دخلت سارة لبيتها و الدمعة فعينيها شافت روحها فالمراية
سارة: لازم نكون قوية ماشي ضعيفة ماشي كل ما يديرلي حاجة نوض نبكي كي الجايحة و من اليوم ما نزيدش نخليلوا الفرصة باش يبهدلني
مسحت عينيها و رجعت الابتسامة لوجها 🙂🙂
دخلت للدوش دوشت و بدلت حوايجها و نشفت شعرها و حبطت لتحت لقاتوا قاعد فالصالون دورت وجها و كانت رايحا للكوزينة عيطلها
رياض: راني رايح نخدم دوكا نجي على 12 نلقا الفطور واجد و مادابيك ما يكونش كيما تاع البارح بسكو هاد المرة ما نكسرش الطابلة نكسر الدار و نكملك معاها فهمتي
سارة: فهمت 😤😤
خرج رياض و خبط الباب سارة ما خلات ما تقولوا جايح حمار حلوف روبو ........ اومبعد خممت واش دير ولات عيطت لخت رياض مرام
سارة: الو مرمورتي سفا راكي مليحة
مرام: سفا حمد الله عاش من سمع صوتك سرسورة والله غير توحشتك
سارة: تشوفي انا شحال توحشتك كرهت الدار
مرام: وعلاش خويا ما راهوش متهلي فيك
سارة: لالا مي والله غير حشمت نقولك
مرام: خير نشاالله قولي من وقتاش تحشمي مني
سارة: اوكي انا ما نعرفش نطيب و راني حابا نتعلم تعرفي كاش وحدة جي طيب و انا نتعلم منها مي بشرط رياض ما لازمش يعرف
مرام: اوكي كاين وحدة دوك نبعتهالك او ما تخافيش كوني هانيا رياض ما يعرف والو
سارة: ميغسي بوكو زينة ديالي قوليلها ما طولش
كيما كان لحال جات المرا طيبت و راحت قبل ما يجي رياض غير لحقت 12 تخبط الباب تاع برا سارة عرفت بلي جا حست قلبها حبس كانت خايفة يفيقلها وجدت الطابلة كامل
رياض: واش طيبتي
سارة: ( تمتم ) طيبت الرهج لي نشاالله تاكلوا تموت و نتهنا منك
رياض: اييي راني نهدر معاك واش راكي تقولي
سارة: كلش راهوا واجد فوق الطابلة 😡
رياض: اييه مليح نلقا حاجة ناقصة نتفاهم معاك
راح لطابلة لقا كلش محطوط شاف و قعد و سارة كانت رايحا لبيتها بسكو ما تحبش تقعد معاه فبلاصة وحدة
رياض: خير نشاالله وين راكي رايحة
سارة: راني رايحة لبيتي
رياض: مادام ما قتلكش روحي ما تروحيش انا لي نقلك وقتاش تروحي او وقتاش تقعدي 😈😈
بقات سارة واقفة و تشوف فيه 😡😡 و هو يرهج كلات روحها من الداخل كي كمل كلا خزر فيها و قالها
رياض: المرا الجاية طيبي وحدك و دوكا خملي الحالة و روحي وين حبيتي
و خرج راح يخدم العشا كيفكيف جات المرا طيبت جازوا 15 يوم و حاجة ما تبدلت دايمن نفس الروتين هو يضل يتلاقا مع ريمة و يبات يهدر معاها فالتيليفون و هي ظل تحرش فيه على سارة اما سارة جوزت les examens و دات فاكونس مع هادا كانت مع التخمال تاع الدار و تتعلم الطيات من عندك هاديك المرا و زيد لقاتها سبة باش تونسها فهاديك الدار
واحد النهار كانت سارة رايحة طيب الفطور حتى صونا تليفونها لقاتو رياض رفدت
سارة: الوو!!!!!!
رياض: اسمعي ما طيبيش الفطور راني جاي
و كوبا سارة تقلقت و خافت ما فهمت والو ما شي من عوايدو يدير هكا قالت نشاالله ما يكون غير الخير و بعتت هاديك المرا لي طيب و قاعدة تستنا فيه يجي حتى سمعت صوت الباب راحت تجري تشوف واش كاين حتى تصيب المفاجأة لي جامي ستناتها و هي ريمة اييييه جا و جاب معاه ريمة للدار
سارة تسمرت فبلاستها و هما جازوا عليها بلا ما يقيموها راحت تبعتهوم لقاتهم دخلوا للكوزينة و تطلب في ربي باش يعطيلها الصبر
سارة: نقدر نعرف واش راه صاري ؟؟
رياض: ما كان ما دخلك
سارة: كيفاش ما كان ما دخلني هاذي؟؟
رياض: ( يعيط ) اييه ما كان ما دخلك الدار هاذي لي راكي فيها و كلش تسال فيه غير ريمة نتي زيادة هنا لوكان ما شي نتي لوكان راني جيت لقيت مرتي ريمة تستقبل فيا فدارنا
ريمة: ( بدات دمع و تتمسكن زعما ) خلاص رياض حتى هي راهي ساكنة فهاد الدار و تسال فيها 😥
رياض: الخماج ما يسالش فداري
خزرت فيه سارة الخزرة ديالها 😡😡 و راحت لبست لافاست ديالها و باسكاتها و خرجت دار رياض ريمة لقاها تبكي مسحلها دموعها و بدا يهدر معاها بالحنانة تقول ماشي هو الوحش لي كان يعيط على سارة مسكينة
رياض: حبيبتي وعلاش راكي تبكي دوكا
ريمة: ما كنتش حابة نديرلك المشاكل لوكان خليت كي تطلق نطيبلك واش حبيت
