قصة فراق ( روايات ليبية )

حلقة 12 🔥

#قصة_فراقـ💔
.
.
.
الحلقة 12🔖
.
.
.
هياااا تفااااعلوووو 😍😍😘😘👏👏
.
.
.

ميسم..ماما امس تلاقينا مع احمد واحني نتمشو
هنادي..اممم باه؟
ميسم..سئلني لو هو جي تقدم تاني نوافق او لا واني قتله خلي نفكر
هنادي..وانتِ؟!
ميسم..صليت صلاة الاستخارة وحسيت براحة وحلمت بي تيم جاني هكي قعد يقولي وافقي وماتخليش ولدنا يعيش يتيم وافقي وعيشي حياتك انتِ مزال صغيرة اني قتله لا مانبيش نبيك انت وفجأة اختفي😢💔
هنادي..شوفي يابنتي بغض النظر ع تيم اني الصراحة من قبل نبيك لي احمد ولاكن توا اختلف الوضع ماتوقعتاش مزال يبي بس اهو جاك وطلبك وكلمك انتِ ميسم مستحيل تلقي شخص يحبك هدي فرصتك اقبلي فكري بعقلك مش بقلبك انتِ مزال صغيرة اتزوجي و عيشي حياتك ملي حوشك بصغارك وافرحي بوك واني لي امتى ابنقعدولك خوتك اهو واحد تزوج ومانشبحوش فيه ديمة حتى هو بيدير عيلة اختك سيورة وبيجي نصيبها وتمشي امجد امتى مانروحو لي ليبيا اكيد حنخطبوله اللي يبيها وانتِ؟؟؟؟ ولدك يكبر ويتزوج وانتِ؟؟؟؟ فكري بعقلك صح الزواج مش كل شي بس اهو نقولك من توا نصيب زي احمد مش حيجيك واحد يبيك ويحبك وزياااادة ولد صغير ومن ندك شن تبي تاااني احمدي ربك يابنتي ربي عوضك بولد زي احمد يبيك ويحبك ❤ ويبي يربي ولدك افرحي وعيشي حياتك لا اني ولا بوك قاعدين اليوم معاك وغدوا عند ربي
ميسم..تقوليش هكي ربي يحفظكم ليا ❤
هنادي..يابنتي اني نقولك بس الاعمار بيد الله
ميسم..باهي خلاص حنفكر ☺
هنادي..ايوااه
روحو وحطولهم ياكلو وميسم قعدت ترقد في ولدها في الدار وتفكر في الموضوع شبحت فونها يرن لقاته احمد ردت عليه
احمد..اهلين
ميسم..اهلا بيك
احمد..نبيش نطول في الموضوع اكتر شن صار
ميسم..شوف أحمد قبل كل شي وقبل لا نقولك موافقة او لا انت حتقبل اي شرط نقولهولك؟؟
أحمد..اكيد اني مانبي شي الا انك تكوني جنبي💔
ميسم..باش تكون في الصورة بس اني الحق يعني مانقدرش نرفضك لسببين السبب الاول وصيت تيم الله يرحمه انك انت تربي ولده وانك لو جيت وخطبتني نوافق😔 السبب التاني ماما وبابا يبوني نوافق واني صليت وارتحت يعني نبي زواجنا يكون على الورق كبداية لو تحبني خليني نحبك ونتعود عليك💔
أحمد بدون اي تردد..موافق
انصدمت ميسم بيه وكيف وافق حست بحبه الكبير ليها وخافت انها ماتقدرش تعطيه نفس الحب
احمد..الو معاي؟
ميسم..ايه ايه معاك اوك معناها اتفقنا💔
احمد..بإذن الله❤ معناها حنجيب امي
ميسم..تتفضل خالتي مرحبتين بيها
سكرت ميسم منه وقالت لأمها انهم جايين وتنهدت وقعدت تفكر وتخمم كيف حدير وهل حتتأقلم معاه او لا!؟
.
.
عند احمد
أحمد..يماا
حمـيدة..نـعم
أحمـد..تمـشي مـعاي حـوش خـالتي
حمـيدة..عـلاش مـش بنطـلعو!؟
أحـمـد..يمـا انـي نبـي ميـسم صـح؟
حمـيدة..ايييه يـاوليـدي رجـعنا لـنفس المـوضوع
أحمـد..امـالا عـلاش جـايين اهنـي حني🙂
حمـيدة..باه كـمل شـنو صـار
أحمـد..مـيسم وافـقت وحنتزوجو
حميدة..شنوو كـيف صـار
أحمد..دويت معاها واقنعتها وقتلي تمام موافقة
حميدة..باه حتى حاضر اللي تبيه ياوليدي
أحمد..يما والله هيا نصيبي ونحبها اني ماتكسريش بخاطري
حميدة..ياوليدي مش كاسرة بخاطرك ولا بخاطرها ولا بخاطر الوليد اللي قعد منغير وبي وان شاءالله ربي يجمعكم بحلاله وتحبك كيف ماتحبها واكتر
أحمد..باهي هيا نمشولهم
حميدة..خلي نكلم خالتك قبل
أحمد..عندهم علم ياودي هيا
حميدة..هي
ناضت حميدة لبست ومشو لحوش اهل ميسم
خشو ورحبت بيهم هنادي
بـدلت ميسم ولبست احلى ماعندها قررت انها تعطي أحمد فرصة جديدة وتفرحه
انخطبو لبعض ووافقو اب ميسم وخوتها فرحولها
قررو يروحو لي ليبيا
ميسم وهما في المطار..مش مصدقة ان بنروح لبلادي😢
