عدت للانتقام

البارت 1

عدت للانتقام

-للكاتبه زهراء المياحي

٫٫٫٫٫؛٫٫٫٫٫٫٫؛٫٫٫٫٫٫٫؛٫٫٫٫٫٫٫؛٫٫٫٫٫؛

_متخيلت يچي يوم واتندم؛ الندم بالنسبه إلي شعور مستحيل يمر علي لاني سويت اشياء طوال حياتي راضيه عليها رغم جانت غلط بس مستمره عليها ومتقبلتها ومايوم تندمت غروري وكبريائي جان مستحيل ينكسر واتندم لانو طبعي وشخصيتي هيج

وكعدت اتحسب واتصفن ليش هيج سويتي شهد؟ ليش بعد كل هذا العمر تندمتي؟ وين چنتي واتمنيت ارجع للماضي اصحح اخطائي اتغلب على غروري واكبح مشاعري وكبريائي بس كل هذا بعد مايفيد اكو يوم سمعتو شخص رجع بالزمن وصلح اغلاطه؟؟؟

_وتعبت واني اقره عن الندم ؛ هو شعور يواردك من تذكر الماضي الي قضيت عمرك بي وانت تاذي الناس وتقهر بيهم تذكر الساعات إلي مانطيت مجال لغيرك ورحمت بيهم ولا اشفقت عليهم واذيتهم واستمريت وانت مارفلك جفن لانو مقتنع الي دسوي صح والطريق التمشي بي صحيح!!!

_تندمت على الدقايق إلي فضلت بيها نفسي على الكل ومادرتلهم بال ولا اهتميت؛ اختاريت مصلحتي ع حساب تعاسه الناس؛ أذيت احبابي وناسي بس لأجل مصلحتي وراحتي! مجرد الشعور بالندم يدمر نفسيتك؛ كل ساع اتحسب واگول ياريت يرجع بيه الزمن واصلح كلشي

_كلش ندمانه ع ألي اذيتهم وعيشتهم أصعب أوقات حياتهم؛ ندمانه لان خنتهم قهرتهم حجيت عليهم وتجاوزت وقللت احترامي ؛ عرفت بعد ماندمت عرفت شكد جنت انسانه حقيره وانانيه ومغروره ونرجسيه؛ بس بعد شيفيد الندم ع أشياء صارت من الماضي؛ ياريت بس ما سويت ألي سويته

شهد: نفتح قفل الباب فزيت عدلت نومتي وغمضت عيوني بقوه وبخوف حته ريگي خفت ابلعه لايطلع صوت ؛ كل هذا علمود مايسمع مني نفس؛ اني شسويت حته هيج يعيشني برعب واذيه ؟؟ لا سويت اهواي اشياء بس مو لدرجه يموتني شلون هسه اصلح حالي وافهمه اني مو سبب موته هو وگع گدامي ميت!!

_جزء مني گلي لاتخافين هو قبل چان يموت عليج مايمشي وراج لان يخاف يدوس ظلج اكيد هسه بعده يحبج بس شايل بگلبه لان اذتي والجزء الثاني گلي ليش تثقين بي؟ واذا حبج! هو اخذ منج اعز انسان تبقين هيج غبيه وترحيله هذا انسان حقود مايغفرلج افعالج ابداً

'' عوده للماضي ''

نسرين: ووووولج شهدددد شلعتي گلبي انزلي رقيه بالباب استعجلي هسه تتاخرين اذا عاقبوج ما اروحلج للمدرسه والله

شهد: اي اي بس لاتصيحين وتخبصيني نازله؛ ركضت طبيت للحمام؛ حطيت الحمره وماسكاره ومورد خدود ؛ وحطيت كتبي بالجنطه شلون مچان نزلت ركض لبست حذائي وكفت يم المرايه اعدل بشعري لتفت للساعه ب12 وربع ؛ كتفت ايدي وباوعت لامي؛ هاااا شوفي شوفي بعد وكت وانتي تصيحين علي؛ هي غلست واشرت علي اطلع؛ طلعت من البيت فتحت الباب لرقيه هي ابتسمت