عشق ناضج وعشق مجنون

الخاتمة

ناس كتيرة مضايقة من النهاية مش عارفة ليه..

نهاية علاقة في السن الصغير ده يا إما أجيبهم بعد خمس أو ست سنين (نهاية مكررة) واتجوزواوعاشوا في تبات ونبات وخلفوا صبيان وبنات وبقوا نسخة من أمجد وجيهان بس على سن صغير..

يا إما سابوا بعض ومظنش ناس بتربية أمجد وجيهان هينتقموا من بعض أو هيكون فيه تعامل بصورة مش كويسة ما بينهم في المستقبل..

بان في صهيب إنه عمل بنصيحة أمجد، وده برضو بيبين إن مش عيب ناخد نصيحة حد أكبر مننا وليه خبرة عننا في الحياة والعلاقات وبان إدراكه لغلطه والمسئولية اللي حس بيها أخيراً بسبب إنه مش عارف يتعامل في العلاقة ومش بيدي تفاصيل كافية ولا بيتناقش مع الإنسانة اللي بيحبها..

بان في لينا إنها ابتدت تهدى في النقاش وتفكر وعندها استعداد تدي فرصة تانية

بان في صهيب إنه بيحاول يهتم باللي هي بتهتم بيه (زي الروايات مثلا اللي شايفها سخيفة) بس علشان يكون فيه ما بينهم أرض مشتركة واهتمامات مشتركة ومتبادلة

بان في صاحبة لينا إنها عايزالها الخير

بان على شخصية زي سمر إنها رجعت في كلامها بمجرد ما عرفت إنها ممكن تتحاسب قدام سُلطة بجد على اللي هي بتعمله ونهايتها مش محور قصتنا

بان على جيهان إنها مش عايزة تغصب بنتها على حاجة وبتديها مُطلق الحرية هي وأمجد اللي المفروض هو جوز الأم ومفرضوش عليها أي قرارات

القصة جمعت نظرة مجتمعية للست الأرملة اللي بتفكر تتجوز بعد جوزها بشكل بسيط، وجمعت علاقة فيها تفاهم وحب وعقلانية بين أمجد وجيهان، وعلاقة مُجردة من التفاهم بين لينا وصهيب مليانة بالإندفاع وطيش السن الصغير..

بالنسبالي إن صهيب فهم دوره هو ولينا ده كان المهم.. يتجوزوا أو يبعدوا عن بعض مش هتفيد بحاجة قد ما كان يفيدني إنهم يحاولوا يفهموا بعض بجد..

والقصة بينت بنت مهووسة بواحد عمره ما بصلها حتى بصة إعجاب بالرغم من محاولاتها..

والقصة وضحت علاقة صداقة إستغلالية بحتة بين سمر وماهيتاب..

وكان فيه ذكر لعلاقة بين ماهيتاب ومازن اللي ابتدت بتقاليد وعادات وأصبحت علاقة لطيفة بعد كده..

ممكن القصة دي يتعمل منها نوفيلا بعد كذا شهر لو لقيت إقبال من الناس.. لكن غير كده مش هاحشي تفاصيل زيادة بين رومانسية أمجد وجيهان أو حركات لطيفة بين صهيب ولينا أو مازن وماهيتاب!!

يارب الكلام يكون وضح استفسارتكم..