جبروت السنين

البارت الرابع والعشرون (بارت عيدية)

#جبروت السنين
الكاتبة :Sarah
البارت الرابع والعشرون

ضحكت"
كال :بوية شكد مشتاك لضحكتج
باوعتلة مبين تعبان وضعفان طبطب ع المكان اليمة بمعنى تعالي هنا كمت من مكاني وكعدت يمة
لزم وجهي بثنين ادينة وكال : مشتاك الهالعيون
بعدت منة كال بحنية :شبيج حوريتي
هزيت راسي بلا وكتلة :مابيه شي
جسور :حوريتي ديريبالج تاخذين شي من خالتي نجيحة واذا انطتج شي ذبيه
باوعتلة وبعدين كتلة :شراح تسوي وياها
تنهد وكال : مالج دخل بهذا الموضوع بس خلي علية
سكت شوب بعدين كال : حوريتي اريد منج تصلين وتلتزمين  بصلاتج وتقرين قرآن يريحج ويشرح صدرج
حور :ان شاء الله
جسور :يلا بوية انه اروح هسا ديري بالج ع روحج
"باسني براسي" وطلع
ماأدري شبيه اريدة ومااريدة مااعرف شريد بس الاعرفة ومتيقنة منة اني احبة وحبة ينبض بكلبي احبه احب لهفتة وحنيتة علية احبة من يكول ابوية احس بيه صدك حبيبي وابوي وامي وكل حياتي

مرت أيام صحيح حالتي تحسنت بس احس بخنكة وافز واخاف من كولشي اليوم توجهنا من الصبح لكربلاء اني وشهد وسلوى وبيبي نجاة حسين ودانة وصلنة الصبح
دخلت بين الحرمين
زرنة الامام الحسين (عليه السلام)
وطلعنة نزور الامام العباس
باوعت قبة الامام العباس (عليه السلام)
حسيت بخشوع وقشعر جسمي وكمت اردد "سلام الله عليك ياقمر بني هاشم"
دخلت وضربني الهوا البارد ارتخت رجليه مااكدر اوكف ع حيلي و امشي كمت أرجف لزمتني شهد وخلتني الزم الشباك
لزمت الشباك وانفجرت من كل كلبي ابجي وصرت اشكي همومي كلها وتعبي وقهر كلبي وادعي
اجيتك ياابوفاضل
ونخيتك احلفك باختك زينب الكافلها تريح كلبي وتاخذلي حقي ياسيدي ومولاي الدنيا دارت عليه وماعندي احد غيرك اجيت اشكيلك واذب حملي عليك احلفك باخوتك الحسن والحسين تطفي نار كلبي وتشرح صدري اجيتك خاطري مكسور اريدك تجبر بخاطري اخذو ابوي مني حسبي الله ونعم الوكيل بيهم ماعندي غيرة سند بهالدنيا اريدك تاخذلي حقي يتيمة وهضموني وهضيمة اليتيم مو شوية عدكم بقيت ابجي ولازمة الشباك فرغت همومي كلها

اجتي كومتني شهد وصلينة كملنة وطلعنة من الحضرة سألتها ع سلوى ماهيه كالت ويه بيبي نجاة بقينة ننتظرهم بين الحرمين الشريفين حسيت براحة نفسية فلا بعدها راحة راحة مو طبيعية طلعو كلهم رحنة للمطعم نتغدة كال حسين :بسرعة تغدو علمود نرجع
عاطت بيبي نجاة :وشبيك مستعجل هيي مكموع
خلينة ناكل ونزور براحتنة.
نفخ بنفاذ صبر من بيبي نجاة الكل شوي مرزلتة وكال :حجية عندي شغل

كملنة ورجعنة للناصرية احس تجدد نشاطي وطمأنينة غمرت كلبي ونترست تفاؤل وأمل وصلنة للبيت
صعدنة سبحنة وبدلنة شهد كالت :حورية حبيبتي اني باجر راح ارجع لبغداد
حور :خليج
شهد :بعيني والله اكيد اجيج بس خلي اروح كم يوم سالم خبصني صارلي شهر ونص هنا
مر اليوم والثاني اجة سالم اخذ شهد وعدتني تجي