أنياب الحياة

البارت الاول

اقترف البشر أخطاء كثيرة ولكن أسوأ جريمة اقتُرفت على الإطلاق هي التخلي عن الأطفال، وإهمالهم ... قالو لي هذه امي ،وهذا ابي ،
وهؤلاء اخوتي ، وانأ من اكون !!
اليوم اكملت عمر 10 سنوات .. فكل طفل يفرح بيوم ميلاده وينتظر من والديه ان يفاجئوه بكيكه الميلاد ..
بغـــداد 2005 / شهر ميسان /الثامنه صباحاً .
كعدت من نوم واني ضايجه بيــبي ماكو متعوده كل سنه بهيج يوم اكعد الكاها مشتريتلي  ثوب حلو ويم راسي مخليته اني وبيبي نفس الغرفه انام من توفت كرهت كل شي وفاتها صدمه بحياتي لان هي الوحيده احسها تحبني امي الي ربتني متحبني مثلها دائما تصيح عليه تضربني بس جانت تخاف من بيبي من وراها ترزلني كدامها تسوي روحه تحبني وشنو السبب ماادري من دون خواتي واخواني ..
بيبي صار بيها جلطه وهي عدها قلب  مااتحملت توفت واخذت حياتي وياهه..
كمت من الفراش ضليت اباوع ع وجهي وامشط شعري بيبي معلمتني اول مااكعد ارتب شعري جانت هوايه تعتني بيه زيوت وحنه تموت على شعري ضليت اباوع على شكلي واشوف نفسي بديت اتغير واكبر وشكلي بده يتغير. طبعاً اني شكلي يختلف اختلاف جذري عن اخواني همه سمر واني الوحيده بينهم بيضه وعيوني خضر بيبي جان تصيحلي شذرتي لان خضر عيوني وجانت متقبل شوفني ابجي تكلي مو حرام هذني الشذرايات يحزنن ، نزلن دموعي اليوم احس نفسي مو اني وضايعه واحس احساس غريب بداخلي وكل مااذكر بيبي صارله شهر من ميته وماتعودت على فراكها واكول هسه تجي طالعه لبيت عمو متعوفني وحدي وارجع للحقيقه هي ماتت وبعد مترجع يعني شلون يكون احساس طفله فقدت اعز شخص الها واكثر شخص يحبها .. قررت مااسوي عيد ميلاد وبيبي ماكو نزلت اركض عالدرج  دااروح لماما حتى اكلها بقراري سمعته دتحجي هي وبابا بالمطبخ .
سحــر : يمعود كتلك خلي نكلها هي بعد كبرت لازم تعرف الحقيقه اني مليت من هالحاله ماطيقها بعد .
سمير : اشش اياني واياج اسمعج حاجيه شي تريدين هسه ننفضح مصار شهر من توفت امي توفت وهي توصي بيها .
ريـــم : اني مجنت اعرف عن شنو جانو يقصدون عبالي ديقصدون عالعيد ميلاد رأسن طبيت كتلهم اني قررت مااسوي عيدميلاد وبيبي ماكو .اشوف ماما سحر وبابا عيونهم صارت تجدح واجت عليه لوت اذاني .
سحر : طايحه الحظ  شنو تتسمعين علينه خاتله وره الباب  تربيه بيبيتج بعد ..
ـــــ صاح بابا بصوت عالي سحـــر حقيره امي بعدها ترابها مانشف  وانتي تحجين عليها .
سحر : مشوف هالتربيه سزز شلون خاتله وتتسمع علينه اكيد سمعت كل شي .
———- اني من خوفي ووجع اذاني احسها انشلعت كتلها والله ماسمعت شي اجيت هسه دااكلكم مااريد حفله
سحر : وانتي يا مهتلفه منو ناوي يسويلج عيد ميلاد ..
سمير : امشي روحي منا ريم وماريد اشوفج كبالي .
