قضينا يومين تاني ورجعنا السودان كامل كان كل همو موضوع شركه السفن وشرح لي طبعا انو لازم سيد احمد يقتنع انو ده ابوه ودي حياتو انا عارفه انو سيد احمد فاقد الذاكره ومفكر يسافر عشان يفتش عن الماضي زي ماقال لي بس طبعا كامل ماعارف اني بعرفو عشان كده كانت المهمة ساهلة بالنسبة لي
بعد كم يوم من رجوعنا كامل قال لي ح افتح ليك المحل الوعدتك بيهو وح نعمل افتتاح كبير ودعوة لناس كتار من ضمنهم سيد احمد وبعدها أحاول اوقعو يعني ح يستعمل مع سيد احمد نفس الطريقة القبل كده انا استخدمتها معاهو قلت ليهو تمام
وفعلا انتهت كل الترتيبات مالقيت طريقة الاقي سيد احمد برانا من جيت راجعة علي الاقل كان يكون عارف انا بعمل في شنو
وجا يوم الافتتاح وسيد احمد مجرد ماجاتو دعوة بإسمي طبعا جا هو ومؤتمن وانا طبعا كنت مع كامل وساقني من يدي وقال يلا من هنا تبدا مهمتك بعد سلمنا وعرفتو بي كامل طبعا عملت فيها مستغربة من طريقة سلامو الباردة وقلت ليهو
_باشمهندس سيد احمد الظاهر ما عرفتنا ولا متغابي فينا العرفة
_ ده الطبيعي لانو اول مرة اشوفكم
_معقول لا جادي انت
_امكن بكون بعرفكم قبل كده بس انا عندي ظروف خاصة شوية بتخليني ما اتذكر
_والظرف ده يعني خطير لدرجة انو يخليك تنسي شريكك
_شريكي ؟!!!! انا ؟!! منو ؟! وفي شنو متشاركين
_لاااا ده انت بعيد شديد
_ممكن تفهموني براحة عشان انا بالجد يا جماعة فاقد الذاكرة
_طيب ح نفهمك ده " كامل الرشيدي " وانا "أرهيت" مساعدتو قبل اربعة سنه او اكتر بالظبط انت وقعت عقد شراكة مع كامل وعملتو شركة نقل بحري في الاسكندرية وانت اختفيت فجأة وفتشنا عنك كتير واخيرا لقيناك
_غريبة الدنيا دي
_الاغرب انو نحنا معانا أرباحك بتاعة السنين الفاتت كلها وعقود الشراكة الجديدة
_لا انا ما بقدر اشيل قروش ولا اعمل شراكة الا أتأكد من حاجات كتيرة أقلاها اول حاجة اتذكر مثلا او ألقي ناس افهم منها الحاصل ده لانو الكلام ده مفاجئ بالنسبه لي
_انت ممكن تاخد وقتك وكمان ح نتلاقي تاني واجيب ليك معاي كل الورق والوثائق
_طيب تمام اتفقنا ومبروك المحل
طبعا سيد احمد كان زي كأنو مابعرفني قعدنا واتكلمنا كتير في مواضيع عامة وضحكنا واتونسنا حكينا مواقف طبعا مختلقة ومرتجلة انا وكامل علي اساس سيد احمد كان جزء منها ، طبعا من جواهو كان محتار في تطور الاحداث
