أنياب الحياة

البارت الثاني عشر

#أنياب–الحياة
للكــاتبه/ ميــــس الربيعي
البارت الثاني عشر

أنا الــ مبيوك ، أنا الــ مامش
أنا الـ بس إسمه بشــر عايـش .
أنا الـ ثكلت عليه روحـه ..
وكـل تـايهه ، وكـل عابــره تلوحه .
أنـا الــ متروس صدره عتاب ..
وأنـا الــ عينه  علـى دكـه باب ،
أنـا الـ مادري  شكبره.
أنـا الــ فدوه.
أنـا الماله عمر يسوى
أنا بالغربه يتغنى
وأنـا الـ ماينشد عنه .
أنـا الــ ينـشد .
أنا الــ يفـكــد .
وأنـا الــ يتركـد تركـد
وأنـا المچتوف ماينفـك،
وأنـا الــ ينشاف جنه بعيد
وأنـا الجذاب من يضحـك
..........................
من بعد ماشربت النفط  مافكرت بأي شي غير بس اريد اخلص من الحياة . اريد ارتاح.
مرت دقائق  وبدت معدتي تاذيني وبطني تلويني. كمت ابجي من الالم . ماكدرت ابقى بالمخزن احس بعد مااكدر اسيطر على نفسي
واختنكت فتحت الباب وطلعت للحديقه كمت افتر والازمه بطني
ماعرف شسوي خليت اصبعي بحلكي وبديت اتقيئ وكله ذبيته
وكعت عيوني تغوشن بعد مااحس بأحد .

سحـر : ولج سماره  هاي الغبره ماكو بالمخزن. ومتروسه ريحه نفط  بس لا رادت تحركنه من نايمين
سماره : شنو شدتحجين تحرك منو .
— لج كومي صحصحي. ريم ماكو شامره بطل النفط بالغرفه. مم حقدها اكيد رايده تحركنه وشردت من البيت. كومي لااطيح حظج
.– استغفرك ياربي يوميه ماارتاح بنومتي من وراكم ليش اني نولدت بهيج بيت بس مشاكل. ماعدنه غير حجت ريم وسوت ريم كافي مللتوني من حياتي من وره غضب ريم .
وشردتهم وعساها لا رجعت. شعليه اني هم خطوبتي خربت من وراه وهم نومه ماانام مثل البشر. روحي عني ماريد اشوف اي واحد بيكم .
—  كومي بسرعه لاادوس بطنج راح سويلنه فضيحه وانتي كاعده تفكرين بخطوبتج  دكومي لااسبج واسب خطوبتج .
خالـد : شكو هالصياح من صباحيات الله
— شوف المصيبه الي احنه بيها هذيج شردت من البيت وذابه النفط بالمخزن رايده تحركنه .
— وانتي كاعده تحجين بكل برود ماجيتي كعدتيني. طالع ادور عليها .
— ضلي مخموده واعتكفي وفنج اشوفج كاعده اليوم ، يالمابيج خير

يمه تعالي هاي مشموره بالحديقه .
عزا العزاج ريم شمسويه من مصيبه.  شكو شبيها.  يمه دشوفها تتنفس لو ميته .
– اي الحمدلله عايشه بس هاي كله ريحه نفط. يعني رايده تنتحر .
— دضربها ع خده هسه تكعد.
ريـم : حسيت بضرب بخدي ويحجون يمي بديت افتح عيوني. 
راسي دايخ والشمس قويه تضرب براسي كعدت دايخه يحجون يصحون مااكدر اجاوبهم حسيت بخالد شالني وشمرني بالحمام وفتح الدوش عليه. بديت اصحصح شويه شويه.  ورجعت تقيئت .
اجتي سماره جايبلي المنشفه خطني بيها واخذتي للغرفه. واسمعهن يحجن عليه ويدردمن وسحر تكول بس المصايب من وراج تردين تفضحينه. خالد صيح كله كافي هسه بيا حال هي .
طبيت للغرفه نزعت ملابسي وبدلت ورجعت نمت. وباقيه نفسي تلعب كل شويه اروح اتقيئ وارجع لحد بعد مااكدر اقاوم وكعت بالفراش. ماحسيت غير لليل. جابتلي سحر عصير برتقال. وراها شوربه سربتني انصدمت شعجب حنت عليه. شربتهن كوه تحملت
ورجعت نمت. لحد ثاني يوم الصبح كعدت زينه.
رحت غسلت وسمعتهم بالمطبخ كاعدين .
خالد : اي اليوم راح تفرغ البيت من بعد التهديد متبقى بالمنطقه
سحر :  شحدها تبقى ام المتعه مالـفكت روحه غير بس على اخوك القشمر. بس اتأكدو الطفل وكع .
— اتأكدنه بعد الضرب الحصلته من ابنج يبقى طفل .