سحر : وين رايحه المواعين الريوك غسليهن امشي ونظفي البيت راح اطلع ارجع اذا مالكيت البيت يلمع متلومين الا نفسج ..
ريــم : بس اني مااعرف اغسلهن ولاانظف وبيبي تكول الجهال ميشتغلون  .
سحر : بيبيي ماكو اني هنا اقرر وتنفذين ارجع الكه مسويه مثل مكتلج .
ريم : كعدت ابجي مااعرف مين ابدي وشلون يغسلوهن وهنه متروسات بيض وزفر واني اتخبل من ريحته راسن أتقيـئت وطلعت للحديقه كمت ابجي مااعرف ليش هيج دتعاملني شلون جنت مدللتني بيبي وشلون متقبل ابجي تكلي هذني الشذرايات ماريدهن ينزلن دموع . ..رفعت راسي للسماء وفحطت بجي على بيبي راحت وكسرتني شفت ايد انمدت ع جتفي رفعت راسي شفت اختي الجبيره فرح عمرها 20 سنه واكفه وتفرك بعيونها  مبينه هستوها كاعده من النوم
—شبيج تبجين ريـــمه  !!
ريـــم : ماما ليش متحبني .
فرح : شنو هالحجي منو كلج بي اكو ام متحب بتها
ريــم : اي متحبني مثلكم بس صيح عليه وتكلي بعد كله عليج التنظيف وغسلي المواعين ولوت اذني ونفسي لعبت من البيض طلعت .
فرح : لا شذرتي تشاقه وياج اكيد ويمكن دتشوفج تعرفين تشتغلين معليج اني هسه اغسلهن وكولي انتي غسلتيهن . تريكتي ؟
ريــم : لا مااكلت ماخلتني اتريك وفركت بعيوني من عبره دموعي و الاستهضام وبديت افرزن من هل الموقف تختلف تعاملها ويايه عنهم جانت بيبي متخليني انتبه هسه بديت انتبه على هوايه امور ' رحنه تريكنه. وكعدت سماره من النوم اجت دتريك ويانه .
سماره : هاي شنو تتريكون من دوني ياخونه
فرح : لابعدنه هستونه كعدنه ودننتظرج يله تعالي سموره اكلي ويانه
سماره : شوف الجذب تنتظرني دكومي جيبيلي كوب خلي اصب جاي .
— تريكنه وضلينه نسولف ونضحك وبعدين اذكرنه بيبي رجعنه انقهرنه ..
فرح : سماره.اليوم تدرين شعدنه مناسبه
سماره : اي ادري يمعوده بزر الكعده اليوم شرف للدنيا شذره بيبيتها
ماادري عليمن طالعه شكره شو كلنه سمران. طفره وراثيه
ريم : بيبي تكول الصغير ياخذ حلاوه الكل والله يخلي بي كل الجمال واني طلعت اختلف عنكم .
سماره : ديله عيني عالاقل احنه سمرو دمنه يلعب مو مثل دمج جامد .
ريم : دمي مو جامد واجيت بنيسان وهسه الصيف يموع دمي
سمر : هو جيتي بشهر الجذب شطلعين قابل .
ريم : فروحه شنو يعني شهر الجذب .!
فرح : ببدايه هذا الشهر الناس تخدع ناس ويفكرون بكذب وحيل حتى يصدكوها واول مابدت باوربا يصحولها (ضحيه ابريل) واشتهرت باغلب دول العالم وصارت عاده كل سنه كذبه نيسان
ريم : بس اني مو جذابه ليش اجيت بهذا الشهر .. جان نسمع ماما تكول لان انتي اصلا كذبه . اني انصدمت والبنات حجن شنو ماما كذبه
سحر : معليجن وهاي شنو لسه تزقنبن وانتي الثوله شكتلج اني مو ارجع الكاج مكمله كل الشغل .
فرح : ماما شبيج اليوم، ياشغل بعدها طفله هسه نكمل الريوك واني وسماره نشتغل .
