_اي سيد أحمد يامؤتمن
_الف حمدلله علي السلامة ، جيت كيف وجابك منو وكنت وين ؟!!
_ح تعرف ده كلو يامؤتمن بس خليني ارتاح
كنت تعبان ومرهق وجعان زي كأني لي سنين ما أكلت ، اتسندت علي ديدي ودخلت ، حضنت أمي المحروم منها 35 سنة شميتها كانت صغيرة شديد في نهاية الأربعينات تقريبا بس نص شعرها شيب لونها اخضر مايل للبني العسلي لأول مره اتمعن في تفاصيلها كنت نسخة منها ماعدا العيون والحواجب وكمان الليلة عرفت لوجي بتشبه منو بتشبه حبوبتها صفية ، أولادي النعمة الخلتني انسي وجع التلاته سنين الفاتو في ثواني التوائم التلاته عمرهم عشرة سنة وانا ماقعدت معاهم غير شهرين في حياتهم كلها ولولا القدر كنت ح اتحرم منهم العمر كلو ، الحمدلله ربنا ما جعل حظهم زي حظي وأداهم احن ام في الدنيا واخر حاجة اتعرفت علي محمد (جدو) كان ظريف ذكرني أول مرة لاقيت فيها مؤتمن الصغير الدنيا مهما وجعتنا ومهما قست بنلقي الأمان مع الناس البنحبها لما نتلمي في حته واحدة
ديدي كانت واقفة بعيد وبتعاين لينا كأنها في جواها بتقول يا الله ماتحرمني منهم واحفظهم لي وفجأة لقيتها بتقول ليهم يلا كلكم علي غرفتكم خلو بابا يرتاح ، وجات علي ومسكتني من يدي كانها بتسوق واحد من اولادها دخلتني الحمام وحممتني زي ما بتحميهم وغيرت لي ومسحتني وسرحت لي شعري من غير ماتفتح خشمها بي كلمة كنت كل شوية بشوف دمعة في عينها بس كعادتها بتقدر تحبسها ما بتخليها تنزل ، حضنتها علي وقلت ليها أبكي ياروحي ابكي طلعي كل الجواك فبكت وانا بكيت معاها في اللحظات دي ما حسيتها مرتي او حبيبتي لا حسيتها روحي ودنيتي وكل ما تعنية الانثي صديقة اخت عمة خالة أياً كانت بكل المشاعر الحلوة ، رقدت في حضنها ونمت زي كأني مانمت لسنين
____
صحيت الصباح علي صوت الشفع احلي حاجة ممكن يصحي عليها الزول في الدنيا دي وجاني صوت ديدي وهي بتقول لي صباح الخير سويد حبيبي ان شاء الله نمت مرتاح ، ياريت لو كنت مرتاح بس ده انا مرتاح ونص وخمسة ناديتها جات عايزة تقعد جمبي جريتها قعدتها علي رجلي واحدة ودفنت راسي في شعرها وبوستها في خدها دقني كان غزير شديد خفت يزعجها فزحيت منها لقيتها بتمرر شفايفها عليهو وباستني في جبهتي وقالت لي
_الله لا يحرمني منك
_ولا يحرمني منكم ياروحي
_سويد خلينا نمش من هنا أنا خلاص والله مابقدر أعيش هنا تاني كرهت البلد دي والبيت ده
_ح نمشي ياديدي بس في حاجة لازم اعملها أول
_لا حاجة شنو مابقدر اتحمل افقدك تاني انا
_ما ح تفقديني
_لا ياسويد مابقدر اعيش لحظة من اللحظات العشتها التلاته سنه الفاتو ديل
