يوم الجمعه الصباح بيتنا اتملا وجاتنا حنين وبقت تساعدنا في التجهيزات 💛
ووجدان كانت معاي وجهزتني لمن ما عرفته نفسي واشتغلو فيني شغل صاح 🌚زي ما بقولو نحنا كااان قمنا على السماحه صعبيييين 💃🏽💃🏽
اما شهد ووعد ريحتهم ماف ولا جو حتى قالو لي كيف اصبحتي المهم ما علينا
العصر كدا الناس جو واهل معز جو حتى اخوهو المغترب جا
كانت خالتو ظاهر عليها مرة رسميه ومتمسكه بكلام ناس زمان شديد حتى طريقتها في الكلام كانت جافيه بس من خلال كلام حنين عنها قالت انو قلبها طيب ولو حبتني حتختني في عيونها وانها بتحب معز وما بترضى فيهو نهائي
قبل معز في راجل حنين وولدها حمودي الصغيروني
حنين طيبه بس راجلها شكلو ما عجبني نهائي اما اخوهو الكبير داك من جماعه انصار السنه وما عندو شغله بزول 🌚
وكان جات معاهم كم بت من بنات اهلهم بالاضافه لخالو الكبير الرجال قعدو بيغادي
والنسوان قعدو في صاله ناس شهد بهناك
بعد الضيافه وغيرو الرجال مشو صلو العصر ومن هناك عقدو 💃🏽💛
وبدت الزغاريد والتهاني
انا كنته بين مبسوطه وخايفه ومتوترة وكلو بس وجدان وحنين بقو يزغردو ويونسو فيني لحدي ما نسيت التوتر
بعد ما انتهينا مكياج
النسوان قالو جيبو لينا العروس نشوفها ....هنا التقول انا ماشه في الصراط كنته مرعوبه من الفكرة فكرة اكون ما طلعته حلوه وهل يا ربي حاعجبهم 💔
اتوكلته ومشو معاي وجدان وحنين ..جيت داخله الصاله كلها نسوان وانا بطبعي خجوله بقيت ما قادرة اعاين لزول بقو يقولو ماشاء الله والله وكلهم جو علي وبقو يباركو ويسلمو لحدي ما فجاه لقيت مرا كبيره قدامي صوتها حاد قالت لي
...مبروك يا عروس بقيتي مرت ولدي
ابتسمت ليها وقلته ليها.... الله يبارك فيك
المهم قعدنا وبقينا نتونس عادي
قامت ام معز جابت لي كم كيس وكم حاجه كدا مزينه قالت لي ديل حاجه بسيطه مني
شكرتها وشلتهم
مرا اليوم عادي وطبعا شهد ووعد ما قامو ولا ضيفو ولا شي بس رغد الكانت بتساعد انتهى اليوم المتعب دا بحمد الله
وحنين استأذنت من راجلها تقعد معانا شويه تضاير وشنو
ومعز دا بس اتزرع في الصالون 😹قلبو ماكلو كيف يقدر يلاقيني والاحرا من كدا عاوز باي طريقه يشوفني 😹
القال ليهو اتشوبر منو وقول ما عاوز اشوف وشك
وانا بهناك داقاها ونسه مع حنين ووجدان وحبوبه
