أنياب الحياة

البارت الخامس عشر

#أنـيـاب_الحيــاة
                للكـاتبـــه /مـيـــس الربيــعي
البارت /الـخامس عشـر ..
بـــس تـعالـو وفـرحو روحي معذبتكم تـريدكم
عالـليالي
سهـري مـامر عالـليالي ،حـالــي .. حـالــي
الـشمعه حـالـي ، والله لـو احجيلكم ..
أحجيلـــكم
مــن أول حـجايه تهـل دمـوعكم ..
بـس تعـالـو
لــو اجيتـو .. الـعزيز  بعمري اطشـه فـِـدى لــعيونكم ..
بــس تعالـو لو اجيتـو جفوفنه  تحنيها ..
          كــلوبنه ما تنـساكم .. بـلكت إنسـيها
بــلكت بـختـنا يـجيبكم .... يجــــيبكم
بــلكت ونشتم روايـح طيـبكم .
      هلــبت .. هلــبت
    بخـتنا يــجيبكم هلــبت .
*اغنيه بس تعالو لكريم  منصور
اغنيه ريم المفضله تسمعها حتى تذكر بيها اهلها *

بعـــد ثلاث سنوات....
(احداث خلال الثلاث سنوات )
بعدني على نفــس الروتين الممل. كلها تتغير حياتها واني ابقى اخدمهم. خالـد طلع تعينه بالجيش ..
فـرح صار عدها ولد ، وسماره بنيه.
فـرح صارت بين عيالها وزوجها مشاكل لان بخيل وميصرف اتعاركت وياهم زعلت منه ياله قبل يطلعها بيت وحـد. وحبلت بولد وجابت كالعاده رحت ساعدتها وبقيت يمها شهـر. وسماره نـفس الحاله من ولدت رحت ساعدتها. واحد من ولد عمي سامي صار انفجار اجته شضيه بعيونه وعمه شكد حاولو وصرفو عليه مارجع يشوف. سحر كالت راحت فلوس ابوج من سامي صرفهم على ابنه ومارجع زين .
عمي اخذ عائلته الثانيه للموصل بقـى يمهم يجينه قليل. اسبوع اسبوعين ويرجعلهم .
خلال هاي الفتره قنعت سـحر اروح يـم صديقتي اشوفها وضجت من البيت رحتلها. اجت امي يمهم حضنتني وبجينه اثنينه انطتني موبايل وفلوس كالت اتصل بيها من احتاج شي وحتى تعرف اخباري لان مااكدر بعد اشوفها لاتكدر تاخذني ولااكدر اروح وياها. سولفتلي على جدي اتوفى وبقى التقاعد مالته الها بس قليل تشتغل وياه .واخوانها باعو البيـت بقت يم اخوها و تشتغل صارت ببيوت الـمسؤلين بالخضراء تغسللهم المواعين. والي تحصله دزلي منه و تصرف الباقي على بيت اخوها . اذا ماعدها يطردوها تروح يم صديقتها بقت على هاي الحاله ،
رجعت للبيت وفرحانه بالجهاز وحفظت رقم امي بي. شافته سحرعرفت شفت بعد امي كلبت وجهها عليه وكل شويه مسمعتني حجي بعـد ميمنعوني من التواصل وياها يدرون متـكدر تاخذني ولاتكدر توكل محامي وتخاف منهم مهدديها واني اخاف عليها يسولها شي اتحملت هذا الوضع بس علمودها مااريدها تتاذه بسببي