رواية الحب الأعمى الجزء الثاني

{ الحب الأعمي } الجزء الثاني الحلقه5️⃣

في حوش أم ساره

كانو رجالا مقعمزين في مربوعا هيثم
وعم ساره فتحي و ولده الكبير المتزوج ايمن
و ولده الصغير معتز

هيثم: كيف حالكم
كلهم : الحمد الله
فتحي: كيف حالك انت شن اخبار الحاج
هيثم: الحمد الله والله كويس
فتحي: الحاج علي كاين صحبا هو وباتي الله يرحمه
هيثم: اها الله يرحمه ويغفرلا
فتحي: طبعاً هذا ولدي ايمن الكبير . متزوج وعندا ابنيه
هيثم: بالجوده بيك
ايمن: وبيك اجود صحيت
فتحي: وهذا معتز مواليد89 مازال عزابي وعندا محل موبايلات
هيثم: مرحبتين بيك
معتز: اهلاً
فتحي: وانا طبعاً فتحي . وانت عارف اليوم عليش جينكم
هيثم: عارف ياسي فتحي. ونحنا بشر ومش معصومين من الغلط
والي يعترف بغلطا يبقا مازال فيه الخير . وانا نحكيلك ع لسان مراتي الي تقعد بنت خوك.
الي فات اعتبرا مات ونحنا في توا والي جاي . وانتم دم واحد
فتحي: كاين منحرج . والله اختصرت عليا وااجد ويعلم الله كيف كنت عايش الفتره الي فاتت وضميري يأنب فيا
ايمن: والله كان مايرقد الليل . ونقولولا ياباتي كنك شن في يقوللنا دورولي ع بنت عمكم لازم نشوفها
هيثم:يهز براسا
ايمن: مشينا الخوالها وطلعلنا واحد اسما خالد وهو الي قاللنا ازوجت
ومابش يعطينا معلومه. وقعد يمشي فينا كل يوم يقوللنا بكره . ومعش فاهمنا شي 
فتحي: والله من قبل رمضان وانا ماشي جاي عليه
عند في الاخير قالي نعطيك رقم اختي وشوفهم وطلعني من موضوع
هيثم: واهو الحمد الله وصلتو
فتحي: الحمد الله وربي ان شاء الله يحنن القلوب ويلم الشمل
هيثم: ان شاء الله وبأذن الله مش حيصير الا كل خير . انتم عايله وحده والظفر مايطلع من لحم
فتحي: ان شاء الله. وبارك الله فيك انك خاش بينا بالخير .
هيثم: كيف ياسي فتحي . مانش قطاعين صلة الرحم بودنا اتردو وتجتمعو مع بعضكم 
فتحي: الله يفتح عليك فعلاً انك ولد اصول
هيثم: تسلم . وصبا هيثم . لحظه تو انجي
كلهم: تفضل

وطلع هيثم مشا للباب الي كان فاصل بين المربوعا والحوش من جوا . ولان كاين في صبايا سكروه
دق هيثم ع باب

ساره: كاينا مقعمزا مع مرات سيدها وبناتا ومرات ولده
وتهدرز معاهم ويتعرفو ع بعضهم
سمعت صوت الباب . استأذن ومشت شورا
فتحتا قابلها هيثم
هيثم: بحت في ساره اشويه
ساره: تبحت في هيثم. كنك
هيثم: مافيش قهوه عصير اي حاجه يشربوها
ساره: بتكشيخا. اكيد في يعني
هيثم: باهي حطيها كنك ماجبتي شي عند توا
ساره: باهي تمام . وجت بتخش
هيثم: لحظه قبل ماتخشي
ساره: نعم
هيثم: بعدين نكلمك انخشي اتسلمي ع سيدك
ساره: شبكت ايديها في بعضهن . وارتبكت . وبحتت في هيثم بنظرة حيره ،مش عارفا
هيثم: بحت كيف ساره ضعيفه وحايره وفي عيونها احتياج له . ابتسم . وتنهد ماتخافيش وخليك قويا وخشي سلمي عليه وقولي الي في قلبك كلا
ساره: بللت فمها تحتاني بلسانها. وحطت خصلات من  شعرها ورأ وذانها . يعني نخش عادي
هيثم: اكيد هو عليش جاي يعني بيش يشوفك ويحكي معاك
ساره: وهي تلعب بصوابعها في بعضهن من توتر. باهي ان شاء الله خير
هيثم: بحت في ايدين ساره وكيف تلعب بصوابعها ومتوتره. حط يدا فوق يدها . وبحت في عيونها
ماتخافيش انا معاك
ساره: بعد هيثم قاللها الكلمه هذي . حست بالامان الي كانت ديما اتحس بيه مع هيثم . وان هو واقف معاها
، وبصوت هادي ودوبا يطلعا منها. وكرت ايديها من تحت ايدين هيثم ،  تمام
هيثم: خلاص جيبي قهوه .
ساره: حاظر دقايق وتكون واتيا
هيثم: بعد اتوتيها.دقي ع باب ولا رني عليا
ساره: ماشي . وعدت ساره
ورد هيثم الباب وخش جوا للمربوعه
ومشت ساره شور المطبخ وقعدت ادير في القهوه للصبايا ورجالا