عدت للانتقام

البارت 29

'' عدت للأنتقام ''

للكاتبة زهراء المياحي

~'~'~'~'~'~'~

شهد؛ هي تمسح على راسي واني دموعي تصب؛ كمت عن حضنها؛ عمه!!

ام سلام؛ نعم

شهد؛ مجنت متعمده؛ مجنت متعمده اذي ؛ اصلا مجنت اعرف هو مريض وهو وراج طبيت بس احاجيج بس اگلج تبعدين سلام عني؛ بس اگلج هو دياذيني واكف بطريقي؛ جنت احب ابن عمتي؛ وجنت مراهقه وحتى هذا ميبرر الي سويته؛ اسفه لأن اذيتكم وقهرتكم وعيشتكم اصعب أيام حياتكم؛ بس الي سواه بي سلام هسه صار اضعاف اضعاف إلي صار اضعاف اضعاف ؛ تعبت هل المره مو بس تعب؛ اريد انهي حياتي؛ عمه بعد محد إلي ؛ سلام يگلي اشتريتج واشتريت اهلج بفلوسي

_واهلي بس يوصللهم علم بسوايت سلام؛ ينطون اله حد بس ما يطلگوني لأن ؛ شهگت؛ مگدرت اگمل هي تتحسر

ام سلام؛ اذا محد سوالج حد اني الي راح اسويله حد؛ بس أريد افتهم شلون تشربين مانع بدون علمه؛ اني مرت اخوي هم فتره حملت شربت مانع؛ وافق رجلها؛ واكو رجال هو الي يجبرها تشرب مانع؛ سلام من عرف ليش هلگد تخبل وفقد؟؟ شنو جان منطيج امال يسوي طفل؟ وانتي اخذتي من وره ظهره

شهد؛ هزيت راسي بنفي؛ مايوم عمه كعد يمي وصارحني هو يريد طفل؛ ما يوم هيج سوووه
واني اخذ مانع من اول ماجيت لبغداد؛ قبل زواجي حتى شنو يتوقع مثلاً هيج تعامله وياي واترس حضنه اطفال ؟ شنو يتوقع مثلاً انو هذا اسلوبه واگول ياله يصير عدنا طفل يقرب محبتنا بالعكس راح اورط اطفالي

ام سلام؛ اول مره اتفق وياج بشي؛ واخذج لحبوب المانع شي زين؛ تركي اني احجي وياه وافتهم ليش هيج سوه هل التصرف والعنف الي بدا ماله داعي جان يگدر يگعد ويفهمج انو هو يريد اطفال لدرجه جبيره؛ واني من تزوجتو مايوم غصبته وگلت اريد اشوف احفادي لان اعرف بعلاقتكم شنو بس متوقعتها توصل هيج مواصيل

شهد؛ مسحت دموعي؛ صار العصر صاحتلي اجتي اتغده ماقبلت بس متمدده بجربايتها ونايمه؛ حسيت حرگه بالغرفه بعدت الغطه سوسن مدنگه دتبخر الغرفه وتقره ايات ؛ فتحت التلفزيون على سوره البقره

سوسن؛ يارب اهدي سلام علينا

شهد؛ هيج حجت وطلعت من الغرفه؛ جريت حسره؛ غطيت راسي ونمت؛ فزيت صوت سلام قريب فتحت عيوني هو گاعد على القنفه يحجي وي امه ؛ هي كاعده على كرسي الصلاة؛ فاتحه قرأنها وسبحتها؛ مغلسه علي وهو يحجي

سلام؛ ليش تتجاهليني يمه شمسويلج

ام سلام؛ سبحان الله وبحمده

سلام؛ انتي تگولين الغرف اسرار؟ ليش تدخلين؟

ام سلام؛ سبحان ربي العظيم

سلام؛ الصوج صوجها؛ اني ميت على ريحه طفل؛ تشرب مانع ولا منتظمه بي بشكل؛ وكل ما طلبها صاحت اريد اروح للحمام؛ تطب هناك تشرب وتطلع