الحلقة 1⃣1⃣
منـ رواية #قـصـة_فـراقـ💔
.
.
.
#لاااااااااااااااايك
.
.
.
#كووووووووومننت
.
.
.
#منشن
.
.
.
مها..بجد ميسو ابترجعيلنا ميسو الاولى اللي مايبكيها ولا يحزنها شخص 😍
ميسم..نحاول 😊
مها..الحمدلله😍
ميسم..اي
قعدو يتمشو لعند ماتقابلو بي احمد مقعمز وسارح في البحر
مها..مش هدا احمد
ميسم..وينه
مها..اهواه
ميسم..ايه والله صح
مها..تعالي نخلعوه😂😂
مشو جت ميسم قعمزت جنبه ومها قعمزت جنبه في الجيهة التانية
ميسم & مها..كيف الحال يا ولد الخالة 😂😂
احمد..بسم الله الرحمن الرحيم امتى وكيف جيتو
ميسم..نتمشو شبحناك
مها..غر شن تفكر بس
احمد شبح لي ميسم وابتسم..واضحة 😉
ميسم..☺ ءء مهو اني ابنتمشى بي تيم
مها..اني رجليا تعرفي نوض معاها احمد ماه هيا تعرفش الطريق زين 😅
ميسم تفنص في مها ومها فايتتها
احمد..اوك
ناضو ميسم واحمد وتيم
مها..اااه ربي يجعلكم من نصيب بعض😍😘
قعدو يتمشو وميسم تشبح للبحر وتتمشى
احمد..كيف حالك ؟
ميسم..الحمدلله خير من قبل ابديت نتأقلم ع الوضع 😔
احمد..الحمدلله
ميسم..شن جوك انت ☺
احمد..بجنبك نبدا الحمدلله😉
ميسم تحشمت ودارت روحها تلعب في تيم
احمد..ماشاءالله عليه رايح زايد
ميسم..زاد زوز كيلو☺😍
احمد..ماشااءالله😊
ميسم..ايه
احمد..ميسم
ميسم..اها
احمد..لو جيت وخطبتك تقبلي؟؟ مانبيش نجي مرة تانية وترفضيني نبي المرة هدي نجي وواتق انك حتوافقي بجد
ميسم..نفكر ونرد عليك
احمد..تمام😍😍
ميسم..حي تعالى ناخدو حلوة صوف
احمد..هي مشو خدو حلوة صوف ولي مها حتى هيا وقعدو يتمشو وكانو بعاد هلبا ع مها
مها..ماصدقو المعفنين خلوني بروحي 😒 هدا غر ميسم ماطيقاش😠
جي قعمز جنبها
محمد..تقوليليش خيرك ديمة تدوي بروحك زي الهبلة😕
مها..ووك ياحمار خلعتني شن جيبك اهني😳
محمد..مكتوبة بي اسمك ومانندريش😒
مها..هاهاها
محمد..شن اديري بروحك
مها..شي مش بروحي معاي اختي وولد خالتي غر مشو يتمشو وقعدت بروحي
محمد..اممم عشاق😉
مها..قصة طويلة
محمد..احكي اني مكسد😁نحب نسمع القصص هدي
مها..وراس امك غر جديات؟؟
محمد..😑انتِ ديمة هكي طبعك بارد
مها..ماهو اني عندي حساسية مع الثرثارين 😒😒
محمد..😒😒هيا نسمع فيك
مها..بس اهو نقولك حاجة اختصار للموضوع كله اختي هدا ولد خالتي يحبها هلبا خطبها وماوافقتش وبعدين جي خطبها واحد تاني يحبها وتحبه اهني نخطبو وتزوجو ويناري جاه المرض توفا ليه توا هلبا قريب يسكر سنة المهم توا ولد خالتي جي هني يربط في احباله باش يخطبها تاني وتوافق 😂😂فهمت توا هدا باش اني خليتهم بروحهم وهي توا عندها ولد من راجلها اللي توفا
محمد..الله يرحمه ان شاءالله صار اختصار😂😂
مها..وحق ربي انوض ره😠
محمد..غر قعمزي نبصر عليك😂😂المهم حسيت ان بدينا نهدرزو طول المهم اني محمد زي ماتعرفي من طرابلس وحياتي كشاب ليبي عادي نمشي ونجي هني ع خاطر شركة بوي اهني اني مستلمها ومرات نجي هياجة وخلاص 😍
مها..اهااا
محمد..وانتي شن سبب جيتكم
