رواية الحب الأعمى الجزء الثاني

{ الحب الأعمي } الجزء الثاني البارت الاول الحلقه 1️⃣8️⃣

انا:نحط في يدي ع بطني ، لا تو بالك تهدأ، غير شكلا من كثر التعب الي تعبتا في العرس
يوسف: والله ، غير هيا ، تشغلينيش
انا: ااااه . لا معش نقدر الألم زاد يايوسف
يوسف: صبا مفجوع ، هياااااا
انا: نحاول نصبي من سرير وكلما ليا الألم يزيد في بطني
اااه ياربي
يوسف: يجيبلي في عبايتي ويلبس فيها ليا
انا: ودموع ينزلاً من عيوني ،مش وقت ولادة توا ،  زعمك بطيح يايوسف
خايفا يكون بيصرلها شي انا مزلت في ثامن
يوسف: يلبس فيا في ايشاربي، اهدي بس واذكري ربك ليش لبكا ماتخافيش
انا: نحط في يدي ع بطني ، ونتألم اااااه يا يوسف مش قادره خلاص
يوسف: رفعني بين ايديه وطلع بيا بسرعه
وانا كنت نتألم
ونزل من دروج يجري

سالمه: كانت طالعا من باب ، وتنفجع بيوسف شيلني ونازل من دروج بسرعه
وهي تفنص بفجعا وخوف وتحط في يدها ع جيهة صدرها ، يانا عليا كنكم
يوسف:وهو شيلني وداهش، أمي أفتحيلي باب بس
انا: نتألم ، يانا عليا ياعميمه ادعيلي مايصيرلها شي ونفرح بيها
سالمه:وهي تمشي قدام يوسف وتفتحلا الباب
وتلحق فينا شور السياره
ربي معااك ياارب ربي يطمني عليك ان شاء الله
ركبني يوسف ع كرسي السياره
ومشا شور باب متاعا ركب في سياره ولعها وطلع بسرعه من فيلا

سالمه: رفعت ايديها بحركة دعاء، وعيونها يدمعاً ،  يالله ياكريم بجاه هالفجر واليوم المبارك
تنوضها بخير وسلامه هي والي في بطنها يارب
تفرح قلبها وتجبر بخاطرها هي و ولدي يالله ياكريم

طلع جدي علي من فيلا متاعا وهو لبس جلبيه بيضا وحاط علي اكتوفا كاب لونا بيج ، وماسك عكوزا في يدا
وبحت باستغراب وعقد حواجبا ، وهو يمشي وجاي في اتجاه سالمه
سالمه: تمشي شور جدي علي،
علي: كنك ياسالمه ان شاء الله خير
سالمه: ياعمي ، يوسف طلع بحياه شكلها بتولد
علي: وهو يرتسماً ع ملامح وجه ابتسامه، باهي ربي ينوضها طيبا، كنك تبكي ادعيلها انتي
سالمه: مش شهرها ياعمي ربي يستر وخلاص
علي:ربك كريم بأذن الله اتنوض طيبه
ابراهيم: طلع من الفيلا متاعهم  ، وجاي شور سالمه وباتا وهو متفجأ
كنك وين رحتي ، اندور فيك ع اساس اتجيبي في كندرتي اختفيتي
سالمه: انفجعت بطلعت يوسف شايل مراتا شكلها بتجيب
ابراهيم: باهي ان شاء الله خير
علي: بحت في ابراهيم وين باقي شباب كنهم طولو
هيا نلحقو ع صلاة العيد

فتح معتصم الباب وتلاقا مع منذر بينزل من دروج

معتصم: وين ع جلاليب الصقع
منذر: التفت ع معتصم، وهو يبتسم ، شن رايك خايلا عليا
معتصم: كيف الي يرعو في سعي بزبط شكلك
منذر: ننقني انا تافه الي نسأل في تافه كيفك
معتصم: ابتسم، عيد اليوم مانبيش انرد عليك بس ، لاحرج ع عصبيين
ونزل منذر ومعتصم من دروج وطلعو لقو باتا وسيدا جمال وجده يرجو فيهم

معتصم: وين باقي شباب
علي: عدي ياعصومي شوف نزار وسفيان وين كنهم طولو هذوما
وانت يامنذر شوف سيدك هيثم