغداء اتغدينا، امي قالت ماشه لي خالتو سعديه تتونس حبه قت ليها امي سوقيني معاك قالت لي هووي اقعدي شوفي قرايتك امتحاناتك قربت  الحوامه ملحوقه 😒 قت ليها حاضر حبوبه قالت لي ااي خلي الهمله واقري عشان ترفعي نفسك وترفعي اهلك التعبانين فيك ديك، فعلا مشيت مسكت كتابي وقعدت اقرا اصلا امتحاناتي قربت وانس بلعب مع دانا ابوي جا ساقو يراجع معاهو...

في جانب امي: دخلت لقت خالتو سعديه بتعمل في شاي قالت ليها والله بت حلال يا ميمي اسي الراجل طلع، وياسين وياسمين قاعدين اقرو امتحاناتهم قربت وكايسه للبشرب معاي الشاي، امي ضحكت قالت ليها سمح كبي لي، اسي غزل  كانت جايه معاي هرشتها قت ليها الإمتحانات علي الابواب، والتجريبي باقي ليهو اقل من اسبوع، خالتو سعديه قالت ليها غزل ماشاءالله ما بتخاف عليها 💙 امي قالت ليها اها وغياث وين ما شايفاهو، قبل ما خالتو سعديه ترد غياث جا داخل، قال لي امي اووو نسيبتي قعدت تضحك ، قالت ليهو دان انا غايتو ما بديها اخر العنقود لو داير غزل حلال عليك " شفتو امي دي غاسيه كيف بااعتني طوالي 😹💔" قال ليها ما مشكله انا قبلان وهي غزاله وين ماشايفها الايام دي امو قالت ليهو لو سمعتك بتقتلك 😹 امي واصلت كلامها وقالت ليهو والله امتحاناتها قربت وانا خليتها في البيت تقعد تقراا، قال ليها والله يا خالتو لاقيتهم قبيل الصباح هي وعم عبد الرحمن وقالت لي عندها مشكله مع الرياضيات قت ليخا تعالي هاشرح ليك وتاني ما اتلاقيما، قالت ليهو فعلا شايفاها بتشكي، طيب انت بكره فاضي؟ اكلمها تجيك؟ قال ليها جداا ما عندي مانع....
بعد داك غيث استاذنهم وقال ماشي اقرا  هو زاتو شغال إمتحانت سمستر، امي تمت ونستها مع خالتو سعديه وجات  داخله البيت لقت حبوبه مفرشه الحوش  وانا رشيتو وقاعدين بنتونس معانا ابوي واخواني، قالت لينا جمعه في الحرم أن شاء الله ردينا بي  صوت واحد امين 💙
قت لي حبوبه يا حبوبه عايزاك تسرحي لي قالت لي طيب جيبي حاجاتك، ختيت البمبر وقعدت وبقت تسرح لي، امي قالت ليها يا خالتي بكره الجمعه خلاص بقينا علي البليله حبوبه قالت ليها ااي يا بتي ربنا يتقبل الكرامه 💛 ابوي عدل قعدتو وقال ليهم كرامه شنو؟ حبوبه قالت ليهو بكره بعد الصلاه قنا نعمل بليله نوزعا في الجامع الحمدلله امورنا اتعدلت، قال ليها والله فكره حلوه يا امي، نمنا فييي حوشنا داك تاني يوم الصباح  كان جمعه بتذكرحبوبه قامت لقطت ليها حطب وولعت النار ختت البليله، امي قالت ليها يا خالتي  شقيانه مالك كان تعمليها بالبتجاز، قالت ليها البليله بتاخد غاز الظروف ما معروفه... المهم فطرنا والظهر كان شويه كدا ويأذن  امي قالت لي امشي ناس سعديه قولي لي غياث اجي عشان اشيل مع ابوك البليله الأذان الاول أذن، قت ليها سمح ، مشيت لقيت الباب فاتح لزيتو ودخلت صادفت غياث هو  مارق وانا داخله، لابس لي علي الله والريحه ما تديك الدرب وبعلي بس 😹 شكلو ماشي الصلاه...
قال لي اووو غزاله عاينت ليهو كدا 😒 قت لي ننننن ظريف غزاله ترفسك كان ما خربت لي اسمي كلما تشوفني ما بترتاح، ضحك قال لي خلاص اسف اسف يا غوغو 😹 قت لي غوغو! اقسم بالله اخير غزاله وقعدت اضحك، فجأه قمت جاريه وقت لي اللييييله امي حتقتلني انا اتاخرت، بتكلم معاهو انا مهروله قت لي امي قالت ليك تعال عشان تشيل البليله مع ابوي قال لي بليله شنو؟ قت لي بس امشي امي عايزاك، دخلت البيت لقيت امي بتستحم لمن حسيت بالسعاده، 😹 حبوبه قالت لي يابت مالك نفسك مقطوع كدا قت ليها ماف شي ، شويه كدا وغيث جاء داخل سلم علي ابوي وحبوبه شالو البليله وطلعو معاهم انس وياسين....
العصر كدا امي نادتني قالت لي انتي قتي عندك مشكله رياضيات صح قت ليها ايوه قالت لي انا كلمت ليك غياث بحكم انو الكلام دا هو قاريهو قبلك قت ليهو العصر برسلا ليك، قت ليها سمح شلت كتابي ومشيت بيتهم، سلمت علي خالتو قت ليها غيث وين؟ قالت لي في البرنده بقرا خشي ليهو عيني وقعت عليهو ماسك ليهو كتاب  كبييييييير وبقرا انا استنتجت انو دا المرجع البقولو عليهو لانو مره كان حكي لي بيهو، قت ليهو غيث يا غيث، عاين لي كدا 😒 وقال لي اتاخرتي مالك، قت ليهو امي كلمتني اسي والله،  قال لي طيب جيبي الكتاب وتعالي بدا يشرح لي كدا وقطعنا شوط كويس اثناء ما بقري فيني كدا جات بت جيرانا داخله ،هي ممتحنه شهاده نهائي ما حبيتها😒 مما جات بقت تنبح وشغاله ليهو معادلات الكيمياء والمولاريه وجووطه، سلام ما سلمت 🙂، وهو بقي مسترسل معاها في الكلام وشبه نسوني، طوالي شلت كتابي وقت ليهو غيث انا  ماشه، قال لي خليك قت لي لا نكمل يوم تاني ومشيت بيتنا وانا متغايظه منهم الاتنين 😒.... امي قالت لي مالك جيتي بدري قت ليها خلاص كفايه حسيت مخي كبس قالت لي بتين هو، حبوبه قالت ليها ما تضغطي عليها يا ميمي خليتهم بتكلمو ودخلت نمت علي طول وانا زهجانه وقافله معاي.....

يتبع