Noor | نور

Noor 11

نور 11

"طبعا يا جاد عمري ما هنسى لمن وقعتني وانكسرت سني بسببك"..

جاد كان ميت بالضحك وهو قاعد مع نور والعائلة وبتذكرو في ايام زمان وبيضحكو.

"تتذكري انتي كنتي دايرة تعملي لي شنو بعدها ما تعملي مسكينه"..

هنا عمار ضحك بي قوة "مع الأسف كانت فكرتي انا"..

جاد عاين في عمار بصدمة وبعدين ظهر ملامح الفهم في وشه "انا زاتي اتخلعت لمن لقيت زيت جنب الدرج ما اتوقعت الشيطنه دي كلها من نور"..

"استغفرلله اسي لو ما انتبهت كان بقيت في خبر كان".. وضحكو تاني.

"المهم خلاص يا اولاد الساعه بقت اتنين وانتو عندكم شغل وجامعه، يلا عالنوم"..

أنا نور .. وبي كدا طبعاً انتهت السهرة اللطيفه دي، اي زول مشى سريره ونام طوالي من الجهد البذلناهو في اليوم الزابط ده.

طبعاً الا غرفتنا انا وعبير القاعدة تبكي كأنه جاد خانها من ما قال  "أنا ولله في زول في بالي بالجد"..

" كيف يعني، يعني هو اصلاً في زول في باله وبحبه وانا متعبه روحي ساي وبحاول اخليهو يعجب بي"..

انا غطيت راسي بالمخده من صوتها، انا بحب عبير واي حاجة لكن ده شنو الاوفر ده.

"نور سامعاني؟"..

"اي".. قلت وركزت معاها يمكن تخلص سريع.

" عايني هو يعني جاد جا قريب هنا فما اتوقع البنت البحبها هنا بتكون في أمريكا محل ما كان"..

" اها ويعني"..

"يعني ياهو قصده بت فامريكا بالجد يا قصده انا"..

ابتسمت وقلت بكل هدوء "اي الا كدا"..

ونص ساعه تانيه كذا حتى عبير كذبت الكذبة وصدقتها ونمنا.

---

" صباح الخير ".. نور قالت لمن شافت جاد فالشارع

" ماشة الشغل صاح اوصلك؟ "..

" لا لا ماشة بي سيارتي، عشان عندي مشاوير كدا بعد الشغل".. هز راسه وبعدين انتبه لي شكلها المرهق

"انتي شكله السهر ما بنفع معاك"..

"لا ما كدا، لكن لمن يكون سهر بي نقه دي حاجة تانيه"..

كان نفسه يسألها نقه منو لكن غير رأيه وسكت " على فكرة المفروض تصلي قبل مديرك يعني"..

" شكلك صدقت الوضع وعامل فيها مديري كمان"..

عاين في الساعه بتاعته "الساعه ستة ونص، المفروض تكوني هناك سبعه"..

"يا مدير انت اسي قاعد تأخر فيني، زح".. نور قالت وركبت سيارتها سريع ومشت فهو بقى يعاين ويضحك عليها.