عدت للانتقام

البارت 2

'' عدت للانتقام ''

للكاتبة زهراء المياحي

~^~^~^~^~^~^~^~

"مقتطف"

_مو بس بالندم حسيت؛ بالحقاره هم اشكد انبذ نفسي واكرها كل ما اتذكر الي سويته بحب وسام ونرجس ضيعت فرصتهم يعيشون حياه سعيده ودمرت حياتهم لاجل نفسي؟ كل ما اتذكر الي سويته استحقر نفسي والومها ؛ ليش شهد ليش؟ ليش ما خليتي القدر والنصيب يتحكم بحياتج ليش تدخلتي بينهم واذا تحبين وسام؟ هيج تسوين بي!!!

_خبر موت نرجس مثل الصاعقه نزل علي!! اول شخص لمته وذبيت علي الصوج هو اني اني لاني ماتركتهم يحبون بعض تدخلت بيناتهم اني سبب موتتها

_اشكد تمنيت الموت بلحظتها ويخلص العالم من شري كرهت نفسي بس ما أعتقد أكو عقاب وعذاب اسوء من محاسبه ضميري ألي!!

'' عودة للماضي ''

شهد: كعدت خايفه لا وسام يروح لنرجس ويگلها تحبين منو وتصير مشكله! بقيت كاعده يم بنات عمي بس بالي يمهم؛ وگفت امي فوگ راسي

نسرين: ياله امشينا نرجع للببت وراج دوام باجر

شهد: بلعت ريگي؛ هزيت راسي بنفي؛ لا ما اروح

نسرين: ليش؟ ودوامج باجر؟

شهد: خليني شوي ابات يم بنات عمي

ميادة: اي خلصي امتحانات وتعالي بناتي يم روى

شهد: هزيت راسي تمام؛ طلعت من الغرفه وعيوني تنفقد وسام وين راح يمكن هسه ديواجها وهي تگله الحقيقه ويكرهني ليش جذبت هيج جذبه! لتفت لامي؛ دقيقه هسه اروح اجيب جنطتي؛ صعدت فوگ اسمع واحد يحجي ويعيط اشوف وسام يحجي وي نرجس

_حطيت ايدي على حلگي؛ عزااا هسه يگللها شهد گلتلي اباوعله يخوزر بيها وهي مدنكه تبجي تحلف بيها وطلع اني ركضت دخلت للغرفه الثانيه؛ باوعت من الباب هو نزل وهي نزلت وره؛ اخذت جنطتي ونزلت وراهم؛ وصلت يمها هي گبل مسحت دموعها وابتسمت الي

نرجس: تعالي اودعج مابستج

شهد: قربت شبگتني وبوستني واني مجمده؛ يعني ما عرفت اني جذبت عليها؟ باوعتلها وابتسمت ؛ طلعنا للحديقه؛ ابوي وعمامي واكفين بالباب يسولفون هي عافتني وطبت للبيت ضايجه؛ لبست حذائي اتمشه بالحديقه؛ قرب مني وسام؛ اني دنگت

وسام: شهد

شهد: بلعت ريكي ومارفعت راسي؛ نعم

وسام: شلون يكدر الانسان يجذب وملامحه بريئه؟

شهد: هو من گال هيج احس راح انفجر من الخجل والخوف؛ عرررف؟ عرف جذبت هسه يكرهني؛ رفعت راسي باوعت بعيونه خايفه

وسام: والله صدمتني نرجس يعني بالبدايه هي جانت تباوعلي ونضرات وكذا؛ بس طلعت تحب واحد مادري خلتني احتياط؟ حسبالي من تباوعلي معجبيه بيه او تبادلني هيج بس الحمدلله الله كشفها وكشف خطتها وجذبها ؛ بس الي صادمني تگلي جذب شلون هيج تحكم علي عيونها بريئه بس من جوه هي شيطان؛ تگلي لاتصير مثلهم تذب علي التهم اذا متريدني روح وخلصني موتشمر علي تهم وتطعن بشرفي شكد كرهتها عفتها ودرت وجهي حتى استحي اوجها ابوها خليها هي وربها اه