ثاني يوم ، يوم الكبيره
رن هيثم وطمنا ان وصل لطرابلس
كنا كلنا ملتمين في حوش جدي علي
ونوتو في سفرة فطور بما ان هذا اخر يوم في صيام
ومن عادات عايلة جدي علي
ان اخر يوم يلتمو في حوش الجد
احلام: ياصبايا وتيتن الطاولات
رحاب: اها ياعميمه طاولة الرجاله
معش نقصها الا الشربه والرز والعصبان بس
يأذن المغرب نحطوهن بيش مايقعدنش مسقعات
احلام: باهي تمام
رحمه: خشت للمطبخ . شيلا سفرة فاضيه
احلام: حطيتي يا رحوما الحليب والتمر
رحمه: اها ياعميمه . جهدي انقطع وانا ماشيا جايا . وعطشت امتا يأذن
انا: مقعمزا ع كرسي في مطبخ . خلاص مش فاضل عليه الا تلت ساعه
الحمد الله عدا ع خير وكل سنه وانتم طيبين
البنات: وانتي طيبه
احلام: رحمه . رجالا كلهم جو
رحمه: اها . فيصل بس انظني مازال ماجا
بس كلهم مقعمزين في جنان
رحاب: وعصومتي معاهم
رحمه: بحتت بتكشيخا. قلت كلهم انظني انا
انا: هههه
احلام: كنك ياخيا معاها تسأل ع راجلها
رحاب: بتكشيخا . والله النفسيه هذي .
رحمه: غير فكينا من بودعا وطروح زايده خلاص راك مش عروس توا حامل وقريب اتجيبي انظني فكينا من دلع
انا: ههههه وكيف هي الوحده بعد تحمل معش تسأل ع راجلها وتدلع يعني
احلام: ههه شكلا هكي عند رحمه
رحمه: لاخلاص تقعد لاعروس لاشي
رحاب: انا حتي نجيب عشر عيال نقعد ندلع ونقعد ندلع في عصومي وكأني مازلت عروس جديده
مش دايره زي الصبايا ان شاء الله
احلام: تو نشوفو . خلنكن شهدات ع كلام هذا
رحمه: من توا ياعميمه غير اتجيب تو تشوفي الشكل الجديد
شعر منتش ومتقصف وجلبيه ملطعا
وجه بلا مكياج وصوت عالي يجيبك من بدايه الشارع
وهي تعيط ورأ فروخها
واول مايخش عصومي . تهزبا ليش ماسلحش كندرتا
وهي كيف منظفه الحوش
وتقعد تسب وتلعن وتقولا ياريتني متت ولا اجوزت
طول الوقت نعاني في ضنوتك
انا: ههههه والله ضحكتيني يارحمه بس تشبيه قاتل للواقع مرأ ليبيه
رحاب: انلا تو تشوفي يا انتي انا مش حندير هكي
احلام: هيا باهي خلنا نطلعو من مطبخ ونحكو في الحديث هذا في دار جنب امي وسالمه وفتحيه
وسلفاتكن تو نشوفو الآراء
نحنا: هيا
وطلعنا قعمزنا في دار مع بعضنا وقعدنا نهدرزو ونرجو في مغرب يأذن
عند الرجالا
كاين جدي علي وبات يوسف وسيدا جمال
ومحمد راجل احلام
مقعمزين مع بعضهم ع كراسي الي تحت الشجرة
ويحكو مع بعضهم
وفي جيهة الحوض وع كراسي متعاتا
كاين مقعمز عصومي مقابل الحوض وجنبا نزار
ومقابلا من جيهة التانيه سفيان ويوسف ومنذر
يوسف: والله كانت ناقصه هيثم لمة هذي
معتصم: ايوا
نزار: انا مازلت عند توا مش فاهم شي .
معتصم: مش لازم تفهم
نزار: لابجديات . يعني كيف بيزوج ومراتا الاوله وكيف العرس توا يعني نحس في حاجه مش مفهوما في الموضوع
منذر: والله حتي انا كيفك بس الله غالب معندنا مانديرو
سفيان: اعتقد ان هو عارف مصلحتا وعارف مسؤلية الشي الي يدير فيه
معتصم: بحت في نزار. حي ع اما . سمعت شن قال هذا
يوسف: ههههه
منذر: يبتسم
نزار: ياريتني ماسمعت
معتصم: وهل تعتقد انك انت حكيه كبيره قعدت
سفيان: هههه تي كنك معايا انت قلت وجهة نظري
معتصم: وجهة نظرك . لا انا نصبي قبل مانحشش عليه في اخر يوم هذا
نزار: سفيان امتا تخرج متاعك
معتصم: تي هذا شاك فيه بعد هذا كلا يطلع يقرأ في لغه عربيه مش طب
قعد يعتقدلنا و يحساب روحا في برنامج في قناة الجزيرة متاع الاتجاه المعاكس
نزار: ههههه
سفيان: يضحك . وقعد يستفيز في معتصم بالغه العربيه
يوسف: ههههه باهي انت ليش رقيلك تحاور معاه بلطف
معتصم: لطف هذا يجيبا ربك . تو نعرف كيف نتحاور معاه بطريقتي الخاصه
نزار: شن ياعصومي الطريقه
معتصم: سوط سوداني وتمريط ع ظهرا
منذر:ههههه تي اهدأ قاعد يحرقلك في دمك، وغمزلي من بدري
سفيان: يبتسم. والله اخيراً عرفت شن الي يرقيها لكي
معتصم: لاغير صايم بس تعالي بعد المغرب تو نكسد عليك انا
يوسف: الي توا يحكي معاكم سبسي الدخان مش معتصم راه
شباب: ههههه
فيصل: خش بالسياره للفيلا. ونزل منها
ومشا سلم ع رجالا
وشباب وقعد اشويه
وسمعنا اذان المغرب وخشو الرجالا كلهم للمربوعا
حلُ لصيام متاعهم
وصلو صلاة المغرب جماعه
أنت تقرأ
رواية الحب الأعمى الجزء الثاني
غموض / إثارةرواية كوميدية خيالية تحمل في طياتها عب وعشق ولن ننسى جنون الحب قرائة ممتعة