مها..السبب يا محمد اخي بكل تغربنا ع بلادنا بسبب ناس تافهة خطفو اختي هدي اللي توا حكيتلك عليها هيا وراجلها اللي توفا قعدو شهر بعدها ولد فاعل خير هربهم وطلعنا من تاني يوم ماستنيناش بكل مشينا تونس وجينا اهني😔
محمد..لا حول ولا قوة الا بالله ربي يهني بلادنا والله معاد عرفنا كيف نعيشو فيها😣
مها..ايه
محمد..وتوا كيف صاير تقري والا موقفة
مها..لا حولنا اهني اصلا مش معروف امتى نرجعو ف ابدينا نقرو اني وخوي اللي شفته يومها امجد
محمد..ايه اتذكرته
مها..اي اني صيدلة وهو طب بشري
محمد..ماشاءالله ربي يوفقك واختك
مها..اختي اعلامية بس مزالت مابدتش تخدم اهني جابت ولهت في ولدها
محمد..جديات اعلامية؟؟
مها..ايه
محمد..حلو☺
مها..هههههه هلبا ناس عارضوها بس هيا تحدتهم وخدتها الشهادة 😍وخلتهم يسحنو عليها
محمد..احسن مادارات اللي تبيه هوا اللي تاخده
مها..ايه وانت شن تخدم
محمد..اني ياستي قريت لعند الثانوية بعدين معاد نبي نقرا كرهتها ومش متع قراية اهو نقولك😂 امشي قلت نخش معهد ادارة اعمال وخلاص وكملته وتوا نخدم اهنايا
مها..هههههه بكل هيا القراية مانتم لين نشيب اني وبذات الصيدلة صاعبة
محمد..ايه
مها..عطلو تعرف
محمد..خليهم ياخدو راحتهم
مها..هههههه ماهو عندي ماندير نبي نروح نراجع قرايتي
محمد..لاحقة عليها
مها..باه
محمد..عندك فيس
مها..هئه
محمد..غريب
مها..مانحباش
محمد..شن عندك
مها..انستا واتس اب سناب
محمد..باه عندي واتس اب وعندي انستا ضيفيني
مها..هاك فوني واكتب ايميلك وضيف روحك
خدي فونها كتبه في الواتس اب وفي الانستا وعطاهولها
مها..جعت اني فيش مكان قريب
محمد..خليك دقيقة تو نجيك ☝
مشي محمد خدي برجر 🍔 🍔 وجاها
محمد..تفضلي سخونة 😍اول عزيمة مني ليك
مها..😍😍بعدك جيعااانة
محمد..ههههههه
كلو وشربو مشروب
مها..اهما واخيرا جو
محمد..هههههه
ميسم استغربت من اللي مع مها
مها..واخيرا شرفتو
احمد يشبحلهم ومستغرب من هدا
مها..هدا محمد تلاقينا في الملاهي وتوا صدفة
احمد..اهلين😕
محمد..اهلا بيك
مها..محمد هدي اختي ميسم وهدا ولدها تيم☺
محمد..اهلا وسهلا تشرفت بمعرفتكم
ميسم..اهلا بيك ☺
محمد..هي مداما اهلك جو اني مع السلامة
مها..سلامات
مشي محمد ومشو مع بعض
ميسم..من امتى يا مها😉
مها..بلا برادة والله مانندري لين جي قعمز جنبي وكنت مالة بروحي اصلا
ميسم..ان شاءالله يكون هكي بس😉
مها..وانتم علاش عطلتوو
ميسم..ماحسيناش بالوقت
مها..كويس 😉😉
روحو للحوش وروح احمد لي حوشه مع امه
ميسم..تعبت تعرفي 😩
مها..مشيتي هلبا ماه
هنادي..باهي اللي شرفتو
مها..خدانا الوقت يا ماما
ميسم..ايه
خشو للدار وبدلو ورقدو طول وحتى تيم رقد من الطريق بعدين ناض في الليل امخر بس ميسم من كتر التعب راقدة في سابع نومة هيا ومها
خش محمد لقاهم راقدين
تيم..اووووااا اوووووااا😭😭
خداه قامه ورفعه لي هنادي لقاها راقدة قعد يسكت فيه ويدور بيه خش خدي شيشته رضعه وقعد يهز بيه لين رقد محمد وتيم راقد جنبه في الصالون
ناضت ميسم مالقتش تيم نطت خشت لي دار امها وبوها مالقتش بوها لقت امها بس مشت خشت للصالون لقاته راقد بحدا بوها ابتمست وصورتهم ونوضت بوها يصلي الفجر وقامت ولدها وخشت بيه رقداته جنبها
