#الاسكندرية صيف 2010
_لو سمحت ممكن قلم ؟!!
_اتفضلي يااخت سودانية انتي ؟!
_ايوة ليه
_شبهتك بس علي واحده بعرفها
_ايواا ، ده القلم شكرا ليك
_تسلمي
_تسلم
حاجة غريبة شنو الخلاني اقول للبت شبهتك وانا اساسا ماشبهتها بس امكن عشان عجبتني او لفتت نظري بكمية الهدوء الفيها ده في البلد دي لي اكتر من شهر ما حصل شفت لي سودانية رزينه كده حتي لبسها مختلف وشها مافيهو ولا نقطه مكياج سمارها يجنن استغفر الله العظيم
_استاذ سيد أحمد اتفضل ع الكاونتر لو سمحت
اخدت حوالتي وبقيت واقف اعاين ليها كانت طول الوقت بتعاين في الارض او في الفراغ تقريبا بتفكر او شاردة ولي لحظه حسيتها ح بتبكي الدمعة كانت في حافة جفونها بس مانزلت كيف قدرت تثبت دموعها كده ياربي أتذكرت شنو زول ميت ليها ابوها اخوها امها الله ياسيد احمد مالك قاتل اهلها او امكن مارة بي صدمه عاطفية لا اكيد ماكده شكلها كده مابتاعة علاقات اوووف يااااا مالا ياربي تكون ياربي جات مع زول عيان ماهو اغلب الناس دي جاية ياللدكتور او تجارة او يصوموا رمضان هنا او شهر عسل ههههههه مستحيل شهر عسل دي لانو ماباين عليها عروس
_داليدا عباس السيد عبد العزيز ع الكاونتر لو سمحتي
داليدا اسم غريب وستوا اغرب منو مشت اخدت حوالتها وطلعت وانا طلعت وراها بس لقيتها اختفت عاينت يمين شمال بس مافي عاينت علي طول الشارع شايفها بعيده مميذة من لبسها اسكيرت اسود كبير كلوش زي مابتقول عليهو اختي كان مرة وصتني علي واحد زيو لما كنت في الهند وتشيرت لون منقا وطرحه كبيره وهي ماشة كانها هندية ماشي وانا ده ما اتجاهي هل واضح اني ماشي وراها الله الله الله ده عدم موضوع مني ياربي ولا ده هروب من واقعي
ههههههه اكيد هروب هوووي ياسيد احمد اتوكل امش شوف الحجه بي وين وامش شوف محل المقابلة بي وين
رجعت بي اول شارع اتمشيت لحد وصلت شميت ريحة البحر اخدت كم حاجه واخيرا وصلت الشقه
_هلا بست الكل شجرة الضل صبح صبح ياجميل اها كيف اصبحتي يا امي
_تمام الحمدلله انت كيف
_انا تمام صحيت ونزلت الصرافه وجيت يلا عشان نفطر ونجهز حالنا للمستشفي
_سيد احمد ياولدي كدي خلي موضوع الفطور ده وخلي موضوع الدكتور وتعال عايزاك في موضوع
_حاضر يا امي بس كدي اشربي العصير ده اول
_ياولدي العمر الفات ما قدر الجاي وانا عايزه افرح بيك واشوف اولادك انا بقيت زولة مرض ياولدي
