ما عايزة اظلم سويد او اشك فيهو لانو لي سبعه سنه عايش حياة غير حياتي الانا عايشاها غير الضغوط المرت عليهو وأكيد ده أثر في حالتو النفسية فعادي انو يكون متغيير بس في حاجة جواي بتقول لي انو ما متغيير بس كمان داسي مني حاجة لانو لاحظت لي تصرفاتو لي اكتر من اسبوع بعد سمعني الكلام القالو ده بس بعاين ليهو ومابتكلم معاه إلا اذا هو اتكلم معاي
كان دايما بتكلم في التلفون وينزل ويجي حتي لما يكون قاعد بكون شارد بفكر او داخل وطالع
نفس الحالة الأنا كنت فيها من سنين وانا منتظراه يجي داخل علي منتظر منو هو ؟! ده كان السؤال بس سريع شلت الافكار دي من راسي دي مجرد غيرة وعشان انا اقدر اواصل في حبي ليهو لازم ابعد عن الغيرة لانها عادي ممكن تهدم اي حاجة وممكن توصلنا للشك وكده حرام في اي علاقة زوجية
مع اني اقنعت نفسي انو ما افكر بس من غير ما اشعر مشيت عليهو وسألتو
_سويد ممكن اسألك
_مالك يا ديدي أسالي يعني الا تسأليني انا زوجك حبيبك مفروض ماتسأليني طوالي توووش تسألي
_اممممم ، أرهيت دي منو
_زولة عزيزة علي ، صديقة غالية
_والله
_اي والله
_كده بس يعني ؟!
_اي كده انتي عايزاها شنو مثلا حبيبتي عشيقتي مرتي التانية ولا شنو
_لا انا ما قصدي كده انت فهمتني غلط
_لا انا فاهمك صاح يا ديدي ولا قايلاني ما ملاحظ ليك ، ليك اسبوع مقطمة وما بتتكلمي معاي الا وين ووين
_والله ده رد فعل طبيعي من تصرفاتك الغريبة
_ديدي انا مضغوط ووراي ألف حاجة
_وريني الوراك ده وانا ح ارتاح
_لما اي شي ينتهي بوريك ، يلا انا نازل
______
دليدا ليها حق الظاهر انو باين علي شديد التوتر والقلق بس هي ما عارفة الحاصل عشان كده معزورة
ما عارفة انو انا بعمل المستحيل عشان ماف دمعة منها تنزل أنا المارضيت انو اخوها يرفع يدو عليها او حتي يصرخ فيها
انا الاتحديت سعاد عشانها ايوة سعاد ما أمي سعاد لانها ما بتمت للأمومة بي صلة سعاد الما عارفة يعني شنو تربية ويعني شنو عطف وحنان بعرف ناس كتار في اغلب اسرنا السودانية بيربو ايتام او حتي لقطاء مجهولي الأبوين والنسب وبربوهم احسن تربية وبخافو عليهم وبتعبو عليهم وحتي لو الله رزقهم بالاطفال مابيفرق عندهم من الطفل المن دمهم بس سعاد ماكان هاميها الطفل كجنا ليها تعوض بيه الامومة الفقدتها لا كان بالنسبة ليها (ولد كوتشينة )
