كأنكِ القهوة(مكتملة)

البارت الرابع(توتر)

مساء الخير💫

تركتُ كل خوفي

مشاعري أرتمت أمام نظراتك

هناك شيء لا يستوعبهُ عقلي

كيف خذلني

وسار مع قلبي ..

يرسمان طريقاً لحبك

لكي تتساقط التساؤلات

كلما يزداد مقدار الحب

هل تحبني

ام أني أحبك ❤️وحدي..

سديت الدفتر بعد ماخلصت تحظير لمختبر باجر..
المواد رادلها تركيز والمختبرات اصعب..
كروب الفيس كلش فادني..

بس اقرا الي ينزلوه ..مااعلق شي..

مابقى شي لامتحان الكورس الاول..

أنفتح باب الغرفة دخلت لبانه هيه وشايله كتبها باوعتلي..
اعيونها مدمعه تثاوب..
حطت كتبها على الميز تحجي وهيه تثاوب ..
-تعبت يمتى اخلص وارتاح..
نعست اروح افرش وارجع ماما وبابا نامو ويزن هم..
دخلت يمامة عاقجة وجهها..
راحت كعدت على جربايتها ومدنكة ..
كمت وصلت يمها
-شبيج ..حطيت ايدي على كتفها

-لا هيج ماكو شي اريد انام ..طفي الكلوب..

باوعتلها نامت وتغطت ودارت وجهها..

شبيج يااختي شنو الي مضوجج..
مصيرج تحجيلي وتفضفضين..

مشيت طفيت الضوا وشعلت ضوا النوم..

فاتت من يمي لبانه دخلت للغرفة..
رحت غسلت وفرشت ..
ودخلت لغرفتي وقتت النقال..

حطيت راسي افكر أختي معقوله هيج بسرعه حبت كمال ..
اهله حجو ويه اهلي بس ينتظرون تفوت فتره لوفاة بيبيته..
ويعقدولهم..
واختي كل ماتسمع اسمه وطاريه تفز..
واوكات من يجي ليزن تحاول تباوع من شباك المطبخ وتلمحه..
مثل الحرامي تبوك شوفته ..

صوت داخلي رسملي نظرات وابتسامة البسيطه ..
اي لهذا الي كل ماالمحه اشوفها ..
غمضت اعيوني وأذكرت
من خلصت المحاظره وراحو البنات للكافتريا يشترون..

وانا جنت اكتب ومو جوعانه فكتلهن مااروح راح ابقى اكمل كتابه..

بعدها بفترة..
سمعت خطوات لان القاعه هدوء محد موجود
رفعت راسي شفته يتقدم عليه انا ظليت فاتحه اعيوني..
مد ايده قدملي كوب ورقي
أشتميت ريحة مميزة باوعت للكوب ورفعت راسي لوجه ابتسمت
-كهوة مو
أبتسم
-اي كلهم اجو للكافتريا بس انتي ماكو ..كالو ملتهيه بالكتابة ..
كلت اجيبلج وحتى تطيني رايج بس مو مثل
مروة

اخذتها منه وقربتها لحلكي ارتشفت شوي..
مروره بطعم الهيل
أحسها أنطبعت بالي ..
احسه يباوعلي..
رفعت راسي هوه راساً التفت على الباب طبن البنات ..
-مشكور طيبه .. وريحتها مميزه
باوعلي ركز بعيوني..
-بالعافية