دوبامين ❤️✨

10

❤️✨دوبامين 10

بقلمي : Tasneem Elnour

حضرنا فيلم السنافر تحت الحاح وعديه 😹
انبسطت كيف ونسيت ليك غياث وناس بيتنا زاتهم نسيتهم "  بياعه يا غزل 😹" رجعنا البيت ناس نوم بس كانت الساعه حداشر ونص خالتو زاتا لقيناها نامت بنغير كداا تلفون وعديه ضرب...

رفعت التلفون وغمزت لي قبل ما تقول لي دا غياث، شلت منها التلفون وهي طلعت قالت ماشه تاخد دش دافي، المهم اول ما مسكتو كدا قال لي مساء الخير قت ليهو اهلاا مساء النور، قال لي كيف كان يومك قت ليهو كويس، قال لي بالنسبه لي قبيل البت دي زميلتي و... قبل مايكمل قاطعتو قت ليهو بس انا ابدا ما طلبت منك تبرير، ويلا انا حقفل نعسانه ومرهقه ماشه انوم.. قال لي غزل ممكن تخليك معاي شويه انا ما عارف المضايقك شنو بس ابدا ما بتهوني علي.. سكت قال لي طيب ما تتكلمي خلي الخط فاتح طيب؟ فضلت ساكته عدت قريب نص ساعه وعديه جات داخله وبقت تاشر لي يعني لسه هزيت ليها راسي يعني لا.. قت ليهو غياث حنفضل كدا كتير؟ قال لي من بتين بتقولي لي غياث، اسمي غيث انا، ويا غزل ايوه هنفضل كدا لحدما تنزلي لي وش الكرتون العاملاهو لي دا، قت ليهو انت مش شغال امتحانات؟ قال لي ايوه قت ليهو اها افرض انا ما اتكلمت لحد الصباح حتفضل فاتح الخط لحد الصباح؟ قال لي بكل ثقه ايوه..، قت ليهو غيااث الله يرضي عليك خليني وامشي شوف قرايتك بي وين، قال لي لا عرفتو ما حيخليني، قت ليهو طيب انا ما زعلانه يا غيث كدا حلو..؟ قال لي بتمشيني يابت عبد الرحمن؟ قعدت اضحك قت لي والله خلاص.. قال لي صاافيه لبن؟ قت لي حليييب يااا اشطااا ، يلا اقطع وشك وخليني امشي انوم، قال لي يلا تصبحي علي خير حبيبي، قت لي قت شنو ؟ قال لي أأأ تصبحي علي خيييير مالك ما بتسمعي 😹 قت لي طيب طيب وانت من اهلو + شد حيلك شديد يا غيث متنسي انك فاينل 💜 قال ان شاء الله وقفل، بعد ما قفل انا اتربعت في نص السرير وبقيت اردد حبيبي حبيبي جات وعد داخله قالت لي بتحضري في جن انتي يابت 😹 خلعتني زاتو لمن نطيت، قت ليها وعد غياث لما جاء يقفل قال لي تصبحي علي خير حبيبي بصوت واطي ولما قت لي قت شنو قعد اتمتم، قالت لي غزل انتي بتخيل ليك اتخمدي عليك الله وخليني اتخمد " قفريه صح" شالت بطانيتها ادتني ظهرها ونامت اما انا الليل كلو اتقلب لمن الصبح اذن صليت ورقدت....

في الخرطوم:
عبد الرحمن ابو غزل قاعد هو حبوبه امنه  ومريم بشربو في الشاي عبد الرحمن اتنهد بي ضيق وبعدها قال والله يا امي انا اخلاص ما قادر استحمل، ما عارف عاد دا بيعمل كدا لي شنو وعايز اصل لي شنو " عادل البشتغل عندو ابو غزل زيما قنا قبيل" انا يا امي بكون شغال النهار كلو وشغل زاتو لوما الزول متمرس ما بقدر عليهو وأخر اليوم اجي اديني مئه جنيه لما اجيب منها كيس سلطه واركب مواصلات بكون خلاص علي وشك انها تنتهي، عاين لي أمي وقال ليها اعفي لي يا ميمي انا شلتك من بيت ابوك معززه مكرمه واسي متمرمطه معاي في بيوت الأيجار وحتي الاكل مرات بنجازف مجازفات! انا لو كان تميت قرايتي ما كان حصلنا للنقطه دي، أحنا حاليا لينا شهرين ما دفعنا الإيجار 💔 عاينت ليهو بي حنيه وربتت علي كتفو وقالت ليهو شوف يا عبد الرحمن انا قبلت بيك واتزوجتك وقت عندك اسي لما بقت عدمان اخليك يعني؟ لالا والله ما انا البعمل كدا ابقي مابت رجال زاتو، حبوبه امنه عاينت ليها وقالت ليها الله يكملك بي عقلك يابتي 💜 وانت يا عبدو كلها أختبارات من ربنا طول بالك يا ولدي المؤمن مبتلي..
طلع من البيت وهو شايل دعوات امو💛 وقف مساااافه استني المواصلات ركب واتوجه علي شغلو....