مها..ولا اني مصدقة😍الله محلاه اليوم لاننا مروحين لبلادنا وحياتنا واستقرارنا
أمجد..هيا انتِ وياها بلا هم🙂
أمجد كان حاصل في شناطي ومتعفلق ماشي جاي قعد
أحمد جي جنب ميسم..دخلي شعرك🙂
ميسم..اياح بدينا اووو
أحمد..دخليه خير ما ندخله اني توا
ميسم ضحكت..باهي بلا نفخ
مها تشوفلهم ومبتسمة
ومشي الوقت وروحو العيلة كلها
.
.
.
عنـد أميرة حبيبة أمجد
نزلو البنات يجرو لما شافو خوهم طه خاش للحوش
أمـل..روروروروروروي واخيرا واخيرا وخيي روح😍😍
أماني حضناته..طه حبيبي😍😍👏🏻
طلعو البنات من الحوش وكلهم سلمو عليه
أميرة..الحمدلله على سلامتك يا طه
طه..الله يسلمك أمور😍
ريان لاحظت نظرته لي أختها غريبة قدمت طول وسلمت عليه..طه الف الحمدلله ع سلامتك عطلت المرة هدي
طه..قراية وخدمة كيف تبيني😅
أماني..المهم روحتلنا😍
أم طه..روروروروروري وليدي روح الله يبارك اللهم صلي على النبي
سلمو عليه وقعمزو هدرزو معاه
طه..مروح اهو يومين تلاتة نتم موضوعي اللي جاي ع خاطره ونولي ان شاءالله
امه..ربي يوفقك وليدي
وفاتت الأيام
كانت أميرة مقعمزة بروحها في الجنان مكسدة وتستنى في أمجد يتصل بيها كانت تقرا في شيتاتها خش طه قعمز جنبها..شن اديري
أميرة..شي نقرا
طه..امممم باهي بالتوفيق ان شاءالله
أميرة..امين يارب شكرا
طه..باه نبي نكلمك في موضوع
أميرة..شن في ان شاءالله خير
طه..الموضوع اللي جاي ع خاطره هوا انتِ
أميرة..شن هوا؟
طه..الحق يعني اني نحبك ونبيك ونبي نخطبك باش نرتاح ونولي نكمل كل شي عندي برا ونروح نستقر اهني ياريت توافقي
أميرة نصدمت ومعش عرفت شن تدوي..ءءءككيف
طه..ايه اللي سمعتيه😅
أميرة..بس اني مزال مانبيش لا نتزوج لا شي
طه..نستناك عادي
أميرة..طه ماتستنانيش ارجوك اني مش موافقة وانت نشوف فيك زي وخيي بجد عمري مافكرت فيك كزوج او شي تاني يعني
طه..بس اني مش خوك ولد عمك واني قتلك نحبك
أميرة..طه ارجوك ماتضغطش عليا
طه..أميرة في حد في حياتك!؟؟
أميرة..طه خيرك هكي قتلك اني مانبيش وخلاص
طه..قوليلي الصدق
أميرة..ايه في يا طه في خلاص عاد خليني في حالي
طه..مية مية بنت عمي سامحيني كان ازعجتك والا ضايقتك
طلع طه وهو مضايق مكانش متوقع شي زي هدا بككككل
اما أميرة خشت للحوش ولدارها طول قعدت تبكي وماعرفتش شن ادير
اتصل أمجد ردت عليه وهيا تبكي
أميرة..نعم😢
أمجد..حبيبتي خيرك
أميرة..أمجددد ساعدددني😭
أمجد..خيرك شن في تكللللمي
أميرة..مش طه ولد عمي روح!؟؟
أمجد..ايه خيره !!
أميرة حكتله كل شي صار
أمجد..نعممممم كييييف حتى تدوي معااااه انتِ!!؟😤
أميرة..هدا اللي صااار والله مانندري عليه لين جي قعمز وحكالي طول الموضوع
أمجد..مية مية خلي تو نكلمك
أميرة..أمجد قولي شن ندير والله خاايفة نبيش نتفارقو اني مانبييش😭
أمجد..حبيبي انتِ ليا اني ومستحيل ياخدك واحد غيري اطمني مستحيل نخليه ياخدك وتوا خليني نلقى حل للموضوع هدا ونكلمك باهي حبيبتي
أميرة..حاضر
أمجد..هي أقري امتحانك وشوية ونكلمك وماتشوشيش مخك بشي تاني
أميرة..باه
سكرو من بعض وقعد أمجد يخمم ومشعارف شن يدير والحل الوحيد عنده إن يخطبها❤
روح أمجد للحوش لقي خواته كلهم قاعدين مباش يقول قدامهم وقعد يرحي على طه وخايف ان يسبقه ولانه ولد عمها مش حيقولو لا💔
روحو الخوات وميسم خدت ولدها وركبت لدارها
اما مها ف ركبت وخشت للدار لما جتها مكالمة
اما أمجد لقي الوقت مناسب وأمه قدامه توا ومكسدة بروحها
امجد..يما تعالي نبيك
هنادي..هيا هي
جاته امه لي داره وقعمزت معاه
امجد..### #يتبع
.
.
ان شاءالله تنال إعجابكم ياااارب وطبعا هدي الحلقة كانت ممسوحة ورايحة وكاتبة الرواية هدي من 2017 حاولت نجمع كل شي من الحلقات والحمدلله قدرت نوصلهالكم ونكتبهالكم😍❤ الحلقة 13 في ليل ساعة 10 طبعا لو تفاعلتو #حنو