اخوي وهو جاي علينا كل شر الدنيا في عيونو لاول مرة في الحياة اشوف الوش ده منو ما هو كمان لاول مره يشوفني نازلة من عربية وراجل نازل يفتح لي الباب ودا كلو كوم وابتسامتي الهبلة كوم تاني انا صراحة خلاص حسيت انو الليلة ده اخر يوم في حياتي ولما قرب مني ومسكني من يدي انا خلاص انتهيت رسمي وشعبي وقال لي :
_جايين من وين وديل منو
_ديل اولاد عم ثريا
_ثريا منو
_الله الله ثريا صحبتي في الجامعة نسيتها ، جوها في الجامعة واصروا يوصلوني كدي روق وسلم وديك ثريا معانا
_( بي اعلي حسو) ومن بتين بتجي مع الناس لو عايزه عربية بنشتريها ليك بس طلوع ونزول في عربات الرجال ماينفع فااااهمة
_فاهمة يا اخوي بس ماتفضحنا براااحة
_نعم والله ده الفضل انا افضح ويعني نزلتك من عربيه مع رجال مافضيحة ولا عايزه ترجعي لاصلك يابت ال
_ده كلام شنو يا اخوي حرام عليك مسحت بي الواطه
_امسح بيك الواطه واضربك كمان
ورفع يدو عشان يضربها كف بس سيد احمد مدا ليهو وشو في اللحظه دي والكف وقع فيهو وقال ليهو :
_نحن النستاهل الكف والاهانة لانو نفسنا ما سمحت لينا انو نخليها ترجع براها
_وانتو منو عشان تسمحوا او ما تسمحوا دي اختي وطول عمرها بتمش وترجع بي احترام وقاعدة في الحلة دي قبل نحن نجي ما حصل اتصرفت تصرف بايخ تجي عشانكم انتو الغاشي والماشي يتكلم فيها فكنا بالله
_انت ما تكبر الموضوع ونحنا غلطانيين وبنعتزر وحقك علينا بس تصرفك ما صاح ترفع يدك عليها
_وانت مالك بخصك شنو
_والله ياريت يكون بخصني وعندي حق عليها عشان كنت ح اقطع اليد البتتمد عليها
_هووووي انت يخصك ؟! والله ولا بحصل ولا ح يحصل انت مابتعرفنا نحن بنتكي ونضبح
_والله لو علي التكي والضبح نحن زاتنا سكينا في ضراعنا
_دي حقارة منك يازول دي اختي خت نفسك بترضي كده في اختك ولا الظاهر ما عندك اخوات
في اللحظه دي بابا جا من جوة بعد ما دخلت وحكيت ليهو اي حاجة بالتفصيل وقال ليهم كدي خشوا جوه هسي البتعملوا فيهو ده اكبر فضيحة والما عارف عرف
اهلن يا اولادي خشوا ثريا يابتي كدي انزلي ونزلي اخوانك
طبعا لما جو داخلين انا شلت نفس وارتحت اول مره اشوف اخوي بالشكل ده ثم اول مره يهيني كده ياربي مالو
قعد ابوي معاهم وعملنا ليهم الغدا وسامعة نقاشهم اخوي من جهة وابوي من جهة وسيد احمد الكل اعتراضوا كان علي مافي زول يرفع يدو علي واخوي يقول ليهو سلطتك شنو اما مؤتمن وثريا كانو ساكتين ماعارفين يعملوا شنو في اخوهم البشاكل الناس في بيتهم وفي بتهم بس انا كنت مبسوطه انو في راجل غير بابا بدافع عني وفجأة سكتو مافهمت سكتو في شنو ولا الحاصل شنو بس سمعت باب الشارع بقفل والعربية مشت
