" سوقني معاك ، لي عالمك ، لي فوضتك ، لي العزلة البتلجأ ليها كل ما الدنيا تتعبك ، سوقني معاك لانو قلبي مابعرف حتة آمنة غير جمبك وبين إيدينك "
ابوي مات ، ابوي سندي وعزوتي ، الراجل الطيب العمرو ما زعل زول منو موتو كان صدمة لي ولكل الناس الحولينا بس مات فرحان عشان سلمني لي راجل يسندني ويضلل علي
انتهي اسبوع العزاء ورفعنا الفراش وجاني اخوي قال لي يلا بعد ده شوفي راجلك وين بس سويد قال رفض وسافر مع امو وقال ح يجي للاربعين وبعدها نشوف البحصل شنو ده غير امتحانات نهاية سنتو الاخيره ومشروع التخرج
بيتنا كان مضلم من غير ابوي اول مره اقول ابوي لانو اخواني ببكو عليهو حسيت قدر شنو الكلمة دي حنينة وقدر شنو ملانة فقد ودموع
اخوي ما قصر معانا يطبطب ده ويواسي ده ويسكت وكمان يادوب قدرت اعرف قدر شنو هو بشبه ابوي في طيبتو وملامحو وحتي في مشيتو واول مره احسو هادي ولا امكن ده الحزن
بعد اربعين ابوي جا سويد وكان خلاص خلص دراستو واول ما جا امي قالت لي جهزي غرفتك راجلك ينوم معاك بس سويد رفض ونام في الصالون وانا ما اصريت عليه قلت اخليه بي راحتو
وبعد كم يوم ونحن قاعدين جاني وقال لي
_دليدا انا ح اسافر القاهرة ان شاء الله ماشي اقدم لي كذا جامعة للماجستير واشوف لي شغل واول ما انتهي واشوف مكان واجهزو للسكن برسل ليك ، اها رايك شنو
_لا ياسويد رجلي علي رجلك انا مابقدر من دونك كفاية علي ابوي ماف
_دليدا انا عارفها حاره عليك بس ده اللازم يحصل عشان ماتتبهدلي معاي
_انا مابقدر والله مابقدر
وهنا اتدخل اخوي وقال لي
_دليدا ماتقوي راسك خلي الراجل يشوف امورو وانتي قاعده هنا في بيت ابوك معززة مكرمة ولما يقول خلاص نسفرك ليهو وليك علي انا اوصلك لي عندو يد بي يد
_مابتقصر يا اخوي والله كلامك زين بالحيل بس انا عايزه اكون معاهو خطوة بي خطوه علي الاقل يجي داخل يلقاني مجهزه ليهو لقمة ياكلها
_ياسلام عليك يا اختي ، طيب انا بديك حقك في مال ابوك يمكن يساعدكم
_لا لا يا اخوي سويد مايسمعك انت عارفو ما ح يرضي بكلام زي ده
_ده حقك كان يرضي او لا
_انا حق ما عايزة بس انت اعمل لي حاجة من الربح شهريا زي ما ابوي كان بعمل بحياتو
_خلاص تمام مافي مشكلة انتي جهزي حالك للسفر وكل شهر حقك يوصلك لهناك وامكن انا زاتي اجيكم وابدا لي تجارة من هناك انتو تدوروها
_كويس يا اخوي
سافر سويد الخرطوم وجهز لينا للسفر ولحقتو هناك وسافرنا