رياض: ما تهبلينيش واحد ما دخلوا فينا و ديجا حبيت ناكل من يدك ليوم واحد ما يسالني
ريمة: اوكي ما يكون غير خاطرك بيبي بصح شفتها شحال شابة وكيفاش تعرف تلبس و نتا راك معاها فدار وحدة
رياض: امممم راني نشف فريحة الغيرة هههههههه نتي هي حبيبتي و تعرفيني ما نشوفش فوحدة من غيرك ديجا انا ما نحملهاش و لوكان ما تزوجتش بيها ما راناش هكا درك
تبسمت ريمة: اييه واش راك حابني نطيبلك ؟؟؟
*****************
نرجعوا لسارة المغبونة لي راحت قعدت مقابلة البحر لي كل ما تكون زعفانة و مهمومة تروح ليه و خاصة هاد لمرة ما تقدر تحكي لحتى واحد بسكو ماعلابالهومش بالاتفاقية لي بيناتهم مالا ناضت تبكي و تشكي للبحر ما لقات ما دير حبت تطلق مي خافت على باباها كاش ما يصرالوا و قالت نسكت و نحمل الذل بصح حتى هادي ما نقدرش عندي كرامتي ستغفرت ربي و دعات او وكلت امرها كامل ليه هو لي يوريلها طريقها شافت الساعة لقات راح الحال و ما يكونوش هادوك 2 فالدار باينة راح يوصلها للدار
ناضت ركبت فطونوبيلتها او رجعت للدار ما لقات حتى واحد طلعت لبيتها بدلت حوايجها و تكسلت في بلاصتها تخمم حتى سمعت الباب تخبط عرفاتوا بلي هو
جازت سمانة سارة ما هدرتش كامل معاه و هو ما لقاش على واش يعيط ولاو ما يتلاقاوش بزاااف
صباح جديد ناضت سارة بكري راحت دارت سبور من بعد جات دوشت و بدلت و راحت طيب قهوة قبل ما ينوض و تتلاقا بيه مي هو ناض قبل ما تكمل
رياض: واش مازال والفت ما نشوفش هاد لفيgورة مع صباح ربي نهاري خسر من دوك 😒😒
سارة ما قيماتوش كامل و كملت توجد فالقهوة هو ما حملهاش كي رماتو فالثقيل حكمها من يدها و دورها ليه ضربت فصدرو او ولات
رياض: يا 🤬🤬🤬🤬 راني نهدر معاك
خزرت فيه سارة الخزرة ديالها الواعرة 😡
رياض: شحال من مرة نقولك ما تشوفيش فيا هكا خيرلك و حبسي هاد التشناف خير ما نطلقك
سارة: تعمل مزية واش راك تحوس من عندي دوكا 😡😡😡
رياض: نقسي الهدرة الزايدة و حبسي التشناف
سارة: انا ما شي صحبتك لي ظل تلعب فيها تتمسكن و تبكي و تقلك انعم لكلش 🤨
رياض: ما تزيديش تجبديها هاديك لالاك ما تلحقيهاش وحدة خامجة كيما نتي ما عندكش الحق تهدري عليها نتي قبلتي تتزوجي بيا مالا تخلصي و تسكتي 😡
طلقها و راح هي حست كلاموا طاح عليها كيشغول حجرة كبيرة ما لقات ما تقولوا كلمة ما خرجتش من فمها طاحت فالارض تبكي تبكي.......... 😥😥😥
اومبعد ناضت قالت نزيد نصبر شوية و خلاص خملت الدار وجدت العشاء تعلمت شويا بسكو هي تفاهمت مع صحاباتها يروحوا يتعشاو كيفكيف عندهم بزااف ما تلاقاوش لبست و راحت نحات على خاطرها غير صحاباتها لي ينحولها الغمة و ينسيوها فالمشاكل قدرت تنسا شوية
جا رياض للدار ما صابهاش قعد تعشا و راح عيط ريمة فالتيليفون يهدر معاها مور ساعة جات سارة للدار عيطلها
رياض: اسمعي نتي واش راكي حاسبة روحك واقيل انا رخيس الناس واش يقولوا مرت فلان شوفوا واش راهي دير داخلة فنص الليل جيبيلي فالهدرة كي نطلق هومي فالزنق كيما تحبي و معامن تحبي هاذي اخر مرة فهمتي 😡😡
سارة ما حبتش تكثر معاه الهدرة ولات تيvيتيه قاتلوا ايه و راحت لبيتها
جازوا اليامات سارة ولات تيفيتي رياض باش نا يعيطش عليها و ما يبهدلهاش مي بدات تحس بحاجة من جيهتوا ماشي فاهمتها ولا هي ماشي حابة تفهمها بسكو خايفة تواجه الحقيقة بلي تحبوا او ولات ديقلها كي تسمعوا كل ليلة يحكي و يضحك مع ريمة فالتيليفون و هي جامي تبسملها خبات في قلبها و قاعدة تقنع في روحها بلي هي تكرهو او ما تحملوش تشوفو انسان ب2 وجوه
خرجت لجنينة تاع الدار تكسلت فوق الحشيش و قاعدة تشوف فالنجوم و تخمم خايفة تزيد تتعلق بيه مزال بزاف على طلاقهم 😥
صباح ربي رياض راخ يخدم كي العادة و سارة قاعدة تخمل فالدار حتى عيطتلها مرام خت رياض قالتلها اذا تخرج معاها خاصينها شوية حوايج قالتلها سارة حتى نسقسي خوك عيطت سارة رياض بسكو كانت بزاااف حابة تخرج تحوس شوية بسيف باش خلاها و قالها لوكان ماشي على جال ختي ما تروحيش
لبست او وجدت روحها