سحر : دخلي اشوف وحده بيجن تشتغل اكسر ايدها ويا طفله هاي عمره عشر سنوات بكده جنت اشيل البيت من الشغل والطبخ .
سماره : هلا هلا يعني اليوم ماكو شغل.
سحر : امشي انتي اقري وماريدج تكومين تسوين شي اريد ارفع راسي بيج السنه الجايه معدل عالي اريدلج .
فرح : ماما اني هم اجيبلج معدل عالي وافتخري بيه
سحر : انتي محد طالب منج شي امشي غسلي المواعين ونظفي . وفرح طبخي اني رايحه لبيت ام كريم جيرانه ، ساعه وارجع واذا مالكيت مثل ماطلبت متلومن الا نفسجن .
ريـم : طلعت واني دموعي صارت تصب ليش هيج رزلتني واتأكدت هي متحبني . صعدت سمر وهي تعيب عليه وتسوي حركات بأديها عود تغورني فرح صيحت عليها ماقبلتلها هي راحت تركض وتغني وماما زمنها كيه ، كيه بعد شويه ترزل بريم وفرح وسموره تتفرج عليهن .. كلش انقرت من حجيها .
فرح : لضوجين حبيبتي اني اعلمج انتي صرتي جبيره لازم من هسه تتعلمين ويله نبدي حتى نكمل بسرعه ونسوي كيكه ميلاد الج .
اني كلش فرحت لان فرح الوحيده بالبيت الي تحبني مثل بيبي وتصيحلي شذرتي. ضلت تعلمني وجلفتهن واني غسلت نص منهم وعلمتني شلون امسح وكل شويه تجي تشوفني وتضحك عليه شلون لغمطت البيت تكلي عادي تتعودين اني هم مثلج جنت مااعرف . وتالي من بطلوني من المدرسه تعلمت كلشي . خطيه فرح انقهر عليها بطلوها من المدرسه علمود اوضاع بغداد مو امان جانت وسقوط كالو بعدين ترجع ومارجعوها وهسه مقرره ترجع تدرس خارجي . خلصنه شغل وطبخ سوت تشريب دجاج وتمن ..
اجه احمد اخويه من الشغل واعتبره بمثابه ابويه لان جبير البيت عمره 28 سنه يشتغل بمحل صديقه كردي مسعود بيت جده جيرانه فتح بغداد محل ملابس نسائيه وخله بيها احمد بيها يشتغل وهو بين بغداد واربيل بين فتره وفتره يجي .
احمد : ها يالربع كمل الغدا ميت جوع اريد اتغده وانام متت تعب اليوم مسعود اجه وجايب بضاعه وكعدنه نصفيها .
— صبيناله الغده واتغده وراح ومناك اجتي ماما
سحر : يمه الحر بعده مااجه الصيف وهيج حر
تعالن ولجن جنت بالسوك اشتريت شكم شغله لبدايه الموسم تعالن يبنات شوفن شجبتلجن .
فرح : هاي شنو يوم مو كلتي رايحه لام كريم
سحر : اي مو شفته دتروح لسوك جلبتلي الا اروح وياهه.هسه صيحي سموره خلي شوف شجبتلها .
__ كل وحده جابلتها دشداشه وشحاطه وقراصات. وطلعت تيشرت كالت هذا شفته عجبني جبته لخالد من يجي من بيت عمج انطيهيا .
شافتني صافنه عليها. جان تكلي شكو تباوعيني صفح تعالي هاي ام كريم دزتها الج
دشداشه اني اخذتها وتشكرت منها بس غير استهضمت حتى مو هي جايبتها اخذتها ورحت للغرفه كعدت عالجربايه ابجي واكول ليش بيبي عفتيني رجعيلي لو اخذيني يمج .
                   ———————————————

ومن هنا تبدأت حياتي تتغير الى المجهول ..
للروايه تكمله اخرى.....يتبع
                                 
                                  الكاتبه /ميــس الربيعـــي