اصعب حاجة بالنسبة لي كانت مرض ابوي لاني بعد وفاة امي اتعلقت بيهو شديد ده غير انو كان نبع الحنان بالنسبه لي كان دايما بذكرني بي امي ماعارفة عشان هو بحبها ولا عشان انا ما انساها لدرجة انو ممكن كل مره يحكي لي قصة عنها ومرات بحس انو قصصو فيها خيال اوتأليف بس عشان يتكلم عنها حببني في جنس امي وعاداتهم وتقاليدهم ودايما كان بجيب لي زوريا وهدايا بتخص التقاليد حتي كمان مره جاب لي تربيزة جبنة وعملت الجبنه واتونسنا حولها بكل الطقوس كانو بقول لي دي جزء من هويتك
اول ما رجعنا السودان من السعوديه قال لي اعملي لي الجبنة
قلت ليهو لا لا شراب جبنة تاني ماف اي شي بأثر علي صحتك ح نبعد عنو بس أصر انو اعملها وافقت علي شرط انو ما يشرب بس يقعد معانا
وأثناء ماقاعدين قال لي :
_دليدا يابتي انا ما عايز احرمك من حاجة انتي عايزاها انا عارفك عايزه تقري الجامعة بس انا بقيت زول مرض قلب عايز ادخلك بيتك واسلمك لي راجل يصونك اها رايك شنو
_ الله يطول في عمرك والله يا بابا انا مع امي واخواني مابتجيني عوجة
_انا عارف يابتي لكن
_لكن يا بابا مامعروف اسي يموت منو انا ولا انت اليوم مامعروف انت بس خليها علي الله
_ونعم بالله يابتي
_ربنا ما يحرمني منك ويديك لينا الصحة والعافية وتحضر تخريجي وعرسي كمان انا اوعدك بعد اتخرج اتزوج الانت عايزو وعيوني مغمضة
_لا لا يابتي انا اصلي مابجبرك علي زول انا بسلمك الراجل الانتي عايزاهو والله لو جاني بي عنقرتو وشاريك اديك ليهو ووالله كان ماعندو انا اتمو
_ياسلام يابابا والله انت ماف زيك
_اها يابتي وكان عينك علي زول والله امش ليهو في مكانو واخطبو ليك
_ههههههههههههه والله يابابا ضحكتي
_اي مالو عندنا مثل بقول أخطب لبتك بس يادليدا انا شايف زي ود عمك ده خاتي عينو منك
_لا لا يا بابا هو خاتي عينو علي واحده من بنات خالات اخواني
_اهاااااا لا كان كدي خلاص الله يتمو
_بابا انت محتال والله عايز تعرف لو انا خاته عيني علي ود عمي وتمش تخطبني ليهو مش ههههههه عرفتك
_هههههههههه والله انتي المحتالة يابتي وفهمتيها طايره
_بتك وذكية زيك
_خلاص الذكاوة دي اعمليها لي في الجامعة وارفعي راسي
_كويس بابا انت ماعليك
_انا جهزت ليك امور سفرك خلاص واخوك بسافر معاك يوصلك ويسجل ليك ويمش معاك السوق يشتري ليك اي حاجة عايزاها