خالتي إنتي انس دا لسه نايم؟ الساعه ماشع علي سبعه ونص  حبوبه امنه ردت ليها قالت ليها برري ماشايفاهو طلع من الغرفه شكلو لسه نايم، مريم مشت صحت أنس وطلبت منو يشيل حفاظه الاسكريم عشان اوديها الدكان، قالم اتسوك وشرب الشاي وشال الحفاظه وهو ببرطم 😹 اصلو الواحد ما ينوم معاكم و.. و.. حبوبه قالت ليهو يولد هوي امشي مشيك بطل النقه دي ودا الحفاظه وجاء حسااااده كدا صحا دانا 😹"شافع مسلط" حبوبتو قالت ليهو اسي مالك عليها ناهزا 😒 قال ليها اصحي ليكم براي يعني 😏 " كدي نخليهم يتناقرو شويه ونمشي ناس خالتو سعديه."

غيث صحا من النوم عاين للساعه وقام بي هروله يستحم يلبس عشان اطلع للجامعه لبس ليهو تيشرت اسود ساده وبنطلون اسود و جزمه بيضاء وسريع خما المرجع وشنطه الظهر وبقا مارق وقفو صوت امو وهي بتنده عليهو وشايله الشاي في يدها شربو سريع سريع وطلع بعدما امو دعت ليهو بالتوفيق 💛، شال تلفونو واول شي عملو إتصل علي غزل،... ، وعديه صحت بي صوت التلفون برن.. قامت بي تثاقل وصحت غزل، غزل بي صوت تعبااان في شنو يا وعد خليني اتخمد يخ، ردت ليها وعد قومي غياث في التلفون، مسكت تلفونها وردت بصوت نااعس الوو
غيث : صباحك أنا 🌚💜 "ومن هنا تحيه خااااسه خاااسه لي تيسير بت اوومي😹💔"
غزل بضحكه خفيفه مالك علي يا زول 😹
قال ليها هو انتي لاقيه كمان؟ قالت ليهو وهي بتضحك كدي سيب جنك دا ووريني مستعد للامتحان؟ قال ليها أيوه دعواااتك بس اصلا أنا اسي في المواصلات... قالت ليهو طيب شد حيلك وما تتسرع زابط؟ قال ليها طيب يلا مع السلامه ارجعي كملي نومتك، قالت ليهو هو انت خليت لي فيها نوم يلا اقطع وشك ، ما استنتو يرد عليها وقفلت في وشو 😏 "اسي انا زي غياث دا بقفل في وشو😒" نزل التلفون من اذنو وهو مبتسم وبهمس بحبك، بحبك يا غزل ❤️ بس ما بقدر اصالحك الا اقيف علي رجولي وانجز ما هو ماممكن اشيلك من نار اختك في نار تانيه😪!
فتح المرجع وبقي يقلب في صفحاتو وفضل كدا لحدما وصل الجامعه دخل الامتحان وطلع مبسوووط جدا وهو بصفر حتي اصحابو قالو اشتغلو  كويييس 💙

العصريه كدا في بيت ناس غزل الباب دقا قتحت دانا لقتو راجل كدا طوييل لابس جلابيه قال السلام عليكم
دانا : وعليكم الثلام
ابوك قاعد؟ قالت ليهو لسه ما جاء من الشُعُل بس ماما قاعده قال ليها طيب ممكن تناديها؟ قالت ليهو ثمح وتكلت الباب ودخلت وهي بتكورك يااووووومي اووووومي جات مريم طالعه من المطبخ مالك يا دان في شنو، قالت ليها في راجل بله دال عايزك " راجل بره قال عايزك" شالت ليها توب وطلعت...
قال ليها السلام علكيكم قالت ليهو وعليكم السلام  يا اخت انا.......

ياربي دا منو 🤔 وداير شنو ؟

يتبع...