ميسم..هي ياماما نني هيا والله تعبانة مامتك ره ماتزيدهاش 😔
تيم..اوووا اوووا
ميسم..ااااه يا ولدي ياسر خلاص هيا نني هوووها هووهاا
وقعدت تهز بيه لعند مارقد وهيا رقدت
ناضت مها لقتهم راقدين بدلت بالشوية وباش ماديرش صوت وطلعت مشت للجامعة
اما ميسم قعدت راقدة لعند الظهر ناضت لقت روحها راقدة لعند الظهر وتشم في صنة الغدي ناضت غسلت وبدلت وغسلت لي تيم وبدلتله وطلعت بيه
هنادي..صباح الظهر
ميسم..ههههههه والله الولد هدا ماخلاني نرقد ماكتر عياطه
هنادي..هههههه اي باين حتى بوك ماليشي هلبا نايض
ميسم..يناري سهر بيه هلبا وبعدين نضت الفجر خديته منه
هنادي..ايه قال بوك
ميسم..اي
وكلت ميسم ولدها لين شبع وبعدين حطاته في القعماز انتاعه ومشت ادير مع امها حطو الغدي وقعمزو يتغدو ميسم وهنادي لانة الباقيين معطلين
ميسم..ماما امس تلاقينا مع احمد واحني نتمشو
هنادي..اممم باه؟
ميسم..سئلني لو هو جي تقدم تاني نوافق او لا واني قتله خلي نفكر
هنادي..وانتِ؟!
ميسم..صليت صلاة الاستخارة وحسيت براحة وحلمت بي تيم جاني هكي قعد يقولي وافقي وماتخليش ولدنا يعيش يتيم وافقي وعيشي حياتك انتِ مزال صغيرة اني قتله لا مانبيش نبيك انت وفجأة اختفي😢💔
هنادي..شوفي يابنتي بغض النظر ع تيم اني الصراحة من قبل نبيك لي احمد ولاكن توا اختلف الوضع ماتوقعتاش مزال يبي بس اهو جاك وطلبك وكلمك انتِ ميسم مستحيل تلقي شخص يحبك هدي فرصتك اقبلي فكري بعقلك مش بقلبك انتِ مزال صغيرة اتزوجي و عيشي حياتك ملي حوشك بصغارك وافرحي بوك واني لي امتى ابنقعدولك خوتك اهو واحد تزوج ومانشبحوش فيه ديمة حتى هو بيدير عيلة اختك سيورة وبيجي نصيبها وتمشي امجد امتى مانروحو لي ليبيا اكيد حنخطبوله اللي يبيها وانتِ؟؟؟؟ ولدك يكبر ويتزوج وانتِ؟؟؟؟ فكري بعقلك صح الزواج مش كل شي بس اهو نقولك من توا نصيب زي احمد مش حيجيك واحد يبيك ويحبك وزياااادة ولد صغير ومن ندك شن تبي تاااني احمدي ربك يابنتي ربي عوضك بولد زي احمد يبيك ويحبك ❤ ويبي يربي ولدك افرحي وعيشي حياتك لا اني ولا بوك قاعدين اليوم معاك وغدوا عند ربي
ميسم..تقوليش هكي ربي يحفظكم ليا ❤
هنادي..يابنتي اني نقولك بس الاعمار بيد الله
ميسم..باهي خلاص حنفكر ☺
هنادي..ايوااه
روحو وحطولهم ياكلو وميسم قعدت ترقد في ولدها في الدار وتفكر في الموضوع شبحت فونها يرن لقاته احمد ردت عليه
احمد..اهلين
ميسم..اهلا بيك
احمد..نبيش نطول في الموضوع اكتر شن صار
ميسم.. #يتبع
.
.
.
ان شاءالله تكون نالت اعجابكم وفكرو يا ترا شن حتقول ميسم لي احمد هل حتوافق او لا ؟؟ كله حتعرفوه غدوا بإذن الله وحنـبدأ زي مـاتبـو حلـقتين فـي اليـوم😍😍 #حنو
أنت تقرأ
قصة فراق ( روايات ليبية )
Romansaقصة فراق ..... قصة حزينة بين بطلين و لكن فجاء يقلب الفراغ الي شوق و حب اخر للكاتبة : حنو لمحبي قصص حب الحزينة رواية من داخل المجتمع الليبي ؟
