"مرات ألم الذكريات بكون اكتر بي كتير من الألم كوجع في ذاته"
وانا منتظره سويد يطلع من جلسة الاشعاع اتذكرت امي " أرثيما " وأبوي وكل اللحظات الحلوة الكانت معاهم بحلوها وبمرها عُمر كامل قضيتو معاهم كل مايمر بي موقف او لحظة احتاجهم بتذكرهم زي كأنهم خلو لي حاجات خاتها بعيد قدر ما أحتاجها ألقاها بالذات ذكرياتي مع ابوي بس كمان ذكرياتي مع سويد ما كتيره حتي أولادي ماعندهم رصيد ذكريات عنو هم حتي صورة ماعندهم
بتذكر اول مرة لوجي سألتني منو جات من الروضة وقالت لي ياماما نحنا ليه ما عندنا بابا يمش معانا زي كل الاطفال مع اني كنت عارفه ح يجي اليوم ده بس ما كنت قايلة انو وجعتي ح تكون كده
انك تفقد انسان موجود علي قيد الحياة اصعب بكتير من انك تفقد انسان بفقد الروح لان بكون عندك امل بتجدد مع كل طلوع شمس مع كل نفس انت بتاخدو مع كل دقة جرس باب او تلفون
عدت علي أيام ما كنت بنوم فيها من التفكير وأيام إحتجت فيها حضن ابكي فيه آخد حقي كأنثي محتاجة حب وحنان وراجل يكون معاها في كل تفاصيل حياتها
صبرت علي كل وجع عدّ علي بس علي أمل يرجع لي راجلي وحبيبي
اخوي كان دايما كل سنة يجيب أولاده وامي واخواني يتونسو معاي ويعوضوني الغربة الانا عايشاها وبدوني أمل في بكرة وانو الحياة مصيرها يوم تبتسم لي بس ماكنت عارفة انها أول ما تبتسم ح تكشر لي عن أنيابها
عن نفسي وجعي ما زي وجع سويد أنا أخف منو لانو مافي أوجع من انك تصحي في يوم تلقي حياتك عبارة عن صفحة بيضا واول ما تستوعب تلقي كل الحولك بحاربوك وتختار تبعد وتبدا حياتك من الصفر
صفر كلو كوابيس واحلام ووجع واصوات لناس انت مابتعرفهم وتحس انك ناقص أهم شي في حياتك وتلقي الحب قدامك فجأة بس اقرب الناس ليك يستخسروا فيك مجرد شعور وبعد ده كلو تتصاب بمرض قاتل ممكن ياخد روحك في اي لحظة
اني اكون موجودة في الوقت ده وفي نفس المكان الهو خلاني فيهو من سنين عشان يرجع يلقاني ويحبني تاني ونرجع احلي من الاول وعشان اكون جمبو في مرضو ده المعني الحقيقي لانو كل شي في الدنيا دي لسبب ح اقفل الماضي واكون معاه ما ح احاول أذكرو بأي حاجة ولا ح اكلمو ح نبدا من جديد
_دليدا
_هااااا ، تعالي ياثريا
_مالك سرحانة كده
_بفكر كنت
_خير مالك
_ثريا انا قررت اخلي الامور تمش كده ما ح اكلم سويد
_كيف يعني
_كده ح نتزوج من جديد
_اجييييي ده كلام شنو
